Vyaka 10 vo vajumpha, pa 10 June, 2010, Khoti Lakuwona va Wanangwa wa Ŵanthu ku Europe (ECHR), linguyeruzga kuti kwa vyaka vinandi ŵaraŵara aboma a ku Russia, aja achiswa wanangwa wa Akaboni aku Yehova, mwakuŵakaniza kuti asopengi mwawananga. Khoti ili linguyeruzga kuti boma la Russia liŵalipiri ndalama zinandi Akaboni kweniso kuti chisopa chawu cho chingukanizgika ndi ŵaraŵara aboma mu 2004 ku Moscow, chije so chakuzomerezeka.

Khoti lati lagamuwa waka venivi, Mubali Ivan Chaykovskiy, yo pa nyengu iyi wenga cheyamani wa Akaboni aku Yehova ku Moscow, wangukamba kuti: “Cheruzgu cho khoti la ECHR lagamuwa, ntchamampha ukongwa ndipu chiwovyengi kuti paŵevi sankhu la visopa. Ndigomezga kuti cheruzgu chenichi chiwovyengi kuti ŵaraŵara a boma azomerezi wanangwa widu kweniso kuti boma lileki kutombozga Akaboni aku Yehova mucharu chinu cha Russia.”

Kweni vo mubali uyu wagomezganga vinguchitika cha. Ŵaraŵara a boma la Russia anguvwiya cha vo khoti la ECHR lingugamuwa. Mumalu mwaki, yiwu angwamba kuŵatombozga abali ŵidu mucharu cha Russia. Abali angulutirizga kutombozgeka ukongwa Khoti Likulu la Russia lati lakaniziya limu kusopa kwidu mu 2017. Ivi vati vachitika, abali ŵidu anandi amangikanga, kumbika mulandu kweniso kuŵatumiza ku jeri.

Chinanga kuti pajumpha vyaka 10, vo khoti lingugamuwa vakukwaskana ndi boma la Russia veche kugwira ntchitu. Mu 2010, khoti la ECHR lingukana milandu yaboza yakukwaskana ndi Akaboni aku Yehova yo boma la Russia litumba abali ndi azichi ŵidu ambula kunanga.

Mwakuduwa tingakamba kuti, khoti la ECHR lingukamba kuti Dipatimenti yakuwona va marangu ku Moscow limoza ndi makhoti nga kwenuku, alivi chifukwa chakuvwika ‘cha mu marangu’ chakukaniziya Akaboni aku Yehova kuti asopengi mwa wanangwa. Khoti la ECHR lingususka ŵaraŵara a boma a ku Moscow ndipu lingukamba kuti yiwu “achita vinthu mwakwanjiya kweniso mwambula urunji ndipu vikoliyana cha ndi vo akhumbikiya kuchita.” Kusazgiyapu yapa, ŵaraŵara a boma ku Moscow, angusanirika ndi mulandu chifukwa charu cha Russia chituswa dangu lo vyaru vosi va ku Europe vingukoliyana.

Nge mo ve nge mu 2010, mu 2020, weyosi waziŵa kuti charu cha Russia chilutirizga mbwenu kutombozga abali ŵidu. Rachel Denber wachiŵi ku wupu wa Europe and Central Asia for Human Rights Watch, wangukamba kuti: “Asani Akaboni aku Yehova achita vinthu vakukwaskana ndi kusopa ku Russia, ving’anamuwa kuŵika umoyu wawu pangozi.” Ndipu pa 9 January, 2020, iyu wangukamba so kuti: “Palivi chifukwa chakuvwika chakuti venivi viŵachitikiyengi Akaboni.”

Tipemphera kweniso tigomezga kuti Yehova walutirizgengi kuchiska abali ndi azichi ku Russia wo atombozgeka kwambula kunanga. Ndipu Yehova waŵawovyengi kuti ‘akunthiyengepu ukongwa mwakuzikira ndipuso mwalikondwa.’—Akolose 1:11.