Pa 21 October2020, * khoti la muchigaŵa cha Pervomayskiy mutawuni ya Omsk liyeruzgengi mulandu wa Mubali Sergey Polyakov ndi muwolu waki Anastasia, Mzichi Gaukhar Bektemirova ndi Mzichi Dinara Dyusekeyeva. Loya wakumiya boma wakupempha khoti kuti liyeruzgi kuti Mubali Polyakov wakaje mujeri kwa vyaka 6 ndi hafu. Ndipu azichi atatu angaŵayeruzga kuti angapalamulanga mulandu wewosi cha kwa vyaka viŵi.

Sergey Polyakov

• Chaka cho Wakuwiya: 1972 (Muchigaŵa cha Murmansk)

• Mo Wakukuliya: Wakusambira va sayansi pa sukulu yinyaki. Wangutolana ndi Anastasia mu 2003

Anastasia Polyakova

• Chaka cho Wakuwiya: 1984 (Muchigaŵa cha Murmansk)

• Mo Wakukuliya: Wakusambira va marangu pa koleji yinyaki. Iyu ndi mulumu waki Sergey atanja kusambira vineneru nge, Chitchayina, Chikazakhi, Chineneru Chamanja cha ku Russia ndi Chisebiya

Gaukhar Bektemirova

• Chaka cho Wakuwiya: 1976 (Ku Uryl, Kazakhstan)

• Mo Wakukuliya: Ndi mwana wakumaliya mubanja la ŵana 6. Wakukuliya ku mapiri nga ku Kazakhstan ndipu watanja chilengedu. Kwa vyaka vinandi wakhumbisiskanga kuziŵa chifukwa cho taŵanthu te ndi umoyu. Pavuli paki, wanguziŵa kweniso kukhorwa ndi vo Bayibolu lisambiza. Kusambira kweniso kufufuza Mazu ngaku Chiuta kungumuwovya kuti waje wakukho ndipuso kuti wakunthiyengepu po we mujeri

Dinara Dyusekeyeva

• Chaka cho Wakuwiya: 1982 (Ku Leningradskove, Kazakhstan)

• Mo Wakukuliya: Weche mwana wangwamba kuŵanaŵaniya chifukwa cho taŵanthu te ndi umoyu. Wangwamba kusambira Bayibolu we ndi vyaka 17. Iyu wangukondwa kusambira vakukwaskana ndi zeru za mu Bayibolu ndipuso kuziŵa zina laku yo wakulilemba kuti ndi Yehova. Watanja basketball, volleyball, kutchimbiya ndipuso kwendesa njinga

Usiku wa pa 4 July 2018, apolisi anguphwanya chisasa ndikusere munyumba ya Mubali Polyakov ndi muwolu waki Anastasia, yiwu ŵe mutulu. Apolisi yaŵa anguvwala vakubisa kumasu ndipu angupuma Mubali Polyakov mwankhaza. Yiwu angumanga banja lenili ndi kuliŵika mujeri. Banja la Mubali Polyakov ndi banja lakwamba kuŵikika mujeri kutuliya mu 2017 po Khoti likulu lingukaniza Akaboni aku Yehova kuchita vinthu vakukwaskana ndi kusopa. Mubali Polyakov ndi muwolu waki anguja myezi 5 mukachipinda kamujeri, ndipu weyosi angumuŵika kwaku yija. Pavuli paki, anguŵayeruzga kuti akachitengi ukayidi wapanyumba kwa myezi yitatu.

Mu May 2019, arara a boma angufufuza nyumba za Akaboni aku Yehova muchigaŵa cha Omsk mwambula kuzomerezgeka. Pakumaliya paki, Mzichi Bektemirova ndi Dyusekeyeva angumangika. Mulandu wawu anguwusaza pamoza ndi wa banja la Mubali Polyakov. Mulandu wa ŵanthu anayi ŵenaŵa ungwamba pa 1 April 2020.

Te ndi chigomezgu kuti Yehova walutirizgengi kuŵapaska nthazi ateŵeti ŵaki kuti akunthiyepu vinthu vambula urunji vo vitiŵachitikiya.—Aefeso 3:20.