SEPTEMBER 23, 2021
RUSSIA

Azichi 6 ndi Mubali Yumoza Alutirizga Kuthemba Yehova Ndipuso Abali ndi Azichi po Mulandu Wawu we Kukhoti

JULANI

Nyengu yo Khoti Liyeruzgiyengi Mulandu

Pambula kuswera yapa, Khoti la Leninskiy lo le muchigaŵa cha Vladivostok liperekengi cheruzgu chaki pa mulandu wa Mzichi Nadezhda Anoykina, Lyubov Galaktionova, Nailya Kogay, Nina Purge, Raisa Usanova, Yelena Zayshchuk, ndi Mubali Valentin. a Azichi yaŵa ŵe ndi vyaka vapakati pa 63 ndi 86. Loya waboma wechendakambi cheruzgu cho wakhumba kuti mubali ndi azichi yaŵa apaskiki
Pa 19 January 2021

Mulandu wawu anguwulutisa ku khoti la Leninskiy lo le muchigaŵa cha Vladivostok
Pa 12 November 2019

Mulandu wawu anguwuweze ku ofesi ya loya waboma
Pa 5 April 2019

Ŵati aja mujeri kwa mazuŵa 274 kulindizgiya mulandu wawu, mubali Valentin wangutuzgika mujeri. Angumuyeruzga kuti wakachitengi ukayidi wapanyumba
Pa 19 April 2018

Apolisi a gulu la FSB (Federal Security Service) angufufuza nyumba 7 za Akaboni
Pa 9 April 2018

Dipatimenti ya Kufufuza (Investigation Department) ya FSB yo ye muchigaŵa cha Primorsky, yinguŵajuliya mulandu azichi 6 ndi mubali Valentin

Vakukwasakana ndi Ŵanthu Yaŵa

Lyubov Galaktionova

Chaka cho Wakuwiya: 1942 (Vladivostok)

Mo Wakukuliya: Wagwiranga ntchitu nge sekilitale mpaka po wanguleke. Wanguyirwa mu 1962. Mulumu waki wangutayika ŵati aja munthengwa kwa vyaka 14. Iyu wakulera yija mwana waki munthulumi. Chifukwa chakuti waja wachitamatama kwa vyaka vinandi, we mugulu la ŵanthu akupunduka

Iyu wakhumbanga kuziŵa chilatu cha umoyu ndipuso chifukwa cho ŵanthu afwiya. Iyu wangusaniya kwamuka kwa mafumbu ngaki po wasambiranga Bayibolu ndi Akaboni aku Yehova. Wakubatizika mu 1998

Vo Lyubov Wangumuka Wati Wafumbika

Kumbi Yehova mungumupemphanji mwakujiyuyuwa, pa nyengu ya masuzgu yeniyi?

Ndingupemphera kuti ndije wakufwasa. Ndingumupempha Yehova kuti wandiwovyi kuja wakujiyuyuwa chifukwa cha vinthu vambula urunji vo vandichitikiyanga ndipuso kuti wandipaski nthazi kuti ndikunthiyepu kutombozgeka.

Nailya Kogay

Chaka cho Wakuwiya: 1951 (Tashkent, Uzbekistan)

Mo Wakukuliya: We ndi azichi ŵaki ŵaŵi. Weche mwana, wayanjanga masaza. Wati wamaliza masambiru ngaki pa koleji yinyaki, wanguja injiniya. Kweni sonu wakuleka ntchitu yeniyi. Wakutorana ndi mulumu waki Robert mu 1975. We ndi ŵana ŵaŵi. Mu 1989, Robert wakusanirika ndi suzgu ya muliŵavu yo yikhumbika kuyiphwere nyengu zosi. Wakusamiya ku Vladivostok mu 2003

Pa nyengu yo wasambiranga Bayibolu ndi Akaboni aku Yehova ndipu wanguziŵiya kuti Bayibolu ndi Mazu ngaku Chiuta. Iyu wakondwanga ndi uthenga wa mu Bayibolu kweniso chanju chaku Chiuta. Wakubatizika 1997

Vo Nailya Wangumuka Wati Wafumbika

Kumbi pe fundu yinyaki yeyosi yakuchiska yo apharazgi mu mpingu angukukambiyanipu yo yakuwovyani kuti mukunthiyepu?

Ndaja ndichivwa kwa azichi anandi achikamba kuti: ‘Mwe chakuwoniyapu chamampha kwaku isi. Timalika namwi. Asani mufiska kukunthiyapu kutombozgeka ndikuti nasi tingafiska!’

Valentin Osadchuk

Chaka cho Wakuwiya: 1976 (Ukraine)

Mo Wakukuliya: Wagwiranga ntchitu nge bwana pa kampani yinyaki yakugulisa vinthu. Iyu waziŵika kuti wachita vinthu mwauneneska, ngwazeru ndipuso walimbikiya ntchitu. Watanja kuchitembeya

Wakubatizika kuja yumoza wa Akaboni aku Yehova mu 1998

Vo Valentin Wangumuka Wati Wafumbika

Kumbi ubwezi winu ndi Yehova wakho wuli chifukwa cha kutombozgeka kwenuku?

Janja lanthazi laku Yehova ndipuso nthazi zakutuliya kwa abali ndi azichi zandiwovya ukongwa. . . . [Mwakuyeruzgiyapu,] kali ndavwisanga vinthu vinandi ukongwa: kuti ndikhumbika cha kopa kulekana ndi abali ŵangu, kuluza katundu wangu pamwenga kuti mbiri yangu yinangikengi muchigaŵa. Kweni, vosi ivi vati vachitika ndipuso ndati ndaŵikika mujeri, [ndinguwona mo] Chiuta wangu Yehova wangundiwovye munthowa yakwenere.

Nina Purge

Chaka cho Wakuwiya: 1940 (Pesok, muchigaŵa cha Pskov)

Mo Wakukuliya: We ndi mzichi waki mumana. Wakuwaku mu nyengu ya Nkhondu Yachiŵi ya Pacharu Chosi. Mu 1942, muzi wawu unguzingilizika ndi asilikali a German. Banja lawu linguthaŵa lati lavwa kuti libayikengi ndi chipani cha Nazi

Wakutorana ndi mulumu waki pa nyengu yo mulumu waki wasambiranga pa sukulu ya Estonian Maritime Academy. Ŵe ndi ŵana ŵaŵi. Banja ili lingusamiya ku Vladivostok, ko mulumu waki wangutumizika kuti wakagwirengi ntchitu

Chakukumaliya kwa 1990, wangwamba kusambira Bayibolu ndi Akaboni aku Yehova. Wangusambira kuti nyengu zosi wakhumbika kuthemba Yehova kuti wamuwovyi. Wakubatizika mu 1999

Vo Nina Wangumuka Wati Wafumbika

Kumbi vo mwakumana navu vakuwovyani wuli kuti muje pa ubwezi wakukho ukongwa ndi Yehova?

Ndingwamba kumuthemba ukongwa Yehova. Ndingumupempha kuti wandipaski nthazi zakuti ndikunthiyepu mpaka pakumaliya ndipuso kuti ndilutirizgi kuja wakugomezgeka. Lemba la Yesaya 41:13 lingundiwovya kuja ndi chiganga, nge kuti Ada ŵangu [akuchanya] andiko janja. Chechosi cho chingandichitikiya nde wakunozgeka

Raisa Usanova

Chaka cho Wakuwiya: 1947 (Kuznetsovo)

Mo Wakukuliya: We ndi azichi ŵaki atatu ndipuso mku waki yumoza. Wati wamaliza masambiru nga ku secondary, wangusamiya ku Vladivostok kuti wakasambiri ntchitu yakunozga njanji. Wakuyirwa ndipu we ndi ŵana ŵaŵi. Wakugwirapu ntchitu yakwendesa trolleybus kwa vyaka 25. Pasonu panu wakuleka ntchitu

Mu 2000, anyina, mku waki ndipuso mzichi waki angutayika. Sonu iyu wakhumbanga kuziŵa chifukwa cho ŵanthu afwiya ndipuso asani kwe chilindizga cha ŵanthu wo akutayika. Wangusaniya kwamuka kwakukhorwesa wachisambira Bayibolu ndi Akaboni aku Yehova. Wakubatizika mu 2002

Vo Raisa Wangumuka Wati Wafumbika

Kumbi mwasambiranji pa mayeseru ngo mwakumana nangu, vo vingakuwovyani kunozgeke masuzgu ngamunthazi?

Ndasambira kuja wakujiko, ukongwa mo ndingalongolore, kukunthiyapu kweniso kuthemba ukongwa Yehova. Ndingwamba kusambira ukongwa Bayibolu. . . . Ndikhumba kulutirizga kuja wakugomezgeka mpaka pakumaliya.

Kumbi munozgeke wuli kutombozgeka?

[Nditesesa] kuŵanaŵaniya vesi lo likamba kuti mzimu wazakundikumbusa vinthu vosi pa nyengu yaki.—Yohane 14:26.

Tilutirizga kuchiskika ndi chakuwoniyapu chamampha cha abali ndi azichi ŵidu ku Russia. Yiwu alongo kuti ndi mtundu wa ŵanthu wo ŵe ndi chivwanu chakusunga maumoyu.—Aheberi 10:39.

a Ndi nyengu zosi cha po akambiya limu nyengu yo khoti liyeruzgiyengi mulandu.

NKHANI