AUGUST 26, 2021
RUSSIA

Ada a Ŵana Ŵaŵi Atiŵawofyeza kuti Ajengi Mujeri kwa Vyaka 15 Chifukwa cha Chivwanu Chawu

JULANI

Nyengu yo Khoti Liyeruzgiyengi Mulandu

Pambula kuswera yapa, Khoti la Uray lo le mutawuni ya Khanty-Mansi muchigaŵa cha Autonomous—Yugra, liperekengi cheruzgu pa mulandu wa Mubali Andrey Sazonov. * Iyu angamuyeruzga kuti wakaje mujeri kwa vyaka 15
Pa 22 June 2020

Mulandu wa mubali Andrey ungwamba
Pa 22 August 2019

Wangutuzgika pa ukayidi wapanyumba ndipu angumukaniza kutuwa mucharu chaki kuluta kucharu chinyaki kweniso khoti lingumukaniza kuchita vinthu vinyaki
Pa 26 February 2019

Angumuyeruzga so kuti wakachitengi ukayidi wapanyumba
Pa 6 February 2019

Angumuŵika mukachipinda kakulindizgiya ndipu pati pajumpha mazuŵa ngaŵi, ŵati afufuza mugalimotu yaki kweniso ku ntchitu kwaki angumuŵika mujeri kulindizgiya mulandu waki
Pa 31 January 2019

Amumbanga mulandu wakuti “wanozga kweniso kuchita vinthu vakukwaskana ndi gulu lo boma litilikamba kuti ndakofya”

Vakukwaskana ndi Munthu Uyu

Andrey Sazonov

Chaka cho Wakuwiya: 1980 (Moscow)

Mo Wakukuliya: Wagwira ntchitu nge wakuwonere pa kampani yinyaki. Wakutorana ndi Viktoria, msambizi wa Chingelezi, mu 2002. Ŵe ndi mwana munthukazi yumoza, Irina ndi munthulumi yumoza, Vyacheslav

Wangwamba kusambira Bayibolu ndi Akaboni aku Yehova cha mu ma 1990 ndipu wakubatizika mu 1997

Vo Andrey Wangumuka Wati Wafumbika

Kumbi ndi suzgu yikulu ukongwa niyi yo mukumana nayu?

Suzgu yikulu ukongwa nkhusiyana ndi ŵanthu wo nditiŵayanja ndipuso kuziŵa kuti palivi cho ndingachita kuti ndiŵawovyi. Ndafipanga mtima ukongwa asani ndiŵanaŵaniya mo ŵanthu a mubanja langu angachitiya kuti akunthiyepu. Ndafipiyanga mtima so abali ndi azichi wo nawu nyumba zawu zikufufuzika.

Ntchinthu wuli cho chingukuwovyani kuwona vinthu mwakwenere pa nyengu yo mwenga mujeri kulindizgiya mulandu winu?

Ndinguziŵa kuti ndini cha ndingayendesa vinthu mujeri. Nyengu zinyaki, ndaziŵanga cha vo vichitikengi. Angandijuliya chisasa cha mujeri ndikundilutisa kwekosi. Ndakhumbikanga kusambira kuchita vinthu mwakwenere asani venivi vandichitikiya. Ndati ndayamba kutombozgeka, ndingukumbuka lemba la Aroma 12:21, lo likamba kuti: “Mungazomerezanga cha kuti chiheni chikuthereskeni, kweni lutirizgani kuthereska chiheni mwakuchita chamampha.” Ndawona mo fundu ya pa lemba lenili yandiwovye mu vinthu vinandi pa umoyu wangu. So ndingusankha kuti kwali andichitiyi vinthu va mtundu wuli ndazamuchita vinthu mwakwenere. Ndayesesanga kuchitiya weyosi lisungu ndipuso kuchita vinthu mwaulemu. Ndayesesanga kuleka kukwiyiya wo atindimba mulandu. Vakukondwesa kuwona mo ŵanthu asinthiya asani awona kuti utiŵachitiya vinthu mwalisungu chinanga kuti yiwu akhazanga kuti uŵakwiyiyengi. Venivi vitindikondwesa ukongwa!

Banja langu lechendakumani ndi chiyesu chenichi, ndinguloŵeza sumu ziŵi, yakuti “Sindidzasiya” ndi yakuti “Ndiwovyeni Kuja ndi Chiganga” Sumu zenizi zitindichiska ukongwa. Po ndenga mujeri, ndambanga sumu zenizi mwakuwerezawereza. Venivi vingundiwovya kweniso kundipaska nthazi zakuti ndikunthiyepu.

Kumbi anyinu mungaŵapaska ulongozgi wuli wa mo angagwiriskiya ntchitu nyengu yawu pakunozgeke kutombozgeka?

Chitani vosi vo mungafiska kuti muje paubwezi ndi Yehova kweche sonu ndipu jiperekeni ndi mtima wosi pakugwira ntchitu yaku Yehova pasonu panu. . . . Asani mumaliya nyengu yinu pakuchita vinthu vo vikondwesa Yehova, muŵengi ndi nyengu yimana yakuŵanaŵaniya vinthu vakutimbanyizga chivwanu chinu.

Tiwonga chakuwoniyapu chamampha cha abali ndi azichi ŵidu ku Russia po alutirizga kutombozgeka. Tigomezga kuti Yehova walutirizgengi kuŵapaska “chiganga kweniso nthazi.”—Salimo 138:3.

^ Ndi nyengu zosi cha po akambiya limu nyengu yo khoti liyeruzgiyengi mulandu.

NKHANI