Mu June 2020, kunguwa chivuwa chikulu ndipu maji ngangusapaliya ku chigaŵa cha Rodna ku Transylvania, mucharu cha Romania. Venivi vinguchitiska kuti nyumba 6 za abali ŵidu zinangiki. Pa June 27, 2020, wakuwonere dera ku Rodna, wanguwovyana ndi abali ŵara mumipingu ndipu angupempha abali ndi azichi 25 amumipingu yitatu yapafupi kuti apereki chovyu. * Meya wa ku Rodna, wanguwona vo abali ŵidu achitanga wanguŵawonga pa TV.

Chigaŵa cha Rodna che pa chidika ndipuso che ndi misinji yinandi. Maji ngakusapaliya ngangupangisa kuti vimaulambwi kweniso viswaswa vijali msewu. Venivi vinguchitiska kuti kuŵengi kwasuzga kuluta mutawuni. Nyumba ya mzichi munyaki yenga muchigaŵa cho meya ndi ŵanthu ŵaki angusuzgika kutuzga vimaulambwi ndi viswaswa. Abali ŵidu ŵati ŵaza, anguwovyaku kutuzga vimaulambwi ku chigaŵa chenichi kuti akanozgi nyumba ya mzichi yoyingunangika. Ntchitu yeniyi yinguwovya so ŵanthu wo aja muchigaŵa chenichi.

Pavuli paki, meya wanguthamika abali ŵidu pa nyengu yo amufumbanga mafumbu pa TV. Iyu wangukamba kuti: “Ndikhumba kukambiyani chakuwoniyapu chakukondwesa ukongwa cho chandifika pa mtima. . . . Pa zuŵa lakwamba tingugwiriskiya ntchitu vimagalimotu vikuluvikulu viŵi kuti timalizi kutuzgapu viswaswa kweni tinguyimaliza cha ntchitu iyi, chifukwa chigaŵa chosi chingunangika ukongwa. Mawa laki kwati kwacha Akaboni aku Yehova akujumpha 30 angujipereka kugwiraku ntchitu yeniyi. Ndipu kufika mazulu tinguyimaliza.” Iyu wangukamba so kuti: “Ŵanthu ŵenaŵa angutiwovya kutowesa chigaŵa chenichi. Nditiŵawonga ukongwa wosi!”

Meya wangutumiza so uthenga pa webusayiti yidu yakunkhoska vo abali ŵidu anguchita. Iyu wangukamba kuti: “Yehova wanthazi zosi wakutumbikeni ukongwa ndipu wakupaseni umoyu utali, liŵavu lanthazi ndipuso wakupaskeni vinthu vinandi vamampha munthazi!”

Vinthu venivi vo vinguchitika ku Romania ntchakuwoniyapu chinyaki cho chilongo mo nkharu yidu yamampha yikankhuskiya Awusefwi akuchanya Yehova.—1 Peturo 2:12.