Pa January 7, 2020, ku Puerto Rico kunguchitika chidilirisi chikulu ukongwa ndipu pavuli paki kunguchitika so vidilirisi vinyaki vimanavimana. Pa January 11, mlenji, kunguchitika so chidilirisi chinyaki chikulu pa chilwa ichi.

Ŵanthu anandi wo aja muchigaŵa cho chikukwaskika ukongwa ndi chidilirisi ichi aja kwambula magesi ndipu anyaki akusama mu nyumba zawu kopa kuti kungachitika so chinyaki. Lipoti lakutuwa ku ofesi ya nthambi ya ku United States lingukamba kuti palivi mubali pamwenga mzichi weyosi yo wakupwetekeka pamwenga kufwa ndi chidilirisi ichi. Kweni abali ndi azichi pafufupi 248 akusama mu nyumba zawu. Nyumba 8 za apharazgi zikunangikiya limu, penipo 70 zikunangika waka. Ndipu Nyumba za Ufumu 10 nazu zikunangika. Abali a mu Komiti Yakovya pa Masoka kweniso akuwonere madera apereka chovyu chauzimu ndipuso chakuliŵavu kwaku wo akukwaskika ndi chidilirisi ichi.

Chinanga kuti abali ŵidu akumana ndi suzgu iyi, kweni alutirizga kusopa Yehova. Mubali Robert Hendriks, yo wateŵete mu Dipatimenti Yakuwona Vakupharazga Nkhani ku ofesi ya nthambi ya ku United States wangukamba kuti: “Kunu ku Puerto Rico, kuchitika vidilirisi bwekabweka cha. Mwaviyo vidilirisi ivi vachitiska kuti abali ndi azichi afipengi mtima. Kweni tikondwa ukongwa kuwona kuti yiwu awere vuli cha. Yiwu atesesa kuchita vo angafiska kuti alutirizgi kuwungana kweniso kupharazga chinanga kuti ko aja kulivi magesi kweniso maji. Ŵara agwira ntchitu mwaphamphu kuwovya ndipuso kuchiska wo akhumbika chovyu.”

Tichiskika ukongwa kuwona kuti abali awonga chakurya chauzimu cho alonde chenicho chitiŵawovya kukunthiyapu masoka ngachilengedu ngo akumana nangu. Tipempha kuti Yehova walutirizgi kuŵapaska chimangu cha mu mtima.—Masalimo 119:165.