Pambula kuswera yapa, khoti la mutawuni ya Surgut lo le muchigaŵa cha Khanty-Mansi Autonomous—Yugra liperekengi cheruzgu pa mulandu wa abali 17 ndi mzichi yumoza. Anyaki mwa abali ŵenaŵa ndi Mubali Vasiliy Burenesku, Viktor Fefilov, Igor Kobotov, Igor Petrov, Leonid Rysikov, Igor Trifonov ndi Mubali Pavel Romashov ndipuso muwolu waki Mzichi Viola Shepel. a Loya waboma wechendakambi cheruzgu cho wakhumba kuti abali yaŵa ndi mzichi widu apaskiki.

1. Pa 15 February 2019

   Apolisi angufufuza munyumba zinandi za Akaboni aku Yehova ku Surgut ndipuso ku matawuni nganyaki ngapafupi. Abali 7 angukamba kuti angutombozgeka ukongwa pa nyengu yo apolisi aŵafumbanga mafumbu. Abali atatu anguŵikika mujeri kulindizgiya milandu yawu ndipu mubali munyaki angumukambiya kuti waluti kuchipatala cha ŵanthu akuzunguliya mutu kuti akamupaski chovyu chakuchipatala

2. Pa 3 October 2019

   Viktor, Igor Kobotov, Igor Petrov, Leonid, Igor Trifonov, Pavel ndi Viola anguŵasazga pa mundandanda wa ŵanthu wo achita vinthu vakofya

3. Pa 10 October 2019

   Vasiliy nayu so angumusazga pa mundandanda wa ŵanthu wo achita vinthu vakofya

4. Pa 23 July 2020

   Apolisi angufufuza kachiŵi munyumba yaku Igor Petrov ndipu anguto vinthu vaki

5. Pa 29 October 2021

   Milandu yawu yingwamba

Tigomezga kuti chinanga kuti abali ndi azichi ŵidu akumana ndi ‘masuzgu, maurwirwi, kutombozgeka pamwenga vakofya’ kweni ‘athereskengi nadi’ masuzgu ngenanga chifukwa cha chanju kweniso chovyu chakutuliya kwaku Yehova.—Aroma 8:35, 37.