Pa 28 August, 2021, pemphu lo Khoti lakuwona va Wanangwa wa Ŵanthu ku Europe (European Court of Human Rights) lati lafika ku arara a boma ku Russia, Mubali Aleksandr Lubin ndi Anatoliy Isakov angutuzgika mujeri mo alindizgiya mulandu wawu. Chinanga kuti abali yaŵa mbakupunduka, anguŵajaliya mujeri kwa mwezi umoza ndi hafu muchigaŵa cha Kurgan ku Russia. Yiwu angaluta mbwenu mujeri asani khoti lapereka cheruzgu chawu pa mulandu wawu.

Pa 13 ndi 14 July 2021, apolisi a muchigaŵa cha Kurgan angufufuza nyumba zinandi za Akaboni aku Yehova. Mubali Isakov, wa vyaka 56 ndi Mubali Lubin, wa vyaka 65 ŵenga pagulu la Akaboni anandi wo anguŵikika mujeri.

Mubali Lubin watama matenda ngakukwaskana ndi misipi ya ndopa kweniso maselu ngatuŵa nga ndopa ngo ngatovya kuvikiriya ku matenda. Wakhumbika kuti wajengi ku oxygen kwa maora 16 zuŵa lelosi kweniso kulondiyanga chovyu chaku chipatala cho angumukaniza. Iyu wasuzgika kwenda ndipu wangasoka cha yija kwambula munthu munyaki kuti wamuwovyi. Muwolu waki, Tatyana, nayuso wakupunduka ndipu wachitapu sitiroku maulendu nganayi.

Mubali Isakov watama nthenda ya kansa ya mu ndopa ndipu viwanga vaki vinandi vakumusana ndi mbaŵala vikufyoka, mwakuti wakhumbika kugwiriskiya ntchitu njinga ya ŵanthu akupunduka. Pa nyengu yo wenga mujeri amukanizanga kuluta kuchipatala kuti wakalonde chovyu cha matenda nga kansa. Iyu angumukaniza so kulonda munkhwala wa ku chipatala pa nyengu yo wavwanga urwirwi. Mwasoka, Mubali Isakov pa nyengu yo wenga mujeri kulindizgiya mulandu waki, wangutama matenda nga COVID-19.

Kwa masabata, maloya ngangupanga apilu kuti abali ŵaŵi ŵenaŵa atuzgiki mujeri kweni khoti lingukana kuŵatuzga. Mumalu mwaki, akweruzga angweruzga mwakutole chikalata chakutuliya kwa dokotala wa chipatala cha muchigaŵa cha Kurgan yo wangukamba kuti Mubali Lubin ndi Isakov alivi suzgu yeyosi yo yingaŵatondekesa kuja mujeri kulindizgiya mulandu wawu.

Pa 8 August 2021, maloya ngangutumiza dandaulu lawu ku ECHR. Pavuli paki wupu wa ECHR ungutumiza pemphu ku ofesi ya Loya Mura wa ku Russia (General Prosecutor’s Office of the Russian Federation). Pa 24 August, 2021, anguŵatumiza so kuchipatala cha Kurgan Regional Clinical Hospital. Pa nyengu iyi, madokotala ngangusaniya kuti Lubin ndi Isakov ŵe ndi atama ukongwa ndipu akhumbika cha kuja mujeri.

Tipemphere abali ŵaŵi ŵenaŵa wo alutirizga kuja akugomezgeka kwaku Yehova chinanga kuti atombozgeka kweniso atama. Tiziŵa kuti Yehova walutirizgengi “kuŵalongo nthazi zaki.”—2 Mbiri 16:9.