Pa nkhumanu iyi, paja asambizi, ŵanthu wo apanga marangu, akufufuza ndipuso akaswiri akutuliya mu vyaru 12. Chaka chinu, nkhumanu iyi yinguchitika kuziya pa vidiyokonferensi kwambiya pa 21 February mpaka pa 20 March 2021. Dr. Ricardo Ma. Nolasco wa pa Yunivesite yinyaki ku Philippines Diliman, mweniyo so wenga cheyamani pa nkhumanu iyi, wangudana abali akumiya ofesi ya nthambi ku Philippines kuti nawu aŵepu. Pa 9 March 2021, Mubali Elnathan Lee ndi Mubali Israel Aves, wo agwira ntchitu yakufwatuliya angukamba fundu zawu pa nkhani ya vo Akaboni aku Yehova achita pa ntchitu yakufwatuliya. Pa nkhumanu iyi penga ŵanthu 320.

Malinga ndi vo Dr. Ricardo Ma. Nolasco wangukamba, kafukufuku yo wanguchitika ku Philippines, wangulongo kuti kupatuwaku mabuku ngaku sukulu, Bayibolu ndi buku lo liŵerengeka ndi ŵanthu anandi ukongwa. Mwaviyo, pa nkhumanu iyi penga chigaŵa chinyaki cha mutu wakuti: “Kufwatuliya Bayibolu mu Vineneru va ku Philippines” ndipu chigaŵa chenichi chingukambika ndi abali akumiya ofesi ya nthambi.

Nkhani yo Mubali Aves wangukamba yenga ya mutu wakuti: “Kumbi Ndauneneska, Ndambula Kusuzga Kuŵerenga, pamwenga Vosi Viŵi? Vineneru Vakupambanapambana Ndipuso Masuzgu ngo Ngaŵapu Pakufwatuliya Bayibolu.” Iyu wangukonkhoska kuti wo akufwatuliya Bayibolu la Charu Chifya la Malemba Ngakupaturika, (NWT) anguwonesesa kuti lafwatulika mwauneneska kweniso kuti ndambula kusuzga kuŵerenga. Mubali Aves wangukambiya ŵanthu wo ŵengapu pa nkhumanu iyi kuti: “Pakuti chilatu chikulu cha Akaboni aku Yehova nkhusambiza ŵanthu Bayibolu, yiwu atesesa kuti Bayibolu la Charu Chifya la Malemba Ngakupaturika, lisanirikengi chinanga ndi mu vineneru vo vikambika ndi ŵanthu amanavi. Bayibolu ili lisanirika pa intaneti pamwenga mungalonde lakuchita kusindikizika, kutuwa kwa Akaboni aku Yehova muchigaŵa chinu. Venivi vingakuwovyani kuti muziŵi ntchitu yo akufwatuliya aja nayu pakuwonesesa kuti afwatuliya Mazu ngaku Chiuta mwauneneska kweniso mwambula kusuzga kuŵerenga.”

Mubali Lee wangukamba nkhani yaki ya mutu wakuti: “Kuwunganisa Ŵanthu a Mitundu Yosi ndi Vineneru Vosi: Ntchitu Yakufwatuliya mu Vineneru Vosi yo Akaboni aku Yehova Agwira.” Mu nkhani iyi, Mubali Lee wangukambamu ntchitu yikulu yakufwatuliya yo Akaboni aku Yehova agwira pacharu chosi. Iyu wangukamba kuti pe abali ndi azichi akujumpha 6,000 wo agwira ntchitu yakufwatuliya kweniso abali ndi azichi anyaki wo atovya pa ntchitu iyi. Mubali Lee wangukonkhoska so mo ntchitu yidu yakufwatuliya yingwambiya cha mu ma 1890 kufika sonu ndipuso mo ntchitu iyi yakuliya pasonu panu. Iyu wangukamba so kuti webusayiti ya jw.org, ndi webusayiti yo ye ndi vineneru vinandi ukongwa pacharu chosi. Ndipu kufika mu November 2019, pa webusayiti iyi penga vineneru vakukwana 1,000.

Mubali Lee wangumaliza nkhani yaki mwakukamba kuti: “Wo afwatuliya mabuku nga Akaboni aku Yehova awona kuti ntchitu yo agwira njakukhumbika ukongwa ku ŵanthu wosi ndipu chilatu chawu ntchakuti afwatuliyi vinthu vakuvwika umampha, vakusambiza ndipuso vakuchiska, vo ŵanthu wosi wo aŵerenga angakondwa navu.”

Tiwona kuti ndi mwaŵi ukulu kukambiyaku ŵanthu va ntchitu yakufwatuliya yo tigwira. Wenuwu mbukaboni wakuti pasonu panu uthenga wamampha upharazgika ukongwa “ku mtundu wewosi, fuku lelosi ndipuso lilimi lelosi” kuphara kali.—Chivumbuzi 14:6.