Pambula kuswera yapa, khoti la Naberezhnye Chelny ku Republic of Tatarstan liperekengi cheruzgu chaki pa mulandu wa Mubali Ilkham Karimov, Konstantin Matrashov, Vladimir Myakushin ndi Aydar Yulmetyev. a

Ilkham Karimov

• Chaka cho Wakuwiya: 1981 (Ku Jomboy, Uzbekistan)

• Mo Wakukuliya: Wakusambira ntchitu yakupanga vinthu vamagilasi. Wagwiranga ntchitu zakupambanapambana kuti wawovyengi banja laki ku Uzbekistan. Wangusamiya ku Russia mu 2000. Zuŵa linyaki mu 2001, wangupemphera kwaku Chiuta kuti wamuwovyi. Ndipu zuŵa lakulondopu wangukumana ndi Akaboni aku Yehova ndikwamba kusambira Bayibolu. Wakubatizika mu 2004. Wakutorana ndi Yulia mu 2012

Konstantin Matrashov

• Chaka cho Wakuwiya: 1988 (Ku Prokopyevsk)

• Mo Wakukuliya: Awisi akutayika iyu weche munamana. Wagwira ntchitu ya umekaniki. Watovya anyina wo anguja Kaboni waku Yehova pa nyengu yo iyu wenga ndi vyaka 8. Wangwamba kuyanja uthenga wachilindizga wo we mu Bayibolu. Wakubatizika mu 2018

Vladimir Myakushin

• Chaka cho Wakuwiya: 1987 (Ku Nizhnekamsk)

• Mo Wakukuliya: Wakumaliza masambiru ngaki pa koleji yinyaki ndipuso wakusambira va uyinjiniya. Wagwiranga ntchitu yauyinjiniya pakampani yakunozga vipangizu vamagesi. Wawona kuti zeru zo zisanirika mu Bayibolu zakuzirwa ukongwa ndipuso zauneneska. Wakubatizika mu 2013. Wakutorana ndi Svetlana mu 2017

Aydar Yulmetyev

• Chaka cho Wakuwiya: 1993 (Nizhnekamsk)

• Mo Wakukuliya: Wakusambira kumba sumu kweniso umekaniki. Wachita bizinesi ndipuso wagwira ntchitu ya umekaniki. Wangwamba kusambira Bayibolu wati wawona mo fundu za mu Bayibolu zinguwovye apapi ŵaki. Wakubatizika mu 2012. Wakutorana ndi Albina mu 2013. Wakukana kusere usilikali chifukwa cha njuŵi yaki yakusambizika Bayibolu. Mumalu mwaki wangusankha kugwira ntchitu zinyaki

Pa 27 May 2018, arara aboma ku Tatarstan angufufuza nyumba 10 za Akaboni aku Yehova ndipu angumanga Mubali Ilkham, Konstantin, Vladimir, ndi Aydar kuchiŵajaliya mujeri. Abali yaŵa anguja mujeri kwa mazuŵa ngakujumpha 160 ŵechendaŵayeruzgi kuti akachiti ukayidi wa panyumba.

Chinanga kuti sonu achita ukayidi wa panyumba cha, kweni akuŵaŵika pa mundandanda wa ŵanthu wo boma la Russia likamba kuti achita “vinthu vakofya” ndipu khoti litiŵakaniza kuti atuwi muchigaŵa cho aja. Venivi vikuchitiska kuti ma akaunti ngawu ngaku banki aŵajaliyi ndipuso mphakusuzga kuti asaniyi ntchitu.

Pakukumbuka mo vinthu venge pa nyengu wenga mujeri, Aydar wangukamba kuti: “Ndakumbukanga mavesi nganandi ukongwa nga mu Bayibolu. . . . Yehova wangundiwovya kukumbuka vinthu vinandi vo pakundija ndatingi ndifiskengi cha.”

Konstantin wati wasere mujeri kakwamba, wenga ndi mantha ukongwa. Kweni mwaliŵi wanguleka kuchita mantha ndipu wangwamba kuŵika maŵanaŵanu ngaki mo wangagwiriskiya ntchitu nyengu yeniyi kuti wapharazgiyi ŵaraŵara akhoti, akuwonere jeri, akayidi, apolisi ndipuso ŵanthu anyaki. Iyu wangukamba kuti: “Pa nyengu yo ndenga mujeri, ndenga ndi mwaŵi ukulu ukongwa wakupharazga kuphara po ndenga ndechendamangiki. Vo vingundichitikiya viyanana waka ndi vo wakutumika Paulo wangulemba pa Afilipi 1:12, 13 kuti: ‘Sonu ndikhumba kuti yimwi abali muziŵi kuti vo vandichitikiya vawovya kuti uthenga wamampha uluti panthazi, mwakuti kumangika kwangu chifukwa chaku Khristu, kwaziŵika umampha pakati pa asilikali wosi wo avikiliya fumu kweniso ŵanthu anyaki wosi.’”

Vladimir wanguŵawonga ukongwa abali ndi azichi wo angumuwovya. Iyu wangukamba kuti: “Muwolu wangu wangundikambiya kuti abali ndi azichi kanandi amupaskanga ndalama kuti wandiguliyi vinthu ndi kunditumiziya. Kujeri aŵika mphaka ya unandi wa vinthu vo munthu wangalonde pa mwezi ndipu kanandi, ini ndajumphisanga mphaka yeniyi.”

Ilkham wangukonkhoska mo ubwezi waki ndi Yehova wajaliya wakukho. Iyu wangukamba kuti: “Chiyesu chenichi, chandiwovya kuja paubwezi wakukho ndi Ada ŵangu akuchanya. Ndipu nditiŵagomezga kweniso kuŵathemba ukongwa. Mapempheru ngangu kwaku Yehova ngaja ngatali, ngakuvwika umampha ndipuso ngatuliya pasi pa mtima.”

Tiziŵa kuti Yehova watumbikengi abali yaŵa limoza ndi mabanja ngawu chifukwa cha ‘kujipereka kwawu kwaku Chiuta kweniso kuchita vinthu ndi mtima wosi’ pa nyengu ya mayeseru.—1 Timote 2:2.