Pa 10 February 2021, Khoti la muchigaŵa cha Kursk likukana vo Mubali Dennis Christensen wangupempha kuti watuzgiki liŵi mujeri nyengu yaki yechendakwani. Iyu wangupempha khoti kuti nyengu yo yajaku pa chilangu cho wangupaskika walipiri waka ndalama. Pajumpha chaka sonu kutuliya po Mubali Dennis wanguŵiya ndi mwaŵi wakuti wangatuzgika liŵi mujeri nyengu yaki yechendakwani, kweni khoti lilutirizga mbwenu kumukaniya.

Pambula kuswera yapa, Dennis wangulembe kalata muwolu waki Irina. Iyu wangumukambiya vo lemba lo watanja likamba kuti: “Tingavukanga cha kuchita vamampha, pakuti pa nyengu yaki tazamuvuna asani taleka kuvuka.” (Agalatiya 6:9) Wangumukambiya kuti wagomezga ndi mtima wosi kuti Yehova wazakuŵatumbika asani alutirizgengi kuchita chamampha, kovya anyawu kweniso asani aleka kuwere vuli. Iyu wangumukambiya so kuti wakhumba kuzija wakukho ukongwa mwauzimu pa nyengu yo wazamutuliya mujeri kuphara po walutiyanga.

Dennis waja mujeri kweniso kwambula kuwonana ndi muwolu waki Irina kwambiya mu May 2017, ndipu pasonu panu wakwanisa vyaka pafufupi vinayi. Dennis ndi Irina alutirizga kuja chakuyeruzgiyapu chamampha kwaku tosi chifukwa alongo kuti athemba Yehova, ŵe ndi chimangu cha mumtima ndipuso akhumbisiska kuja akugomezgeka kwaku Yehova.—Afilipi 1:14.