Khoti la Spassk lo le Muchigaŵa cha Primorsky, pambula kuswera yapa liyeruzgengi mulandu wa Mubali Dmitriy Malevaniy ndi Aleksey Trofimov ndipuso Mzichi Olga Opaleva ndi Olga Panyuta. * Loya wa boma wachendakambi cheruzgu cho wakhumba kuti abali ndi azichi yaŵa apaskiki.

Dmitriy Malevaniy

• Chaka cho Wakuwiya: 1990 (ku Spassk-Dalny)

• Mo Wakukuliya: Wasambizanga ŵanthu kupanga mapulogilamu ngapa kompyuta. Muwolu waki Ulyana wagwira ntchitu yakujambulajambula. Wangwamba kusambira Bayibolu ndi Akaboni aku Yehova weche wachinyamata. Wangusimikiza kuti Bayibolu ndakugomezgeka ndipu asani munthu wagwiriskiya ntchitu fundu za mu Bayibolu vingamuwovya kuja ndi umoyu wamampha. Dmitriy wakubatizika mu 2004

Olga Opaleva

• Chaka cho Wakuwiya: 1952 (ku Spassk-Dalny)

• Mo Wakukuliya: Wangwamba kugomezga Chiuta weche wachinyamata, kweni waliyanja cha Bayibolu. Mwana waki munthukazi wa vyaka 22 wati watayika waka, iyu wangukumana ndi Akaboni aku Yehova. Wangukondwa ukongwa wati waziŵa vo Bayibolu lisambiza vakukwaskana ndi chiyuka. Chivwanu chaki chati chakuwa, wangwamba kukambiyaku anyaki vakukwaskana ndi chilindizga. Wakubatizika mu 1995. Kwamba pa unamana waki watanja kuvwisiya sumu kweniso kumba. Watanja ukongwa sumu za Ufumu

Olga Panyuta

• Chaka cho Wakuwiya: 1959 (ku Nizhny Novgorod)

• Mo Wakukuliya: Wechendaleki ntchitu, wenga msambizi pa sukulu yinyaki ya mkaka ndipuso wagwiranga ntchitu zinyaki. Wakutorana ndi Vladimir mu 1982. Ŵe ndi ŵana atatu, ŵaŵi mbanthukazi ndipu yumoza ndi munthulumi. Olga wangwamba kusambira Bayibolu ndi Akaboni aku Yehova ndipu wangukondwa ndi vo wangusambira. Wakubatizika mu 1996

Aleksey Trofimov

• Chaka cho Wakuwiya: 1959 (ku Mamakan, Muchigaŵa cha Irkutsk)

• Mo Wakukuliya: Pa nyengu yo wenga ku koleji ku Vladivostok, ndipu wangukumana ndi muwolu waki Tamara. Yiwu ŵe ndi ŵana anayi ndi azuku. Wagwiranga ntchitu yakunozga maloku ndipu pambula kuswera yapa wawoneriyanga chipinda cho muja machini ngo ngatotcha ukongwa. Wangusankha kuteŵete Yehova cha mu ma 1990, wati wasambira waka kuti Mazu ngaku Chiuta ngatitisambiza mo tingajaliya ndi umoyu wamampha. Wakubatizika mu 1996

Pa 25 November 2018, apolisi angusere ndikufufuza munyumba za Akaboni aku Yehova anayi mutawuni ya Spassk-Dalny. Apolisi angubang’anthuwa chisasa cha nyumba yaku Olga Opaleva ndi sowu ya magesi. Apolisi ŵati asere munyumba, angumufumba kuti ntchifukwa wuli wanguleka kujula chisasa. Iyu wanguŵamuka vambula kuvwika umampha. Apolisi ŵati aziŵa kuti Olga wachita sitiroku, angudanisa ambulasi kuti amutole kuchipatala. Pa zuŵa lenili, apolisi angumuto kuchipatala ndikuluta nayu kupolisi kuti akamufumbi mafumbu. Ndipu chifukwa cha sitiroku, janja ndipuso lundi vakumazge vigwira ntchitu viŵi cha. Mwana waki munthulumi, Mubali Vitaliy Ilinykh, yo watimuphwere, nayu atimumba mulandu unyaki.

Abali ndi azichi wosi anayi ŵenaŵa anguŵajaliya mujeri kwa mazuŵa ngaŵi. Pa 27 November 2018, yiwu anguŵayeruzga kuti akachitengi ukayidi wa panyumba. Pati pajumpha chaka, anguŵatuzgiyaku vinyaki mwa vinthu vo anguŵakanizga.

Yiwu atiŵamba mulandu wakuti achita vinthu vakukwaskana ndi gulu lo boma likamba kuti ndakofya.

Mabwezi ndipuso mabanja ngawu kusazgapu wo Mbakaboni cha, akamba kuti avwisa cha kuti ntchifukwa wuli ŵanthu achimangu atiŵalanga chifukwa cha chivwanu chawu. Pa mulandu waku Dmitriy, chinanga mbanyaki wo agwira nayu ntchitu, wo mbakaboni cha atimuwovya kweniso kumuchiska kuti wangaweriyanga vuli cha.

Dmitriy walutirizga kuja wakukondwa chinanga kuti watombozgeka ndipu wagomezga kuti wenuwu mbukaboni wakulongo kuti Yehova we nayu. Iyu wangukamba kuti: “Nge mo ndodu yaku Mozesi yingulongore kuti Yehova wenga nayu, ndimu so viliri ndi ini. Likondwa lo nde nalu mbukaboni wakuti Yehova watindiwovya.” Dmitriy wangukamba so kuti likondwa lo wenalu “mbukaboni wanthazi ku ŵanthu wosi wo agwira ntchitu mu khoti ndipuso ku wo afufuza.”

Olga Opaleva wangukamba kuti: “Asani ndiwona mo ndikunthiyapu mayeseru, ndiziŵa kuti Yehova ndiyu watindiwovya nyengu zosi. Ndikwamba kumuthemba Yehova pa chechosi, chinanga mpha vinthu vimanavimana ndipu nditesesa kumuponye mphingu yangu.”

Aleksey wangukonkhoska vo vingumuwovya pa nyengu yo wenga mujeri kulindizgiya mulandu waki ndipuso pa nyengu yo wachitanga ukayidi wa panyumba. Iyu wangukamba kuti: “[Yehova] wangundiwovya kuti ndije ndi nthazi. Ndingwamba kuvwa viyo po ndenga mujeri kulindizgiya mulandu. Ndingupempha Yehova kuti wandipaski chiganga. Nyengu yeniyo, malundi ndi manja ngangu nganguleka kunjekeme ndipuso ndinguleka kumbwambwanthiya. Ndingusankha kuchita vo ndingafiska kuti ndiziŵiliyi umoyu wakuja mujeri.”

Olga Panyuta wangukamba kuti: “Titenere kuja akugomezgeka kwaku Yehova kuti zina laki likankhuskiki. Mwaviyo, tikhumbika kuthemba Yehova, kumuteŵete ndipuso kuchita vosi vo tingafiska pakuchita khumbu laki kweniso kuja paubwezi wakukho ndi iyu.”

Po abali ndi azichi ŵidu alindizga kuti khoti lipereki cheruzgu, titiŵapemphere kuti alutirizgi kumuthemba ukongwa Yehova yo ndi “Jalawi” lawu kuti waŵapaski nthazi zakuti akunthiyepu.—Dotoronome 32:4.