Pa 4 October 2021, Apolisi a Russian OMON a angupuma Mubali ndi Mzichi Anatoly ndi Greta Razdobarov kweniso Mubali ndi Mzichi Nikolay ndi Liliya Merinov. Venivi vinguchitika pa nyengu yo apolisi angufufuza nyumba 12 za Akaboni aku Yehova mutawuni ya Irkutsk. Apolisi angujaliya abali anyaki anandi mujeri pa nyengu yo afufuzanga.

Cha mu ma 6:00 mulenji, apolisi angusere munyumba ya mubali Anatoly ndi Greta. Apolisi anguluta ndi Greta mu chipinda chinyaki uku atimuguza sisi laki, angumumanga manja ngaki kuvuli ndi kumupuma mwakuwerezawereza.

Pati pajumpha nyengu yimanavi, Anatoly angumuwisiya pasi, ndikumumanga manja ngaki kuvuli ndipu angumudyaka kumutu ndi palufu. Apolisi angumuko manja ngo angumumanga kuvuli ndikumunyamuliya muchanya. Anatoly wavwanga kuŵaŵa ukongwa chifukwa sikelu ya liŵavu laki yachitiskanga kuti mapewa ngaki ngaŵaŵengi. Angumupuma manja po amuchichizganga kuti wazomeri kuti we ndi mulandu ndipuso kuti wakambi vinthu vinyaki vakukwaskana ndi abali. Apolisi angumutombozga so mwakuyesa kumusereza botolu la gilasi mumataku. Yiwu angufufuza so munyumba ya mubali ndi mzichi Razdobarov kwa maora ngakujumpha 8.

Pa nyengu yo apolisi afufuzanga munyumba ya ku Nikolay ndi Liliya Merinov, yiwu angwamba kupuma Nikolay ndi chinthu chakulama. Iyu wanguwiya pasi ndipu wangufenta. Wati wasisipuka, wanguwona kuti wapolisi waja pamsana waki ndipu watimupuma. Wapolisi wangumukhuwa jinu lapanthazi Nikolay. Liliya angumuguguza kutuwa pabedi uku atimuguza sisi ndipu angumumanga manja ngaki kuvuli. Apolisi angulutirizga kumupuma ŵechendamuzomerezi kuti wakavwali umampha.

Mwakukoliyana ndi marangu nga boma la Russia, kugwiriskiya ntchitu mazaza mu nthowa yeniyi kweniso kuchita nkhaza za viyo ndi mulandu. Kusazgiyapu yapa, boma la Russia likhumbika kuti livwiyengi marangu ngo mawupu pacharu chosi ngakujalikiska ngo ngavikiliya ŵanthu kuti aleki kutombozgeka. Mwaviyo, mabanja yanga ngayesesengi kulutisa mulandu wawu ku makhoti ngosi nga mucharu chawu kweniso pacharu chosi kuti urunji uchitiki wakukwaskana ndi milandu yo boma la Russia litiŵamba.

Pati pajumpha mazuŵa ngaŵi kutuliya po apolisi angufufuziya nyumba za Akaboni aku Yehova, khoti linguŵika abali 6 mujeri kulindizgiya mulandu wawu: Yaroslav Kalin, Sergey Kosteev, Nikolay Martynov, Mikhail Moish, Aleksey Solnechny ndipuso Andrey Tolmachev. Abali ndi azichi pafufupi 300 anguluta kukhoti mwachimangu kuti akawovyi anyawu wo achitirika vinthu vambula urunji.

Abali ndi azichi ŵidu wosi ku Russia, titiŵakambiya mazu ngo Paulo wangukambiya ŵanthu aku Tesalonika kuti: “Timalika pakati pa mipingu yaku Chiuta chifukwa cha kukunthiyapu kwinu ndipuso chivwanu chinu muchitombozgeka kweniso mu masuzgu nginu ngosi ngo mukumana nangu.”—2 Atesalonika 1:4.