Khoti la Industrial District Court of Kursk liperekengi cheruzgu pa mulandu wa Mubali Andrey Andreyev, Mubali Artem Bagratyan ndi muwolu waki Alevtina ndipuso Mubali Andrey Ryshkov. *

Andrey Andreyev

• Chaka cho Wakuwiya: 1976 (Ku Kursk)

• Mo Wakukuliya: Wakutolana ndi Svetlana mu 1999 ndipu ŵe ndi ŵana ŵaŵi. Wangwamba kuliyanja Bayibolu wati wasambira vakukwaskana ndi kufiskika kwa mauchimi nga mu Bayibolu. Wakubatizika mu 2002

Alevtina Bagratyan

• Chaka cho Wakuwiya: 1977 (Ku Kursk)

• Mo Wakukuliya: Weche mwana wayanjanga vakujambulajambula. Wangwamba kusambira Bayibolu weche munamana. Wakubatizika mu 1997. Wakutolana ndi Artem mu 2012. Wagwiranga ntchitu yakunozga ŵanthu sisi uku walera anyina

Artem Bagratyan

• Chaka cho Wakuwiya: 1972 (Ku Abovyan, Armenia)

• Mo Wakukuliya: Wangusama ku Armenia kuluta ku Russia. Wangukumana ndi Alevtina ku Kursk. Banja ili litanja kuwona chilengedu. Wakubatizika mu 2000

Andrey Ryshkov

• Chaka cho Wakuwiya: 1987 (Kursk)

• Mo Wakukuliya: Awisi akutayika iyu weche munamana. Weche munamana kanandi wajanga ndi ambuyaki panyengu iyi anyina agwiranga ntchitu ziŵi. Wangwamba kuliyanja Bayibolu wati wasaniya kwamuka kwa mafumbu ngo ngangumusuzga kwa nyengu yitali. Wakubatizika mu 2011. Wakutolana ndi Marina mu 2016. Wagwiranga ntchitu yakunozga nyumba

Pa 16 October 2019, apolisi a gulu la Federal Security Service (FSB) anguchifufuza nyumba zinandi za Akaboni aku Yehova ku Kursk ndipu anandi angufumbika mafumbu. Venivi vinguchitiska kuti Mubali Andrey Andreyev ndipuso banja la Mubali Bagratyan amangiki. Ndipu pa 21 January 2020, apolisi angumanga Mubali Ryshkov. Pa 17 December 2020, Mzichi Alevtina Bagratyan wangutuzgika mujeri, wati wajamu kwa myezi 13 kulindizgiya mulandu waki. Ndipu pasonu panu wagwira ukayidi wa panyumba. Abali atatu ŵeche mujeri kulindizgiya mulandu wawu.

Mubali Artem Bagratyan wasuzgika ndi matenda nga shuga. Alevtina wakumbuka nyengu yo iyu ndi mulumu ŵenga mujeri kweni mumalu ngakupambana. Iyu wangukamba kuti: “Kwa nyengu yitali, ndaziŵanga cha vo mulumu wangu wachitanga asani matenda ngaki ngamuyukiya. Ndamusoŵa ukongwa.”

Alevtina wangukamba kuti pa nyengu yo wenga mujeri wangulutirizga kuja ndi chigomezgu kuti Yehova wamuphweriyengi kweniso waphweriyengi abali anyaki wosi. Iyu wangukamba kuti: “Nyengu zosi [Yehova] wandipaskanga nthazi. Ndiziŵa kuti iyu walutirizgengi kuchita venivi. Nditimukayikiya cha.”

Tigomezga kuti Yehova walutirizgengi kuja malu nkhakukho kwa abali ŵidu atatu kweniso mzichi widu pa nyengu yakusuzga iyi.—Nthanthi 18:10.