Mwakukoliyana ndi lipoti la pa July 13, 2020 apolisi wo apinga futi angufufuza nyumba za abali 110 ku chigaŵa cha Voronezh. Yaka nkhakwamba kuti nyumba zinandi za Akaboni aku Yehova zifufuziki kwa zuŵa limoza kutuliya mu 2017. Abali ŵaŵi, Aleksandr Bokov ndi Dmitrii Katyrov, angupumika ndipuso kutombozgeka chifukwa cha kukana kupereka mapasiwedi ngawu nga foni kwa apolisi.

Khoti la muchigaŵa cha Leninsky ku Voronezh linguzomereza kuti nyumba za abali zifufuziki. Apolisi angufufuza nyumba za abali ku matawuni ngakukwana 7 ndipuso mizi ya muchigaŵa chenichi. Abali ŵidu anandi angutoleka kuluta ku ofesi ya Komiti ya Kufufuza kuti akaŵafumbi mafumbu.

Mawa laki pa July 14, 2020, khoti la muchigaŵa cha Leninsky linguyeruzga kuti abali 10 aŵikiki mujeri mpaka pa September 3, 2020: Aleksei Antiukhin wavyaka 44, Sergey Bayev wavyaka 47, Iurii Galka wavyaka 44, Valeriy Gurskiy wavyaka 56, Vitalii Nerush wavyaka 41, Stepan Pankratov wavyaka 24, Igor Popov wavyaka 54, Evgenii Sokolov wavyaka 44, Mikhail Veselov wavyaka 51, ndi Anatoliy Yagupov wavyaka 51.

Chinanga kuti lipoti ili lingukamba kuti nyumba 110 za abali zingufufuzika, kweni vo tiziŵa vakuti nyumba za Akaboni 100 ndipuso katundu wawu zikufufuzika. Chiŵerengeru chenichi chikwerengi. Vakusuzga kuti tilongoro ndi abali widu wosi chifukwa akuŵalonda mafoni ndipuso makompyuta pa nyengu yo afufuzanga nyumba zawu.

Chiŵerengeru chikulu chakufufuza nyumba za abali cho chinguchitika pa zuŵa limoza pe, chinguchitika pa February 10, 2020. Pa zuŵa ili, arara aboma angufufuza nyumba za Akaboni 50 muchigaŵa cha Transbaikal. Kutuliya po Khoti Likulu Ukongwa linguyeruzgiya mu 2017, nyumba za abali ŵidu zakujumpha 1,000 zafufuzika.

Chifukwa cha uchimi wa mu Bayibolu, tizizwa cha ndi masuzgu ngo abali widu akumana nangu ku Russia ndipuso ku vyaru vinyaki. Tilutirizga kuŵapemphere abali ŵidu chifukwa tiziŵa kuti Yehova waŵapaskengi mzimu wakupaturika kuti alutirizgi kuja akugomezgeka.—1 Peturo 4:12-14, 19.