Pambula kuswera yapa, Khoti la Sovetskiy lo le ku Lipetsk liperekengi cheruzgu chaki pa mulandu wa Mubali Viktor Bachurin, Aleksandr Kostrov ndi Artur Netreba. *

Viktor Bachurin

• Chaka cho Wakuwiya: 1962 (ku Pavlovsky Posad, Muchigaŵa cha Moscow)

• Mo Wakukuliya: Wakuto ndipu we ndi ŵana ŵaŵi ndi mzuku yumoza munthukazi. Wangwamba kusambira Bayibolu ndi Akaboni aku Yehova cha mu ma 1990 ndipu wangubatizika mu 1992. Pasonu panu, iyu yija ndiyu Kaboni mu banja laki

Aleksandr Kostrov

• Chaka cho Wakuwiya: 1961 (ku Sortavala, Republic of Karelia)

• Mo Wakukuliya: Wakugwirapu ntchitu yakwendesa ndegi, kuwotchere visulu ndipuso ya vamagesi. Wakutorana ndi Larisa mu 1997. Ŵe ndi ŵana ŵaŵi. Pasonu panu wakuleka ntchitu ndipu watanja kuŵeja. Wakubatizika mu 2002 wati wawona kuti wakondwa ukongwa pa umoyu waki asani wagwiriskiya ntchitu fundu za mu Bayibolu

Artur Netreba

• Chaka cho Wakuwiya: 1978 (ku Glodeni, Moldova)

• Mo Wakukuliya: Wakutorana ndi Svetlana mu 1995 ndipu ŵe ndi mwana munthukazi yumoza. Banja ili likusamiya ku Lipetsk kuti likapenji ntchitu. Wagwira nthitu nge manejala pakampani yinyaki yakugulisa vinthu. Iyu wangukhorwa ndi fundu yakuti kugwiriskiya ntchitu fundu za mu Bayibolu kutovya kuti munthu waje ndi umoyu wamampha. Wakubatizika mu 2000

Pa 2 December 2019, arara a boma Muchigaŵa cha Lipetsk angufufuza nyumba 7. Mubali Viktor Bachurin, Aleksandr Kostrov, ndi Artur Netreba angumangika. Gulu la apolisi la FSB (Federal Security Service) anguŵamba mulandu abali yaŵa wakuti achita vinthu “vakuswa marangu” chifukwa chakuchita maunganu ndipuso kuchita vinthu vinyaki vakukwaskana ndi kusopa. Abali yaŵa anguŵaŵika mujeri kulindizgiya mulandu wawu ndipu angujamu kwa mazuŵa 331.

Aleksandr wanguwona kuti ubwezi waki ndi Yehova ungukho ukongwa pa nyengu yo wenga mujeri. Iyu wangukamba kuti: “Pa nyengu yakusuzga nge iyi, ndipu uziŵa kuti chovyu chikulu chituliya kwaku Yehova.”

Artur wangukokhoska vo wangusimikiza mtima kuchita. Iyu wanguti: “Ndikhumbisiska kuti ndileki kutaya likondwa langu kweniso kuti ndiwonengi vinthu munthowa yakwenere. Nditesesa kujikumbusa kuti vosi vo ndikumana navu vakanyengu kamanavi kweni Ada ŵangu andipembuzgengi. Peposi po ndasaniya waka mpata, ndiwona kuti ndi mwaŵi wangu kupharazga vakukwaskana ndi Chiuta widu wakupaturika, Yehova.”

Viktor wangukamba kuti: “Yehova wangulongo kuti ndi mubwezi wangu wapamtima panyengu yo ndakhumbikanga kukunthiyapu mayeseru ngakupambanapambana. Nyengu zosi ndawonanga kuti Yehova watindiyanja ukongwa.”

Viktor watiŵawonga ukongwa abali ndi azichi wosi wo anguwovya muwolu waki yo ndikaboni cha panyengu yo iyu wangumangika. Viktor wangukamba kuti: “Muwolu wangu wangukondwa ukongwa ndi mo azichi anyaki angumuwovye. Ndigomezga kuti ŵanthu a mubanja langu angujiwone ŵija mo ŵanthu aku Yehova atanjiyana.”

Tiziŵa kuti Yehova walutirizgengi kupembuzga abali ŵidu wosi ku Russia ndipuso ku vyaru vinyaki ko abali ndi azichi atombozgeka.—Yesaya 51:12.