Pa 24 November 2020, khoti la mutawuni ya Petropavlovsk-Kamchatskiy muchigaŵa cha Kamchatka likumusaniya ndi mulandu Mubali Sergey Ledenyov. Likumuyeruzga kuti wangapalamulanga mulandu wewosi cha kwa vyaka viŵi kweniso kuti wakawonekiyengi ku polisi kwa vyaka vitatu. Iyu walutengi kujeri cha.

Pa zuŵa lakumaliya la mulandu waki, Sergey wangukonkhoska mwachiganga cho kuja Akaboni aku Yehova kung’anamuwa. Iyu wangukamba kuti: “Yehova ndi zina la ŵanthu cha, gulu pamwenga chigomezgu. Yehova ndi zina laku Chiuta. Mu Bayibolu, mu buku la mchimi Yesaya, Yehova wadana ateŵeti ŵaki akugomezgeka kuti ‘akaboni ŵangu.’ Mwakukoliyana ndi mazu ngenanga, zina lakuti ‘Akaboni aku Yehova’ linguzomerezgeka pa unganu wo unguchitika mu 1931. Zina lenili lilongore limu vo kaboni waku Chiuta wakhumbika kuchita. Vinthu vaki nkhukambiya ŵanthu vakukwaskana ndi Iyu nge Mulengi, Mtaski, Wakulamuliya wa chilengedu chosi kweniso vakukwaskana ndi vo wakhumba kuchitiya ŵanthu. Wenuwu ndi mwaŵi ukulu ukongwa kwaku ini ndipuso kwa ateŵeti anyangu.”—Yesaya 43:10.

Ndi chivwanu cha nthazi, Sergey wangukambiya khoti kuti: “Palivi chifukwa chakuti ndichitiyi soni, nge kuti nde ndi mulandu. Njuŵi yangu njituŵa pamasu paku Chiuta kweniso ŵanthu.”