SEPTEMBER 20, 2023
ROMANIA
Kupatuliya Malu Ngakuchitiyapu Unganu Kweniso Nyumba zo Zasazgikiyaku pa Ofesi ya Nthambi ku Romania
Pa 26 August 2023, Mubali Gage Fleegle, wa mu Wupu Wakulongozga, wangupatuliya Malu Ngakuchitiyapu Unganu ngo nge ku Turda ku Romania, kweniso nyumba zasonu zitatu zo akusazgiyaku ku ofesi ya nthambi ya ku Bucharest ku Romania. Ŵanthu wo anguvwisiya nkhani iyi pa Malu Ngakuchitiyapu Unganu ŵengapu 1,702, ndipu wo anguvwisiya pa vidiyokoniferensi angukwana 14,101.
Pa unganu uwu, ŵanthu anguvwisiya so lipoti lakukwaskana ndi mbiri ya ntchitu yakuzenga ku Romania kweniso mo Yehova wangutumbikiya abali ŵidu chifukwa cha phamphu lawu. Abali ndi azichi wo achitanga uteŵeti wakuzenga mu malu ngakupambanapambana nawu angufumbika. Unganu uwu wati wamala, Mzichi Iaela Drăghici, yo wanguwovyaku ntchitu ya kuzenga Malu nga Unganu ku Turda wangukamba kuti: “Ndikondwa ukongwa kuwona kuti nyumba zenizi zaperekeka kwaku Yehova ndi chilatu chakuti zimukankhuski.” Mubali Bruce Dyer, yo wagwira ntchitu ya kuzenga pa charu chosi, nayu wangugwiraku ntchitu yakusazgiyaku ofesi ya nthambi ndipu wangukamba kuti: “Tiwonga ukongwa mwaŵi ukulu wenuwu wo tenga nawu wakugwiraku ntchitu ya kuzenga malu yanga. Titimuwonga ukongwa Yehova chifukwa cha wezi waki ukulu!”
Abali ndi azichi pafupifupi 1,702 avwisiya pulogilamu yakupatuliya Malu nga Unganu nga ku Turda
Nyumba zasonu zo zazengeka pa ofesi ya nthambi, ze ndi malu ngakusambiriyamu Sukulu ya Apharazgi a Ufumu kweniso nyumba ya kugona ŵanthu wo aja pa Beteli. Kweniso ze ndi maofesi ngakufwatuliyaku, Nyumba ya Ufumu kweniso malu ngakufikiyapu alendu. Malu ngasonu nga Unganu ngo ngakuzengeka ngagwiriskikiyengi ntchitu ndi ŵanthu pafupifupi 15, 000 akutuliya muvigaŵa vakupambanapambana ndipu panyengu yimoza mukati mungasere ŵanthu 1,200 ndipu kubwalu kungaja ŵanthu 1,350.
Gulu la ŵanthu akukwana 23,968 awungana pamoza mu sitediyamu ya mu tawuni ya Cluj Arena ku Cluj-Napoca, ku Romania, pa zuŵa la pulogilamu yapade. Chithuzi: Abali ndi azichi asoske muchanya chipepala cho pe mazu nga muchineneru cha Chiromaniya ngakuti “Titikuyanjani!”
Pa zuŵa lachiŵi la pulogilamu iyi, pa 27 August, kwenga pulogilamu yapade yo yinguchitikiya mu sitediyamu ya mu tawuni ya Cluj-Napoca. Ndipu ŵanthu akukwana 23,968 anguwungana mu sitediyamu yeniyi. Ndipu pulogilamu yeniyi yingufwatulikiya mu chingelezi, Chihungariya, Chineneru Chamanja cha ku Romania, Chiromaniya (Romania), Chiromane (Russia), Chineneru Chamanja cha ku Russia, ndipuso Chiromane (Ukraine) ndipu abali ndi azichi mumipingu yosi ya ku Russia kweniso ku Ukraine anguvwisiya pulogilamu yeniyi. Ŵanthu wosi wo anguvwisiya pulogilamu iyi angukwana, 121,411.
Tikondwa nawu limoza abali ndi azichi ŵidu ku Romania kuti sonu malu yanga ngaperekeka kwaku Yehova ndipu ngalutirizgengi kulutisa panthazi kusopa kwa uneneska.—Yesaya 2:3.
