JANUARY 20, 2022
RUSSIA

Abali ndi Azichi a Mutawuni ya Karpinsk, Athemba Yehova Kuti aje ndi Chivwanu Chakukho

JULANI

Pambula kuswera yapa, khoti la mutawuni ya Karpinsk ku Sverdlovsk liperekengi cheruzgu pa mulandu wa Mzichi Darya Dulova, Venera Dulova, Mubali Aleksandr Prianikov ndi muwolu waki Anastasiya Prianikova ndipuso Mzichi Svetlana Zalyaeva. Loya wa boma wechendakambi cheruzgu cho wakhumba kuti ŵanthu yaŵa apaskiki

Nyengu yo Khoti Liyeruzgiyengi Mulandu

Pa 27 January 2020

Pa mulandu wawu wakwamba khoti linguyeruzga kuti Aleksandr, Darya ndi Venera mbakunanga
Mu February 2020

Mulandu wachiŵi wakukwaskana ndi Aleksandr, Darya, ndi Venera ungwamba
Pa 30 March 2020

Arara angufufuza munyumba za abali ŵenaŵa ndipu angulonda vipangizu vakugwiriskiya ntchitu magesi
Pa 19 May 2020

Anastasiya ndi Svetlana anguŵasazga pa mulandu wenuwu. Wosi ŵaŵi anguŵakaniza kuti angatuwangamu cha mucharu chawu
Pa 29 April 2021

Mulandu wakukwaskana ndi ŵanthu yaŵa ungwamba

Vakukwaskana ndi Ŵanthu Yaŵa

Venera Dulova

Chaka cho Wakuwiya: 1968 (Karpinsk, Muchigaŵa cha Sverdlovsk)

Mo Wakukuliya: Wakulereka ndi anyina kweniso ambuyaki anthukazi. Watanja kuluka, kuŵerenga ndipuso kusambira. Anyina kweniso ambuyaki anthukazi akutayika iyu wechendakwanisi vyaka 17. Wakuyirwa mu 1990. We ndi ŵana atatu

Wajifumbanga kuti ntchifukwa wuli ŵanthu atufwa ndipuso kuti vinthu viŵayendiyengi wuli ŵana ŵaki munthazi. Wangwamba kusambira Bayibolu ndi Akaboni aku Yehova we ndi vyaka 28. Wakubatizika mu 1998

Vo Venera Wangumuka Wati Wafumbika

Kumbi Yehova wangukuwovyani wuli pa nyengu yakusuzga yeniyi?

Ŵanthu a mubanja langu wo pakwamba atisuskanga ndi mulumu wangu sonu alongo kuti atitiŵanaŵaniya ukongwa. Mulumu wangu watindichiska kuti ndingaweriyanga vuli cha. . . . Yehova watitiwovya so kuziya mu mazu ngakuchiska ngo abali ndi azichi mu mpingu atitikambiya.

Apolisi ŵati afufuza munyumba yangu, chinthu chakwamba cho ndinguŵanaŵana chenga chakuti: ‘Ndimbika mulandu nge chigeŵenga. Vingachitika cha! Venga vakofya ukongwa!’ Kweni mubwezi wangu wangundikambiya kuti ndiŵanaŵanengi kuti ‘Nani ndipundengi nge mo Yesu wanguchitiya.’

Aleksandr Prianikov

Chaka cho Wakuwiya: 1987 (Udinsk, Muchigaŵa cha Khabarovsk)

Mo Wakukuliya: Watanja sumu. Wambisa kodiyoni. Wagwiranga ntchitu kufakitali yakupanga magesi. Pa sonu panu wagwira ntchitu yakupanga matayilosi

Nyengu zosi wagomezganga kuti Chiuta waliku. Wangukwaskika ukongwa ndi malayizgu ngaku Chiuta ngakuti ŵanthu azamukufwa so cha. Wakubatizika mu 2004. Wakutorana ndi Anastasiya mu 2011

Vo Aleksandr Wangumuka Wati Wafumbika

Kumbi abali ndi azichi akuchiskani wuli munyengu yakusuzga iyi?

Mubali munyaki wangutiwovya kuŵanaŵaniya lemba la Salimo 139:1. Iyu wangukamba kuti: “Yehova watikuyanjani ukongwa ndichu chifukwa chaki iyu waziŵa vosi vo muŵanaŵana, mo muvwiya, vo mukamba ndipuso kuchita. . . . Fumu Davidi waziŵanga kuti Yehova waphwere weyosi waku isi. . . . Yehova wawona vosi vo vititichitikiya ndipuso mo tilili. Tingajiwonanga kuti te tija cha.” Mazu yanga ngangundichiska ukongwa. Zuŵa lelosi nditijivwa kuti Yehova watindiwovya.

Anastasiya Prianikova

Chaka cho Wakuwiya: 1987 (Karpinsk, Muchigaŵa cha Sverdlovsk)

Mo Wakukuliya: Iyu ndi mzichi waki mura akuleleka ndi anyinawu. Watanja kumba sumu ndipuso kusona

Wangukondwa ukongwa ndi layizgu nga mu Bayibolu ngakuti kunthazi kwazamukuŵa chimangu chikulu. Iyu wanguziŵa kuti mu Bayibolu mwe fundu zamampha kweniso ulongozgi wazeru. Wakubatizika mu 2002. Wakutorana ndi Aleksandr mu 2011

Vo Anastasiya Wangumuka Wati Wafumbika

Kumbi ubwezi winu ndi Yehova wakho wuli munyengu yakusuzga iyi?

Kwa vyaka pafufupi vitatu vo aja achindimba mulandu, chivwanu changu chakho ukongwa. Nditimugomezga ukongwa Yehova. Ndivwisa nadi kuti nyengu zosi Yehova waphwere ŵanthu ŵaki. Nyengu zinyaki vingawoneka nge kuti tingafiska cha kukunthiyapu kweni iyu watitiwovya kuti tikunthiyepu. Ndawona so kuti asani nditombozgeka ukongwa ndipu ndikhumbika so kuchita vinandi pakuteŵete Yehova.

Po abali ndi azichi ŵidu ku Russia alutirizga kutombozgeka, chivwanu chidu chikho ukongwa asani tiwona mo Yehova watiŵayanjiya kweniso kuŵavikiliya. Kuyeseka kwa chivwanu chawu mbukaboni wakuti ‘athamika, akankhuska kweniso apaska ulemu” zina laku Yehova.—1 Peturo 1:7.

NKHANI