Pa 23 March 2020, mu Chigaŵa cha Khabarovsk ku Russia, apolisi a boma wo aziŵika kuti Federal Security Services (FSB) angunanga vinthu mwaphuzu ukongwa munyumba ya Mubali Igor Avramenko. Venivi vinguchitika pati pajumpha mazuŵa 6 kutuliya po iyu wangutayikiya. Apolisi wo afufuzanga, angupinga chikalata chakuŵazomereza kufufuza munyumba cho chenga ndi zina la Mubali Avramenko, kweni yiwu anguphanga kompyuta, kamera kweniso vinthu vinyaki vinandi vo venga vaku Yelena, muwolu wa mubali mwenuyu.

Ndi mulenji pa zuŵa lenili, apolisi anguluta kuntchitu kwa Mzichi Avramenko kuti akamuto ndi kuluta nayu kunyumba kwaki. Ŵati afika kunyumba, Stanislav Grebenkin yo walongozganga apolisi wo anguza kuzifufuza, wangulongo mzichi uyu chikalata chakufufuziya. Mzichi Avramenko wangukambiya a Grebenkin kuti mulumu wawu wakutayika. A Grebenkin wangukambiya Mzichi Avramenko kuti yiwu aziŵanga venivi kweni afufuzengi mbwenu munyumba yo, chifukwa boma lingupereka chikalata chakufufuziya munyumba yawu Mubali Avramenko wechendafwi.

Yo wafufuzanga wangukambiya Mzichi Avramenko kuti apolisi afufuzengi vinandi cha munyumba yawu. Iyu wangukamba kuti akhumbika kufufuza “kuti akajali fayelu ya mulandu ndi kuyipereka ku [FSB] ko asungiya vinthu.” Kweni mumalu mwaki, yiwu angwamba kunanga vinthu munyumba ya mzichi uyu.

Muchigaŵa cha Khabarovsk Akaboni aku Yehova 10 atiŵamba mulandu wakuti ndi vigeŵenga. Chinanga kuti ŵaraŵara aboma atesesa kuti agongowesi abali ŵidu akugomezgeka ku Russia, kweni tiziŵa kuti abali ŵidu ‘ajengi anthazi kwambula kopa chechosi ndipuso ajengi ndi chivwanu’ mwaku Yehova.—Yesaya 30:15.