Kwa vyaka 17, abali ŵidu aja achikambiskana nkhani za mu Bayibolu ndi akayidi wo ŵe kujeri ya Jilava Bucharest ku Romania. Mulili wa COVID-19 wati wayamba, anguleka kukumana nawu masu ndi masu. Kweni kwati kwaja masabata ngaŵi kuti Mwambu wakukumbukiya nyifwa yaku Yesu uchitiki pa 27 March 2021, asilikali a kujeri lenili anguzomereza kuti abali angayamba so kukambiskana ndi akayidi kuziya pa vidiyokonferensi. Abali ŵidu angupempha kuti asani vingachitika nkhani ya Chikumbusu yikambiki kuziya pa vidiyokonferensi. Yiwu anguzomereza. Ndipu akayidi 21 ndipuso arara anayi a kujeri ili angusanilikapu pa Chikumbusu.

Mubali Corneliu Cepan ndiyu wangukamba nkhani ya Chikumbusu muchineneru cha Chiromani. Mubali Angelos Karamplias wafwatuliyanga nkhani yeniyi mu Chigiriki chifukwa cha akayidi anyaki wo alongoro Chigiriki. Anayi mwa ŵanthu wo awonere jeri lenili kusazgiyapu wachiŵi kwa mura wawu, nawu anguwonere pulogilamu yeniyi.

Mubali Cepan wangukamba kuti: “Ndinguwona kuti ndi mwaŵi ukulu ukongwa kukamba nkhani ya Chikumbusu. Akayidi anguvwisiya umamphaumampha ndipuso kuŵanaŵaniya sembi yikulu ukongwa yo Yesu wakupereka chifukwa chaku yiwu.”

Mubali Karamplias wangukamba kuti: “Te akukondwa ukongwa kuti Yehova wakujula nthowa kuti tipharazgiyi akayidi kweniso kuchita nawu mwambu wa Chakurya Chamazulu cha Ambuya. Tigomezga kuti munthazi akayidi anandi azamuzomera kukambiskana nawu nkhani za mu Bayibolu kuti azichiskiki ndi Malemba.”

Te akukondwa kuti arara a jeri anguŵapaska mwaŵi akayidi wakuti avwisiyi nkhani ya Chikumbusu.—1 Timote 2:3, 4.