Pa 16 September, 2020, * Khoti la Sverdlovskiy lo le mutawuni ya Kostroma liyeruzgengi mulandu wakukwaskana ndi Mubali Sergey Rayman ndi muwolu waki Valeriya. Weyosi angamuyeruzga kuti wangapalamulanga mulandu wewosi cha kwa vyaka 7.

Sergey Rayman

• Chaka cho Wakuwiya: 1996 (Ku Kineshma, muchigaŵa cha Ivanovo)

• Mo Wakukuliya: Iyu wakusambira vakuzengazenga kusukulu yakusambiza ntchitu za manja. Ndipuso wangusambira vakukwaskana ndi mo wangatowese mukati mwanyumba. Ambuyaki ndiwu angumusambiza kuti waliyanjengi Bayibolu kweniso kulitumbika. Wangutorana ndi Valeriya mu 2015. Watanja kubika ndipuso kuchita masaza kumalu ngo maji ngawundana

Valeriya Rayman

• Chaka cho Wakuwiya: 1993 (Ku Sharya, muchigaŵa cha Kostroma)

• Mo Wakukuliya: Awisi akutayika we ndi vyaka 10. Anyina ndiwu akumusambiza vakukwaskana ndi Yehova. Iyu wagwira ntchitu yakunozga ŵanthu sisi

Pa 25 July 2018, ndi mulenji, apolisi wo atenda ndi futi anguphwanya ndi visulu nyumba ya Mubali ndi Mzichi Rayman. Apolisi angumanga banja lenili. Mzichi Rayman wanguja mujeri kwa mazuŵa ngaŵi. Mubali Rayman wanguja mukachipinda kakuyija mujeri kwa mazuŵa 59. Arara a boma angumukaniza mubali Rayman kuti wangalongoronga ndi Akaboni aku Yehova anyaki cha. Yiwu azomerezgeka so cha kutuwapu panyumba pawu ndi usiku. Venivi vichitiska kuti afipengi ukongwa mtima kweniso kuti umoyu wawu uje pangozi.

Po banja lachinyamata lilindizga kuti khoti liyeruzgi mulandu wawu, titiŵapemphere kuti alutirizgi kuja ndi chiganga kweniso nthazi po agomezga kuti Yehova walekengi cha kuŵawovya.—Yoswa 1:9.