Arara akutuliya ku Europe ndi United States alutirizga kususka vo boma la Russia lichita pakutombozga Akaboni aku Yehova.

Pa 27 October 2020, Gayle Manchin wangukamba kuti: “Wupu wa USCIRF wakwaskika ndi vo boma la Russia lichitiya Dennis Christensen. Vichita kuwoneke limu kuti boma ili litinkha munthu wambula kunanga, ndipu wachita vinthu mwachimangu vakukwaskana ndi chisopa chaki. Mumalu mwakumuchitiya lisungu boma litimuchitiya vinthu nge kuti ntchigaŵenga chakofya. Kuchita viyo nkhuchita vinthu mwambula urunji.”

Manchin walutirizga kovya Mubali Christensen kuziya mu wupu wa USCIRF wo wuwonere ŵanthu wo ŵe mujeri chifukwa cha njuŵi yawu. Wupu wa USCIRF ungususka mwakuwerezawereza chilangu cho Mubali Christensen wakupaskika kuti waje mujeri kwa vyaka 6.

Wupu wa USCIRF ungususka so boma la Russia chifukwa chakukana kuti Mubali Christensen watuzgiki liŵi mujeri. Wupu wa USCIRF ungukamba kuti Mubali Christensen “wangupaskika mwaŵi wakuti watuwi liŵi mujeri pa 23 June [2020,], kweni loya wa boma wangupanga apilu cheruzgu chenichi. Mumalu mwakuti watuzgiki mujeri, Mubali Christensen angumupusikiziya kuti waswa marangu ngaku jeri ndipu angumuŵika mukachipinda kakutombozgiyamu ŵanthu.”

Wupu wa USCIRF ungumaliza ndi fundu yo ye mu Lipoti la Pachaka la 2020. Lipoti ili lingususka boma la Russia “chifukwa chakulutirizga kuchitiya nkhaza ndipuso kuswa wanangwa wakusopa” ndipu linguwonga boma la U.S. pakupereka chilangu ku boma la Russia mwakukamba kuti “charu ichi chituswa marangu nga wanangwa wakusopa.”

Mwakuyana waka, arara 8 wo akusankhika ndi wupu wa United Nations Human Rights Council angulembe kalata wupu wa Permanent Mission of the Russian Federation to the United Nations. Mukalata yo arara angukonkhoska kuti anguzizwa ukongwa, kuwona kuti “boma la Russia lilutilirizga kutombozga Akaboni aku Yehova, likulonda ofesi yawu yo yenga ku St. Petersburg ndipuso likukaniza ntchitu za Akaboni aku Yehova zo zagwirikanga mu maofesi ngawu 395 mu charu chenichi.” Arara angususka so boma la Russia chifukwa chakukana kuvwiya vo mawupu pacharu chosi ngangukamba kuti lileki kutombozga Akaboni aku Yehova.

Arara a mu wupu wa UN angukamba so kuti marangu ngambula kuvwika nga boma la Russia ngakukwaskana ndi kuchita vinthu vakofya “ngagwira ntchitu kuti akanizi Akaboni aku Yehova kuchita vinthu vakukwaskana ndi kusopa kwawu, aŵawofyi, aswi wanangwa wawu wakuja ndi vinthu vachisisi kuziya mwa apolisi kweniso kufufuza munyumba zawu, kuto anyaki ndi chilatu chakuti akaŵafumbi mafumbu kweniso anyaki kuti aŵasaniyi ndi mulandu ndi kuŵajariya mujeri.”

Arara ŵenaŵa angukamba so kuti “Dangu la nambala 18 (1) la marangu nga ICCPR,” * litiŵapaska wanangwa Akaboni aku Yehova wakuchita vinthu vakukwaskana ndi kusopa kwawu. Mwaviyo, arara angupempha boma la Russia kuti “liwonesesi kuti marangu nga boma la Russia ngakukwaskana ndi kuchita vinthu vakofya nga mu 2002 ngaleki kuswa wanangwa wa ŵanthu wa kulongoro,wanangwa wa njuŵi yawu, wanangwa wakusopa pamwenga wa vo agomezga.”

Kalata iyi yingukamba so vakukwaskana ndi nkhaza zo abali ŵidu akumana nazu. Mwakuyeruzgiyapu, kalata iyi yingukamba kuti pa 6 February 2020 Akaboni ankhondi akutuliya ku Saratov angupumika ukongwa. Yingukamba so kuti: “Akaboni aku Yehova asuzgika ukongwa mujeri chifukwa atiŵaŵika mu malu ngaheni, atiŵachitiya nkhaza ndipu anyaki asuzgika maŵanaŵanu chifukwa chakuti atombozgeka chifukwa cha vo agomezga.”

Kalata yeniyi yingukamba so va mo Boma la Russia lingutombozge Mubali Vadim Kutsenko pa 10 February 2020. Arara a boma la Russia angukana kuti angutombozga Mubali Kutsenko. Arara a mu wupu wa UN “angukwaskika ndi vo boma la Russia lichita pakutombozga Akaboni aku Yehova ndipu litiŵamba mulandu pavakuchita vawu va chimangu vakukwaskana ndi kusopa.”

Boma la Russia lati lakaniza waka ntchitu ya Akaboni aku Yehova ndi kwamba kuŵatombozga mu 2017, wupu wa Europe’s Committee of Ministers, * wenga masu ukongwa kuti uwoni asani boma la Russia livwiya vo Khoti Lakuwona Wanangwa wa Ŵanthu ku Europe linguyeruzga maulendu ngaŵi kuti boma la Russia lituswa wanangwa wa Akaboni aku Yehova. * Mwaviyo, pa 1 October 2020, wupu uwu ungukamba kuti “udandawula chifukwa chakukanizgika kwa ntchitu ya Akaboni aku Yehova kutuliya mu 2017 kweniso vo malipoti nganandi ngakamba. Malipoti ngenanga ngalongo . . . kuti, chifukwa chakukanizika kwa ntchitu yawu Akaboni aku Yehova amangika, atombozgeka kweniso aŵikika mujeri chifukwa chakuchita mwachimangu vo agomezga.”

Kuti venivi vileki so kuchitika, wupu uwu ukhumba kuti boma la Russia liwoni so umampha “marangu ngakukwaskana ndi kuchita vinthu vakofya chifukwa venivi ndivu vichitiska kuti ntchitu ya Akaboni aku Yehova yikanizgiki kweniso yiwu amangikengi.” Kusazgiyapu yapa, boma la Russia likhumbika “kuzomerezga kuti Akaboni aku Yehova ayambi so kusopa mwawanangwa ndipuso limalisi milandu ya Akaboni wo akuŵasaniya ndi mulandu chifukwa chakuchita mwachimangu vinthu vo agomezga.” Mu 2021, wupu wenuwu wazamuwona asani boma la Russia lichitengepu kanthu.

Kutuwa mu 2017, abali ndi azichi ŵidu akujumpha 400 ku Russia ndi Crimea, akuŵapusikiziya kuti achitanga vinthu vakofya. Akaboni akujumpha 210 akuŵikikapu mujeri mumatawuni ngakujumpha 70 mu charu cha Russia.

“Tidaniya pa zina laku Yehova Chiuta widu” kuti walutirizgi kuwovya abali ndi azichi ŵidu kukunthiyapu mwakuzizipizga.—Salimo 20:2, 7.