Pa 25 January, 2021, Khoti Likulu Ukongwa ku Kabardino-Balkarian Republic likukana vo loya wa boma wangupempha pa 7 October, 2020, ndipu likuyeruzga kuti Mubali Yuriy Zalipayev walivi mulandu. Loya wa boma wangachita apilu cheruzgu cho Khoti likupereka. Chinanga kuti ve viyo, cheruzgu cho khoti ili likupereka chikwamba kugwira ntchitu. Yuriy walivi so mulandu wewosi. Iyu we ndi wanangwa wakupempha kuti amupepesi pa mulandu wosi wo aja achimupusikiziya.

Yuriy wanguthemba Yehova ndipuso wenga ndi chiganga chinanga kuti waziŵanga kuti Khoti lingamuyeruzga kuti we ndi mulandu. Cheruzgu chechendaperekeki, Yuriy wangukambiya khoti mwachiganga mo Chiuta wazamutuzgiyapu viheni vosi pambula kuswera yapa, kusazgiyapu kutombozgeka kwa Akaboni aku Yehova ku Russia. Iyu wangukamba kuti: “Kwali ŵanthu wo atitimba mulandu angatiyukiya wuli, kweni pe chinthu chinyaki cho akhumbika kuziŵa. Angasintha cha chivwanu changu pa vo Chiuta wakulayizga kuti pambula kuswera wazamutuzgapu vinthu viheni pacharu chosi. Ndigomezga kuti layizgu lakuti pambula kuswera ŵanthu a mitundu yakupambanapambana azamuziŵa kuti yiwu mbabali ndi azichi, lazamufiskika. Palivi cho chingaŵapatuska. Pakukamba vakukwaskana ndi Chiuta, Bayibolu likamba kuti: ‘Iyu wazamuyeruzga mitundu ya ŵanthu ndipu wazamunyoloska vinthu vakukwaskana ndi mitundu yinandi ya ŵanthu. Yiwu azamusula malipanga ngawu kuti ngaje mayembi nga pulawu. Ndipuso azamusula mikondu yawu kuti yije vidya vakuphatiya vimiti. Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.’—Yesaya 2:4.

“Ndigomezga kuti layizgu lenili lifiskikengi pambula kuswera yapa!”