Pambula kuswera yapa, Khoti la Birobidzhan of the Jewish Autonomous liperekengi cheruzgu chaki pa mulandu wa Mubali Yevgeniy Yegorov. * Loya wa boma wachendakambi cheruzgu cho wakhumba kuti mubali uyu wapaskiki.

Yevgeniy Yegorov

• Chaka cho Wakuwiya: 1991 (Ku Birobidzhan)

• Mo Wakukuliya: Wakulereka ndi anyina kweniso ambuyaki. Wakusambira ntchitu za magesi. Wagwiranga ntchitu yakupanga ndi kunozga maloku. Watanja kuŵerenga ndi kulemba. Wakulemba kabuku ka ndakatulu. Wakubatizika kuja Kaboni waku Yehova mu 2005. Wakutolana ndi Kseniya mu September 2019, ndipu ŵe ndi mwana munthulumi yo wanguwaku mu August 2020

Mu May 2018, apolisi a boma wo aziŵika kuti Federal Security Service (FSB) angufufuza nyumba zinandi za Akaboni aku Yehova ku Birobidzhan. We pafupi kuti wakwatisi, Yevgeniy angumusaniya ndi “milandu” chifukwa chakuchita vinthu vakukwaskana ndi chivwanu chaki ndipuso kuŵerenga Bayibolu. Angumukaniza kutuwa mucharu chaki. Ndipu wati wakwatisa waka anyina a Larisa Artamonova, nawu anguŵasaniya ndi mulandu. Mu December 2019, Khoti la muchigaŵa cha Birobidzhan lingwamba kuvwa mulandu wa Mubali Yevgeniy.

Yevgeniy wangukamba kuti sonu watijivwa kuti we paubwezi wakukho ndi Yehova. Iyu wangukamba kuti: “Pa nyengu yakusuzga yeniyi, Yehova wangundiwovya kuti ndije wakuzika ndipuso wangundipaska ‘nthazi yakujumpha yo tituŵa nayu.’”—2 Akorinto 4:7.

Chinanga kuti Yevgeniy waziŵa kuti Yehova watimuwovya, kweni waziŵa so kuti wakhumbika kunozgeke vo vichitikengi kunthazi kweniso kulutirizga kuja paubwezi wakukho ndi Yehova. Iyu wangukamba kuti: “Chinthu chakukhumbika ukongwa kwaku ini nkhulutirizga kuja paubwezi wakukho ndi Yehova, chinanga ndingakumana ndi masuzgu wuli.”

Chinanga kuti atombozgeka, tigomezga kuti Yevgeniy ndi Kseniya, pamoza ndi abali ndi azichi ŵidu wosi ku Russia, achiskikengi ndi mazu ngo tiŵerenga pa Salimo 10:17 ngakuti: “Kweni yimwi Yehova, muvwengi pemphu la ŵanthu akufwasa. Mukhwimisengi mitima yawu, kweniso muŵavwisiyengi.”