Khoti la muchigaŵa cha Volgograd Traktorozavodsky, pambula kuswera yapa liperekengi cheruzgu chaki pa mulandu wa Mubali Sergey Melnik, Valeriy Rogozin, ndi Igor Yegozaryan. * Loya yo wamiya boma pa milandu wechendakambi cheruzgu cho wakhumba kuti ŵanthu ŵenaŵa alonde.

Sergey Melnik

• Chaka cho Wakuwiya: 1972 (Ku Volgograd, muchigaŵa Volgograd)

• Mo Wakukuliya: Wakumaliza masambiru ngaki ngakunozga magalimotu pa sukulu yinyaki. Pasonu panu, wagwira ntchitu yakukhoma nyumba. Wakutolana ndi Anna mu 1993. Ŵe ndi ŵana anthulumi atatu. Banja ili litanja kukwera mapiri kweniso kuwona chilengedu

  Anna ndiyu wangwamba kusambira Bayibolu ndi Akaboni aku Yehova. Sergey wati wawona kuti Anna wasintha vinthu vinyaki pa umoyu waki, nayu wangwamba so kusambira Bayibolu. Iyu wangubatizika mu 1999

Valeriy Rogozin

• Chaka cho Wakuwiya: 1962 (Ku Krasnokamsk, muchigaŵa cha Perm)

• Mo Wakukuliya: Kwa vyaka 12 wagwiranga ntchitu yakwendesa ndegi ya asilikali wechendapumuwi kweniso wechendayambi kugwira ntchitu nge injiniya. Wakutolana ndi Marina mu 1984. Ŵe ndi ŵana anthulumi ŵaŵi

  Wangwamba kusambira Bayibolu kukwambiriya kwa vyaka va mu ma 1990. Wangubatizika mu 1998

Igor Yegozaryan

• Chaka cho Wakuwiya: 1965 (Ku Volgograd, muchigaŵa cha Volgograd)

• Mo Wakukuliya: Wagwiranga ntchitu yakusona sapatu kweniso yakunozga vinthu vamagesi. Watanja sumu kwambiya waka pa unamana waki. Watumba gitala. Wakutolana ndi Yevgeniya mu 2002. Ŵe ndi mwana munthulumi yumoza

  Anyina ndiwu angwamba kumusambiza uthenga wamampha wa Ufumu waku Chiuta. Wangukhorwa ndi fundu zauneneska zo zisanirika mu Bayibolu. Wangubatizika mu 1992

Pa 16 May  2019, apolisi kweniso ŵaraŵara a gulu la Federal Security Service (FSB) angufufuza nyumba 7 muchigaŵa cha Volgograd ku Russia. Pati pajumpha mazuŵa ngaŵi, wakweruzga mulandu mu khoti la muchigaŵa cha pakati ku Volgograd wanguyeruzga kuti Mubali Melnik, Mubali Rogozin, ndipuso Mubali Yegozaryan akaŵajaliyi dankha mujeri achilindiziya mulandu wawu. Wosi atatu anguŵakambiya kuti akajemu kwa myezi 7.

Chinanga kuti abali atatu yaŵa ŵe limoza so ndi mabanja ngawu, kweni akumana mbwenu ndi masuzgu po alindiziya cheruzgu cha khoti. Mwakuyeruzgiyapu, Mubali Valeriy akumuŵika pa mundandanda wa ŵanthu wo wupu wa Federal Financial Monitoring Service of the Russian Federation utiŵawonere. Valeriy wangukamba kuti “Akundijaliya ma akawunti ngangu ngosi ngaku banki, ndipu akundikaniza kugwiriskiya ntchitu foni ndipuso intaneti. Ntchitu yikundimaliya chifukwa ndikhumbika kugwiriskiya ntchitu vinthu venivo angundikaniza.” Iyu ndi muwolu waki agwiriskiya waka ntchitu ndalama zawu za penshoni kuti asaniyengi vinthu vakukhumbika pa umoyu. Yiwu aja umoyu wambula kukhumba vinandi.

Mubali Sergey ndi Mubali Igor nawu asuzgika kusaniya ntchitu chifukwa cha vo khoti likuŵakaniza. Sergey wawona kuti kuluta kaŵikaŵi ku khoti kutimbanyizga ndondomeku yaki yakugwiriya ntchitu. Iyu wakamba kuti: “Ndigwira ntchitu yakukhoma nyumba, kweni chifukwa chakuti ndikhumbika kulutanga kukhoti pafupipafupi ndikhoma waka nyumba zimanazimana zo ndingafiska kumaliza pa kanyengu ko ndenaku ndechendaluti so kukhoti.”

Mubali Igor watama ndipu wakhumbika kulutanga kuchipatala pafupipafupi. Iyu wakamba kuti: “Chifukwa cha vo khoti likukamba, mphakusuzga kuti ndisaniyi ntchitu.” Chinanga kuti watama kweniso wasuzgika kusaniya ndalama, iyu wangukamba: “Yehova watitumbika ukongwa chifukwa watipasa abali ndi azichi anandi ndipu akutijowopu tija cha pa nyengu yosi yakusuzga iyi.”

Vakuwoneke limu kuti abali ŵidu ndipuso mabanja ngawu asuzgika kusaniya vinthu vakukhumbika chifukwa cha vo khoti likuŵakaniza kuchita. Kweni te ndi chigomezgu kuti abali ndi azichi ŵidu wosi ku Russia alutirizgengi kuja akugomezgeka po ateseka, chifukwa aziŵa kuti Yehova walutirizgengi kuŵapaska vo akhumbika.—Mateyu 6:33.