OCTOBER 21, 2021
RUSSIA

Akondwa Chinanga Kuti Aja Mujeri Ndipuso pa Ukayidi Wapanyumba kwa Nyengu Yitali ku Russia

JULANI

Nyengu yo Khoti Liyeruzgiyengi Mulandu

Pambula kuswera yapa, khoti la Trusovskiy lo le muchigaŵa cha Astrakhan liperekengi cheruzgu chaki pa mulandu wa Mubali Rustam Diarov, Mubali Yevgeniy Ivanov ndi muwolu waki Olga ndipuso Mubali Sergey Klikunov. Loya waboma wechendakambi cheruzgu cho wakhumba kuti abali yaŵa ndi mzichi apaskiki
Pa 11 June 2020

Rustam, Yevgeniy, ndi Sergey anguŵaŵika mujeri kulindizgiya mulandu wawu. Olga angumuyeruzga kuti wakachitengi ukayidi wapanyumba
Pa 9 June 2020

Apolisi akujumpha 100 angufufuza munyumba 27 za Akaboni aku Yehova mutawuni ya Astrakhan. Rustam, Yevgeniy, Olga, ndi Sergey wosi anguŵaŵika mujeri kulindizgiya mulandu wawu
Pa 8 June, 2020

Mulandu waku Rustam, Yevgeniy, Olga ndi Serge ungwamba. Abali yaŵa anguŵasaniya ndi mulandu wakuti anozga vinthu vakofya ndipuso apereka ndalama ku gulu lo lichita vinthu vakofya. Olga angumusaniya ndi mulandu wakuti wachitaku vinthu vakofya

Vakukwaskana ndi Ŵanthu Yaŵa

Olga Ivanova

Chaka cho Wakuwiya: 1982 (Volzhsky, Muchigaŵa cha Volgograd)

Mo Wakukuliya: Wakusambira kumba kodiyoni weche mwana. Wakusambira vakukwaskana ndi vineneru ndipu wagwira ntchitu nge msambizi wa Chingelezi

Weche mwana, wawopanga nyifwa. Pa nyengu yo Olga wenga wachinyamata, anyina angukumana ndi Akaboni aku Yehova ndipu anyina ndiwu angumusambiza Bayibolu. Wakubatizika mu 1997

Vo Olga Wangumuka Wati Wafumbika

Ntchinthu wuli cho chitikuwovyani kumalana ndi vakuguŵiska po mwe limoza cha ndi alumu ŵinu?

Chakuwoniyapu chaku Yehova ndi Yesu chitindiwovya kukunthiyapu masuzgu. Yehova wangulekana ndi mubwezi waki Yesu, kwa vyaka 33 ndi hafu chifukwa cha ŵanthu wosi kusazgapu ini. Mulumu wangu ndi bwezi langu la pamtima ndipu ndamusoŵa ukongwa. Kweni tisiyanengi kwa nyengu yitali cha nge mo [Yehova ndi Yesu anguchitiya]. Ndisimikiza kuti ndi chovyu chaku Yehova tifiskengi kukunthiyapu masuzgu ngosi.

Sergey Klikunov

Chaka cho Wakuwiya: 1975 (Astrakhan)

Mo Wakukuliya: Wagwiranga ntchitu yakuwotchere visulu wechendaje mujeri kulindizgiya mulandu waki. Iyu ndi muwolu waki Irina, angwamba kusambira Bayibolu nyengu yakuyanana. Fundu za mu Bayibolu zingumuwovya kuleka kukweŵa foja. Wakubatizika mu 2007. Ŵe ndi ŵana ŵaŵi anthukazi. Watanja kuŵeja ndipuso kumba gitala

Vo Sergey Wangumuka Wati Wafumbika

Ntchithu wuli cho chakuwovyani kuti mulutirizgi kuja akugomezgeka pa nyengu yo mwenga mujeri?

Kutuliya waka po ndinguselere mujeri, ndingwamba kuwonga ukongwa mwaŵi wa pempheru. Pempheru ndakukhumbika ukongwa kwaku ini pasonu panu. Ndaja mujeri mwakundija kwa myezi 6 sonu. Chenga chipusu cha kuchita viyo, kweni pempheru litindiwovya kuti ndikunthiyengepu masuzgu ngengosi. Asani vinthu vinyaki vandisuzga ukongwa, ndajikamanga ndikukambiya Ada ŵidu chechosi cho chenga mu mtima mwangu. Pakumaliya ndajivwanga kuti ndipembuzgika kweniso nde ndi chimangu mu mtima ndipu ndavwanga umampha. Vakuziziswa kuwona mo Ada ŵidu atitiwovye asani tipenja chovyu. Nditimugomezga ukongwa Yehova, mwaviyo ndichitengi mantha cha.

Vakuchiska ukongwa kuziŵa kuti nyengu zosi Yehova waja pafupi ndi ateŵeti ŵaki akugomezgeka pa nyengu ya masuzgu.—Salimo 139:5, 10.

NKHANI