Pambula kuswera yapa, Khoti la Industrial lo le mu Chigaŵa cha Smolensk liperekengi cheruzgu chaki pa mulandu wa Mubali Yevgeniy Deshko, Ruslan Korolyov ndi Valeriy Shalev. * Loya wa boma wakupempha kuti Mubali Yevgeniy ndi Ruslan akaje mujeri kwa vyaka 9 ndipu Mubali Valeriy wakaje vyaka 8. Mubali Viktor Malkov, yo nayu wenga pa mundandanda wenuwu, wakutayika khoti lechendapereki cheruzgu chaki.

Yevgeniy Deshko

• Chaka cho Wakuwiya: 1989 (Ku Sochi)

• Mo Wakukuliya: Wagwiranga ntchitu yakupanga ŵanthu masaji, yakwendesa galimotu ndipuso ya vamagesi. Wakulereka ndi apapi wo Mbakaboni. Wati wavwisa fundu za mu Bayibolu, wangukana kusere usilikali. Iyu wakubatizika mu 2012. Kutuwa mu chaka chenichi mpaka mu 2014, wangupaskika ntchitu yinyaki yakuti wagwirengi mumalu mwakusere usilikali ndipu wagwiranga kuchipatala

Ruslan Korolyov

• Chaka cho Wakuwiya: 1982 (Ku Smolensk)

• Mo Wakukuliya: Weche wachinyamata, wayanjanga kusambira mo wanganozge vipangizu va mazuŵa nganu. Pavuli paki, wanguja makanika. Pakwamba wagwiranga ntchitu ya usilikali ku Russia. Wangwamba kusambira Bayibolu ndi Akaboni aku Yehova ndipu wangusaniya fundu zakupembuzga za mu Bayibolu. Wakubatizika mu 2004

Viktor Malkov

• Chaka cho Wakuwiya: 1959 (Ku Smolensk)

• Mo Wakukuliya: Wagwiranga ntchitu ya umakanika, ukalipentala ndipuso ya kukhoma nyumba. Wakutorana ndi Vera mu 1992. Weche wachinyamata wayanjanga kutchaya bola la malundi. Waphweriyanga mku waki yo ngwachibulumutiya.

  Waziŵikanga kuti wenga munthu wachiwawa ukongwa ndipu chifukwa cha venivi wanguchija mujeri kwa vyaka 7 ndipu wanguja kamanavi kumalisa nthengwa yaki. Wati wasambira Bayibolu ndi Akaboni aku Yehova, wangwamba kuchita vinthu mwachimangu, kuvwiya marangu nga boma ndipuso kuja munthulumi wamampha. Wangubatizika mu 2008. Wakutayika pa 25 April 2020

Valeriy Shalev

• Chaka cho Wakuwiya: 1977 (Ku Yartsevo)

• Mo Wakukuliya: Weche wachinyamata wangusambira Chingelezi. Wangumaliza masambiru ngaki nga usilikali pa sukulu yinyaki. Wangusamiya ku chigaŵa cha Far East of Russia kuchigwira ntchitu yakuŵerengese ndalama za asilikali. Wati waleka ntchitu ya usilikali, wagwiranga ntchitu nge mlangizi pa nkhani za ndalama. Mu 1999, wangutorana ndi Svetlana, yo wangukumana nayu ku koleji ndipu waleranga mwana munthulumi wamusaniyapu yo wenga ndi vyaka vinayi. Iyu wayanjanga kutchaya bola la malundi kweniso kutchimbiya

  Anyina angwamba kusambira Bayibolu ndi Akaboni aku Yehova ndipu amukambiyanga vo asambira. Iyu wanguyesesa kususka kuti vo anyina asambiranga venga vauneneska cha, kweni pakumaliya paki wanguziŵa kuti venga nadi vauneneska. Wangubatizika mu 2002

Abali ndi azichi ku Smolensk angwamba kutombozgeka Khoti Likulu Ukongwa ku Russia, lechendakanizi ntchitu ya Akaboni aku Yehova mu 2017. Pa 18 December 2016, apolisi 15 angutimbanyizga maunganu ngidu pa Nyumba ya Ufumu ku Smolensk. Pa maunganu, ngenanga penga abali ndi azichi pafufupi 60. Pa nyengu yo apolisi ŵenaŵa afufuzanga, yiwu anguŵikiyamu dala mabuku ndi kupusikiziya kuti “asaniya” mabuku ngo boma la Russia likamba kuti “ngakofya.”

Ivi vati vachitika, mu 2018 ndi 2019 apolisi angulutirizga kufufuza nyumba za abali ndi azichi ŵidu anyaki, kuŵamanga ndipuso kuŵaŵika mujeri. Pa 25 April 2019, apolisi yaŵa angufufuza nyumba zinandi za abali ndipuso angumanga Mubali Ruslan Korolyov, Valeriy Shalev ndi Viktor Malkov. Viktor wangufumba apolisi ŵenaŵa kuti: “Ndinguja mujeri kwa vyaka 7 chifukwa chakuchita ndewu, kweni sonu nde Kaboni waku Yehova. Kumbi mukhumba kundimanga chifukwa chakuti . . . ndipharazga uthenga wamampha?”

Mubali Yevgeniy Deshko wangumangika ndi kuŵikika mujeri pati pajumpha mazuŵa ngamanavi kutuliya po abali anyaki angumangikiya. Yevgeniy wangukamba kuti: “Chifukwa chakuti ndaziŵanga kuti nani ndingamangika, ndingujinozgekeresa maŵanaŵanu.” Iyu walutirizga kuchiskika ndi mazu ngo Yehova wangukambiya Yoswa ngakuti: “Uje ndi chiganga kweniso uje ndi nthazi. Ungachitanga mantha cha pamwenga kopa, chifukwa Yehova Chiuta waku we nawi kwekosi ko ungaluta.” (Yoswa 1:9) Yevgeniy wangukamba kuti: “Mu vesi ili, Yehova watitikambiya kuti tije ndi chiganga ndipu watitisimikiziya kuti watiwovyengi.”

Pa nyengu yo Ruslan wenga mujeri, waŵanaŵaniyanga mazu ngaku Yesu nga pa Mateyu 6:34. Mumalu mwakufipa mtima ndi vo vingamuchitikiya, Ruslan wanguti: “Ndatangwanikanga ukongwa ndi kulemba makalata, kuŵerenga Bayibolu kweniso kukambiyaku akayidi anyangu uneneska wa mu Bayibolu. Ndipu ndaŵangavi nyengu yakujaliya wachitima.”

Mu March 2020, wakufufuza mu gulu la FSB (Federal Security Service) zina laki G. P. Bezrukov, wangutuzgaku vinthu vinyaki vo abali anayi yaŵa angukanizika kuchita ndipu anguleka kuchita ukayidi wa panyumba. Yiwu anguja mujeri pafufupi chaka chimoza kweniso kuchita ukayidi wa panyumba. Kusintha kwenuku kunguchitika chifukwa cha kugomezgeka kwa abali ŵidu kweniso kuvwiya vo arara a boma aŵakambiyanga pa nyengu yo ŵenga mujeri. Wakufufuza mwenuyu wenga ndi chigomezgu kuti asani abali yaŵa angapaskika wanangwa, vitimbanyizgengi cha ntchitu yaki yakufufuza kweniso kuti abali yaŵa azamusuzga cha asani angazifumbika so mafumbu.

Chakupaska chitima ntchakuti, Viktor wakutayika pati pajumpha waka nyengu yimanavi kutuliya po anguŵafwatuliya pa ukayidi wa panyumba. Ŵanthu anandi akamba kuti umoyu wakusuzga wa mujeri kweniso kusuzgika maŵanaŵanu chifukwa cha mulandu wo amumbanga, ndivu vikuchitiska kuti Viktor wafwi liŵi.

Ruslan, Valeriy ndi Yevgeniy atesesa kulondo chakuwoniyapu chaku Viktor ndi abali anyaki anandi wo angulutirizga kuja akugomezgeka mpaka nyifwa. Kuja pa ubwezi wakukho ndi Yehova kwaŵawovya kuti alutirizgi kuzizipizga kweniso kuja alikondwa.

Valeriy wangukamba kuti: “Chifukwa chakuti ndenga mujeri, ndajiwonanga kuti nde pa ubwezi wakukho ukongwa ndi Yehova. Yaka kenga kakwamba kuja nayu pa ubwezi waviyo. Nyengu zosi ndiŵerenga Bayibolu. Mujeri ndi malu ngamampha cha, kweni ŵanthu afiska kuja mwenimo kwambula chovyu chaku Yehova. Sonu kwewuli asani Yehova watitiwovya, ndikuti tingafiska kukunthiyapu.”

Yevgeniy wanguti pasonu panu iyu wagomezga nadi kuti Yehova watitiwovya. Iyu wangukamba kuti: “Ndigomezga kuti Awusefwi atitiwovya, ukongwa asani takumana ndi mayeseru ngakujumpha msinkhu widu. Mwakuti pasonu panu ndifipa mtima ukongwa cha ndi mayeseru ngo ndingakumana nangu.”

Mwemosi mo khoti lingaziyeruzgiya, Yevgeniy wangukamba kuti: “Ndilutirizgengi kuja wakugomezgeka kuti ndifiski kukunthiyapu mayeseru ngosi ngenanga.”

Ndi chovyu chaku Yehova, tiziŵa kuti abali ŵenaŵa kweniso mabanja ngawu, alutirizgengi kukunthiyapu mwalikondwa mayeseru ngenanga.—2 Atesalonika 3:5.