Pambula kuswera yapa, Khoti la Sychyovskiy muchigaŵa cha Smolensk liperekengi cheruzgu chaki pa mulandu wa Mzichi Nataliya Sorokina ndi Mariya Troshina. * Loya wa boma wechendakambi cheruzgu cho wakhumba kuti azichi yaŵa apaskiki.

Nataliya Sorokina

• Chaka cho Wakuwiya: 1975 (Ku Dresden, Germany)

• Mo Wakukuliya: Wati watuwa ku Germany wanguluta ku Saint Petersburg ndipu pavuli paki wangusamiya ku Sychyovka muchigaŵa cha Smolensk. Wagwiranga ntchitu ya udokotala. Watanja kuluka vinthu ndipuso kusambira vineneru vakupambanapambana kuti wapharazgengi ku ŵanthu anandi. Wangwamba kusambira Bayibolu ndi Akaboni aku Yehova. Wangukhorwa ndi vo wangusambira vakukwaskana ndi chilengedu kweniso chilindizga chamunthazi. Venivi vingumuchitiska kuti waje ndi mtima wakukhumba kuteŵete Yehova. Wangubatizika mu August 1994

Mariya Troshina

• Chaka cho Wakuwiya: 1977 (Ku Saint Petersburg)

• Mo Wakukuliya: Kwamba weche munamana wayanjanga kusambira vakukwaskana ndi mbiri. Wagwiranga ntchitu yakulongo malu alendu. Watanja kusambira vineneru vinyaki kuti wapharazgiyengi ŵanthu anandi

  Wangwamba kusambira Bayibolu ndi Akaboni aku Yehova. Wangukhorwa ndi vo wangusambira kuti asani Bayibolu likamba vakukwaskana ndi sayansi kweniso mbiri lineneska. Wakubatizika mu July 1991. Anyina akutayika, kweni nawu angusambira Bayibolu ndipu angubatizika

Pa 7 October 2018, apolisi a gulu la Federal Security Service (FSB) ndipuso apolisi a mumuzi anguchifufuza nyumba zinayi ku Sychyovka. Apolisi a FSB angulonda vinthu va abali ndi azichi ŵidu akukwana 17 kusazgapu ŵana. Mzichi Nataliya Sorokina ndi Mariya Troshina angumangika ndipu anguŵasunga pa malu nganyaki kwakanyengu.

Pakukamba va kufufuza munyumba za abali, Mariya wangukonkhoska kuti kuŵerenga mbiri za Akaboni anyaki wo angumangika chifukwa cha chivwanu chawu vingumuwovya kuti wanozgeke. Iyu wangukamba kuti: “Mtima wangu wenga waka mumalu pa zuŵa lo afufuziyanga munyumba yangu kweniso kundimanga. Ndaziŵanga cha kuti ndingaja ndi chimangu chamumtima viyo. Kweni chifukwa cha mzimu waku Chiuta ndingufiska.”

Pati pajumpha mazuŵa ngaŵi ŵati afufuza, Khoti la muchigaŵa cha Leninskiy mutawuni ya Smolensk linguyeruzga kuti azichi ŵidu aŵikiki mujeri kwa mazuŵa 191 kulindizgiya mulandu wawu. Mazuŵa yanga ngati ngakwana, anguŵatuzga ndipu anguŵakambiya kuti akagwiri ukayidi wa panyumba kwa myezi yakujumpha 6.

Azichi wosi ŵenaŵa angukamba kuti wenga akunozgeka kukunthiyapu mayeseru ngenanga chifukwa chakuti ŵenga kali pa ubwezi wakukho ndi Yehova ŵechendakumani ndi mayeseru. Nataliya wangukamba kuti mbumampha kuwona vinthu nge mo Yehova wativiwone. Iyu wanguti asani titombozgeka mbumampha kukumbuka yo wachitiska kuti titombozgekengi. Iyu wangumaliza ndi mazu ngakuti “Nyengu zosi Satana wachitiska kuti ŵanthu aku Chiuta atombozgekengi ndipu tosi tingalongo kuti te akugomezgeka kwaku Chiuta.”

Mariya wangukamba so kuti: “Tija pa ubwezi wakukho ndi Yehova chifukwa cha vinthu vo tichita zuŵa lelosi, mwaviyo mbumampha kuziŵa mo Yehova watitiwovye. Mumuthembengi pa chechosi. Muyanjengi kuŵerenga Bayibolu zuŵa lelosi, muyesesengi kukumbuka vo vinguchitikiya ŵanthu wo mwaŵerenga kweniso mukumbukengi mavesi ngo mutanja.”

Azichi ŵidu ntchakuwoniyapu chamampha ukongwa kwaku tosi pa nkhani yakuja ndi chivwanu kweniso kukunthiyapu ndipu alutirizga ‘kugomezga Yehova nge wakuŵawovya, kweniso ntchishangu chawu.’—Salimo 115:11.