Amishonale akwamba wo angutumizika ku Peru angufika mucharu ichi mu October 1946. Amishonale akwamba ŵenaŵa anguwona chigaŵa chikhulu chakukhumba kupharazgaku. Ndipu ŵanthu pafufupi 7 miliyoni aja muchigaŵa chenichi cho chenga pa mtunda wa makilomita pafufupi 1.3 miliyoni. Kwa vyaka 75 vo vajumpha, amishonale ndipuso abali ndi azichi aja achichita phamphu pakugwira ntchitu yakupharazga mu mapiri nga ku Peru pamwenga mu matawuni ndipu ŵanthu anandi asambira uneneska.

Mu vyaka vakuvuli amishonale ŵechendazi, Akaboni aku Yehova a ku South America azanga mutawuni ya Peru ku Lima kuzigaŵiya mabuku ku ŵanthu akunweka. Anyaki mwa ŵanthu ŵenaŵa angusankha kuteŵete Yehova. Mu 1945, wo ateŵetiyanga ku Chile anguluta ku Lima kuti akabatizi Akaboni aku Yehova atatu akwambiriya a mucharu cho.

Kutuwa mu October 1946 mpaka sonu, Amishonale wo akusere sukulu ya Giliyadi aja achitumizika ku Peru kuti akawovyi pa ntchitu yakupharazga. Anguchita maunganu ngakwamba ndi ŵanthu wo wenga ndi linweka ku Rimac muchigaŵa cha Lima. Chiŵerengeru cha apharazgi chati chayamba kukwera, chiŵerengeru cha amishonale nachu chingukwera ndipu abali ndi azichi angwamba kupharazga muvigaŵa va kubwalu kwa Lima. Mazuŵa nganu napu upharazgi uluta panthazi.

Mzichi Nellena Pool, yumoza mwa amishonale wangufika ku Peru mu 1946. Mu mbiri ya umoyu waki yo yingulembeka mu Chigongwi cha Alinda cha March 1, 1957, iyu wangukamba va mo chiŵerengeru cha ŵanthu chakweriyanga ku Peru. Iyu wangukamba kuti: “Vakusuzga kukonkhoska mo ndivwiya asani ndiwona mo charu ichi chenge ndipu sonu ŵanthu anandi aja Akaboni.

Mzichi Irene Mannings, yo wakusere kilasi nambala 54 ya Giliyadi ndipu weche kuteŵete ku Peru, wangukamba kuti: “Chiziyi kunu, taja tichiwona mo chiŵerengeru cha apharazgi chikwere kutuwa pa 7,000 mpaka kufika pa apharazgi akujumpha 130,000. Ndi mwaŵi ukulu ukongwa kuchitaku chigaŵa chimanavi pa ntchitu yakusambiza ŵanthu ŵenaŵa. Tiwonga ukongwa vitumbiku vakutuliya kwaku Yehova.”

Pasonu panu, apharazgi 133,170 wo ateŵete ku Peru awonga ukongwa chifukwa cha ntchitu yakupharazga yo yinguchitika vyaka 75 vajumpha. Mbiri ya Akaboni aku Yehova ku Peru mbukaboni wa vo Yehova wakulayizga pa Yesaya 60:22 kuti: “Mumana ukongwa wazamuja ŵanthu 1,000 ndipu mumana wazamuja mtundu wanthazi.”