Pa 20 May 2021, Khoti la Leninskiy lo le muchigaŵa cha Saratov likuyeruzga kuti Mubali Rustam Seidkuliev we ndi mulandu ndipu wakaje mujeri kwa vyaka viŵi ndi hafu. Khoti lati layeruzga waka venivi, mubali uyu anguluta nayu kujeri nyengu yeniyo.

Rustam Seidkuliev

• Chaka cho Wakuwiya: 1977 (Ku Ashgabat, ku Turkmenistan)

• Mo Wakukuliya: Wakulereka ndi anyina pe. Wangwamba kusambira Bayibolu ndi Akaboni aku Yehova mu 1993. Pati pajumpha vyaka viŵi, anyina nawu angwamba kusambira Bayibolu. Kwa maulendu ngaŵi wechendabatiziki, angumumanga ku Turkmenistan chifukwa chakukana kusere usilikali mwakukoliyana ndi vo wagomezga kutuliya mu Bayibolu.

  Wakubatizika mu 1998, wati wakhorwa ndi ulongozgi wazeru wo usanirika mu Bayibolu kweniso wati wawona kuti mauchimi nganandi nga mu Bayibolu ngafiskika. Banja laki lingusamiya ku Russia mu 2000, awisi amsaniyapu ŵati atumizika ku ukapolu chifukwa chakuja Kaboni waku Yehova

  Wagwiranga ntchitu nge wakunozga mafoni kweniso yakuzenga. Wangutolana ndi Yuliya mu 2001. Banja ili likondwa kwenda malu ngakupambanapambana, kurya chakurya pamoza ndi anyawu ndipuso kutchaya tenesi. Kwamba mu September 2019, aja achiphwere apapi aku Rustam

Mu March 2019, mura wa gulu la apolisi achisisi la FSB (Federal Security Service) wanguza kunyumba ya Mubali Rustam Seidkuliev ndi muwolu waki Yuliya. Wapolisi uyu wanguŵajala nthowa ndi galimotu yaki ndipu wangwamba kuŵafumba mafumbu weyosi pakuyija, ndipuso wanguŵapaska chikalata chakuŵadaniya ku polisi kuti akafumbiki so mafumbu.

Pa 15 February 2020, apolisi angumanga Rustam ndi muwolu waki Yuliya pa nyengu yo ŵenga mu shopu. Pa zuŵa lenili, Rustam angumujaliya mujeri. Pavuli paki, khoti la muchigaŵa ichi linguyeruzga kuti amutuzgi mujeri ndipu wakagwiri ukayidi wa panyumba. Pakwamba, angumutumiza kunyumba ya wupu unyaki, ko wangujaku myezi yiŵi ndipu wazomerezekanga cha kuwonana ndi muwolu waki. Ŵati amutumiza kunyumba kwaki, angumukaniza kugwiriskiya ntchitu intaneti pamwenga nthowa yeyosi yakukambiskiyana ndi ŵanthu anyaki apatali. Kwa maulendu 7 aja achimusazgiyaku nyengu yakugwiriya ukayidi wapanyumba. Rustam wangugwira ukayidi wa panyumba kwa mazuŵa 217.

Rustam wangukumana ndi masuzgu nganandi wachigwira ukayidi wa panyumba. Nyengu zinyaki amuzomerezanga kusoka po waja asani nyengu yakwana 9:00 mlenji ndi 11:00 mlenji. Ndipu nyengu zinyaki so amukanizanga kutuliya pabwalu pa nyumba yaki kuti wakapeyi pamwenga kuchinozga po pakhumbika kunozgeka. Rustam wangukamba cho chamuwovyanga kuti walutirizgi kuja ndi maŵanaŵanu ngamampha. Iyu wanguti: “Kugwira ukayidi wapanyumba kwandiwovya kuja ndi nyengu yakukwana yakupemphera kweniso kuŵanaŵaniya vinthu vauzimu. Venivi vandiwovya kuti ndilekengi kutimbanyizgika maŵanaŵanu. Ndinguziŵa kuti abali ndi azichi ŵangu anyaki ŵenga mujeri mo vinthu vakusuzga ukongwa kuphara mo viliri ndi ini.”

Kumangika ko wangumangika pakwamba naku kungumuwovya so ukongwa Rustam. Asani waŵanaŵaniya nyengu yo wenga mujeri ku Turkmenistan, iyu wangukamba kuti: “Yehova wakundiwovyapu kali pa vakuchitika vakupambanapambana, ukongwa pa nyengu yo ndingumangika ndeche wachinyamata. Vo vingundichitikiya vingundiwovya kuti ndimuthembengi ukongwa Yehova kweniso kuti ndileki kuchita mantha.”

Rustam walutirizga kuchita vo wangafiska pakuteŵete Yehova. Iyu wangukamba kuti: “Tingalekanga cha kuwungana pamwenga kuchita vinthu vauzimu. Ndipu tingazomerezanga cha kuti vinthu vakutimbanyiza vititondekesi kupharazga ndipuso kuja pa ubwezi ndi Akhristu anyidu. Ndisimikiza mtima kulutirizga kuteŵete Yehova kwekosi ko iyu wawona kuti ndingateŵete, chifukwa te ndi nyengu yimanavi ukongwa yo yajaku.”

Tigomezga kuti Yehova walutirizgengi kupaska abali ndi azichi ŵidu akugomezgeka ku Russia “chinthu chechosi chamampha kuti aje akunozgeka kuchita khumbu laki.”—Aheberi 13:21.