Pa 3 September 2020, khoti la mutawuni ya Novozybkov lo le muchigaŵa cha Bryansk likuyeruzga kuti Mubali Vladimir Khokhlov, Mzichi Tatyana Shamsheva, Mzichi Olga Silaeva, kweniso Mubali Eduard Zhinzhikov mbakunanga. Nyengu yo aŵakambiya kuti akaje mujeri yitambiya pa chaka chimoza, mpaka chaka chimoza ndi myezi yitatu. Kweni yiwu atuzgika mujeri chifukwa chakuti akujamu kali pa nyengu yo alindizganga kuti mulandu wawu uyeruzgiki.

Vladimir Khokhlov

• Chaka cho Wakuwiya: 1977 (Ku Novozybkov muchigaŵa cha Bryansk)

• Mo Wakukuliya: Wagwira ntchitu ya umakanika. Ndipu wechendaje Kaboni waku Yehova, wenga msilikali. Watanja bola, kuŵerenga, kuŵeja, ndipuso kumba gitala

• Mubwezi waki wangumuchiska kuti wasambirengi Bayibolu. Wanguto Olga mu 2007. Ŵe ndi mwana munthukazi, zina laki Anastasia. Banja lenili liteŵete limoza Yehova

Tatyana Shamsheva

• Chaka cho Wakuwiya: 1977 (Ku Cherepovets muchigaŵa cha Vologda)

• Mo Wakukuliya: Ndi kaswiri wakuwona mo chuma chitende. Kwa vyaka vinandi waja wachisambiza ŵanthu mo chuma chitende, marangu ndipuso kuŵerengese ndalama. Wakubatizika mu 1995. Wakondwa ukongwa kukambiyaku ŵanthu anyaki ulongozgi wazeru wo usanirika mu Bayibolu

Olga Silaeva

• Chaka cho Wakuwiya: 1988 (Ku Davydovo, muchigaŵa cha Moscow)

• Mo Wakukuliya: Iyu ndiyu mwana ukongwa pa ŵana atatu. Wakumaliza masambiru ngaki kusukulu yakusambiza ntchitu zamanja ndipu we ndi digiri ya kupanga ndi kunozga vinthu. Watanja vakusonasona. Watanja so kuŵerenga ndi kutchaya volleyball. Iyu wanguyezga anyina ndipu wangwamba kusambira Bayibolu kweniso kugomezga fundu zaki.

Eduard Zhinzhikov

• Chaka cho Wakuwiya: 1971 (Ku Zadnya, muchigaŵa cha Bryansk)

• Mo Wakukuliya: Wakugwirapu ntchitu yakuwotchere vinthu ndipuso yakunozga munyumba. Wakugwiraku ntchitu ku mpolisi. Wenga mugulu la ŵanthu akumba ndipu mu 1993 wangutolana ndi Tatyana yo ambiyanga limoza. Watanja kulemba ndakatulu kweniso kumba gitala

• Chechendafiki chaka cha 2000, iyu wangwamba kusambira Bayibolu ndipu wangusaniya kwamuka kwa mafumbu nganandi ngo wenga nangu. Kwamuka kwenuku kunguchitiska kuti wasinthi mijalidu yiheni yo wenga nayu ndipuso kunguwovya kuti banja laki liyendengi umampha. Venivi vingumukondwesa ukongwa Tatyana. Pavuli paki, nayu wanguja Kaboni

Pa 11 June 2019, apolisi angufufuza nyumba 22 za Akaboni muchigaŵa cha Bryansk ku Russia. Mzichi Tatyana Shamsheva ndi Olga Silaeva angumangika. Weyosi wanguja mujeri mazuŵa 245. Yiwu angutuzgika mu May 2020 ndipu anguwere kuzinyumba zawu, kuchilindizga cheruzgu.

Pa 16 October, 2019, apolisi angwamba kumba mulandu Mubali Vladimir Khokhlov ndi Eduard Zhinzhikov. Pavuli paki mulandu wawu anguwusazga pamoza ndi mulandu wa Mzichi Shamsheva ndi Silaeva. Pati pajumpha mazuŵa 7, abali anguŵaŵika mujeri ndipu ŵeche kweniko mpaka sonu.

Azichi anguŵafumba mafumbu mu Lipoti Lanambala 5 la Wupu Wakulongozga la 2020. Mzichi Silaeva wangukamba kuti myezi 8 yo wenga kujeri yingumuwovya kuziŵa kuti “kwali masuzgu ngakuwi wuli, nyengu zosi Yehova watitipaska mzimu wakupaturika kuti utiwovyi kupunda mayeseru nga mtundu wewosi.” Mzichi Shamsheva wangukamba kuti: “Nyengu zosi Yehova waja nasi pafupi, ndipu walutirizgengi kutivikiliya, kutichiska kweniso kutiwovya.”

Te ndi chigomezgu kuti Yehova walutirizgengi kovya abali ndi azichi ŵidu wo angaŵikika mujeri pamwenga wo ŵe mujeri kali ku Russia kuti akunthiyepu mayeseru mwalikondwa ndipuso mwachimangu.—1 Akorinto 10:13.