DECEMBER 16, 2021
RUSSIA

Kuŵerenga Bayibolu Zuŵa Lelosi Kwawovya Abali Ankhondi ndi Mzichi Kukunthiyapu Kutombozgeka

JULANI

Nyengu yo Khoti Liyeruzgiyengi Mulandu

Pambula kuswera yapa, khoti la muchigaŵa cha Leninskiy ku Saransk liperekengi cheruzgu pa mulandu wa Mubali Denis Antonov Vladimir Atryakhin, Aleksandr Korolev, Georgiy Nikulin, Mzichi Yelena Nikulina ndi Mubali Aleksandr Shevchuk. Loya wa boma wechendakambi cheruzgu cho wakhumba kuti abali ndi mzichi widu apaskiki
Pa 11 June 2021

Khoti la muchigaŵa cha Leninskiy ku Saransk lingwamba kuvwisiya mulandu
Pa 2 April 2021

Yelena angumumba mulandu wakuti wachita vinthu va gulu lakofya kweniso kulembera ŵanthu kuti asere kagulu kenaka
Pa 31 March 2021

Vladimir angumumba mulandu wakuti wanozga vinthu vakukwaskana ndi gulu lakofya
Pa 2 July 2019

Aleksandr Shevchuk ndi Georgiy anguŵatuzga mujeri mo alindizgiyanga mulandu wawu ndipu anguŵayeruzga kuti angatuwangamu cha muchigaŵa chawu
Pa 28 March 2019

Vladimir angumutuzga mujeri mo walindizgiyanga mulandu waki ndipu angumuyeruzga kuti wangatuwangamu cha muchigaŵa chaki
Pa 8 February 2019

Aleksandr Shevchuk, Vladimir ndi Georgiy anguŵajaliya mujeri kulindizgiya mulandu wawu
Pa 4 February 2019

Apolisi a FSB angujuliya mulandu abali ankhondi ndipuso Yelena chifukwa chakunozga vinthu vakukwaskana ndi gulu lakofya

Vakukwaskana ndi Ŵanthu Yaŵa

Denis Antonov

Chaka cho Wakuwiya: 1976 (Syktyvkar, Komi Republic)

Mo Wakukuliya: Po wenga mwana, kanandi banja lawu lasamangasamanga chifukwa cha ntchitu yo awisi agwiranga. Wangusambira sukulu pa koleji yinyaki kuti waje makanika kweniso wanozgengi magesi mu mgodi

Wangugwira ntchitu mu mgodi nge wakunozga magesi kwa vyaka vinkhondi. Watanja kujambula vithuzi ndipuso kutchaya tchesi

Wenga ndi mafumbu nganandi ngakukwaskana ndi Chiuta ndipu wayesesanga kuti wavwisi mabuku nga chisopa kweniso Bayibolu. Pa nyengu yo wagwiranga ntchitu nge msilikali, wakoliyananga ndi munyaki yo wasambiranga Bayibolu ndi Akaboni aku Yehova. Kusambira vakukwaskana ndi uneneska wa mu Bayibolu ndipuso zina laku Chiuta, lakuti Yehova kungumufika pa mtima Denis. Wakubatizika kuja Kaboni waku Yehova mu 1998. Wakutorana ndi Olga mu 2015

Vo Denis Wangumuka Wati Wafumbika

Mungazumbuwapu vesi la mu Bayibolu lo lingukuwovyani kuti muje ndi chiganga ndipuso kukunthiyapu?

Limoza mwa mavesi ngo nditingayanja ukongwa ndi Genezesi 15:1 . . . Vesi ili ndapade ukongwa kwaku ini chifukwa ndilu lazanga mumaŵanaŵanu mwangu ndi mazulu po apolisi a FSB angundisaniya munyumba mwidu ndipu angundito kuti akandifumbi mafumbu. . . . Lingundiwovya kuja wakufwasa ndipuso kulutirizga kuja wakugomezgeka.

Vladimir Atryakhin

Chaka cho Wakuwiya: 1987 (Rozhdestveno, Republic of Mordovia)

Mo wakukuliya: Wakulereka ndi mpapi yumoza. We ndi mvurwa waki. Watanja kutchaya bola la malundi, volleyball ndi hockey. Wachita bizinesi yakupanga mapulogilamu nga pa kompyuta. Wagwira ntchitu nge administrator

Wangwamba kwanja kuŵerenga Bayibolu weche pa sukulu. Wakubatizika kuja Kaboni waku Yehova mu 2004. Wakutorana ndi Mariya mu 2009. Banja ili le ndi ŵana anamana ŵawi, wo panyengu yo Vladimir wamangikanga, mwana munyaki wenga ndi myezi 9 ndipu munyaki wenga ndi vyaka viŵi

Vo Vladimir Wangumuka Wati Wafumbika

Kumbi ubwezi winu ndi Yehova wakho wuli munyengu ya masuzgu?

Kusiyana ndi banja langu, kwandipwetekanga ukongwa mu mtima ndipuso ndasuzgikanga maŵanaŵanu. Pa nyengu yo ndingutoleke kujeri kuchilindizgiya mulandu, yumoza mwa ŵanthu wo agwira ntchitu wasayinanga makalata nganyaki. Sonu iyu wangundifumba kuti: Ntchifukwa wuli arara aboma alimbana nani? Ndakhumbikanga kumukambiya kuti ndifipiya mtima banja langu. Mwaliŵi iyu wangundikambiya kuti: “Ŵanthu ŵaku alijowongi lija cha banja laku.” . . . Iyu wang’anamuwanga kuti ŵanthu wo ndiwungana nawu ndiwu aliphweriyengi banja langu . . . Venivi vingundiwovya kuziŵa kuti Yehova wagwiriskiyanga ntchitu alonda akuwonere jeri kundikumbusa kuti ndikhumbika kumuthemba. Ndati ndatuwa kujeri ko ndalindiziyanga mulandu kweniso ndati ndakambiskana ndi muwolu wangu, ndinguzizwa kuwona mo Yehova wanguphwere banja langu mwachanju kuziya mwa ŵanthu wo tiwungana nawu.

Aleksandr Korolev

Chaka cho Wakuwiya: 1978 (Ku Zemetchino, Muchigaŵa cha Penza)

Mo wakukuliya: Wakuleleka kwambula awisi. Weche mwana wayanga kuŵeja ndipuso kutchaya bola. Wati wamaliza masambiru ngaki pa sukulu yinyaki, wagwiranga ntchitu yakwendesa chithilaki ndipuso yakunozga machini. Wagwiranga so ntchitu ya yakuryisa ndi kuyandanisa viŵetu. Pasonu panu wagwira ntchitu ya ukalipentala

Wati wayamba kusambira Bayibolu ndi Akaboni aku Yehova wangusaniya kwamuka kwa mafumbu ngo ngangumusuzga kwa vyaka vinandi. Wakubatizika mu 1998. Mu 2006, wakutorana ndi Natalya yo we ndi mwana yumoza munthulumi ndipu alere limoza

Vo Aleksandr Wangumuka Wati Wafumbika

Kumbi mwayanduwa wuli chifukwa chakusanirika pa mawunganu sabata yeyosi?

Chigaŵa chakuŵerenga Bayibolu pa mawunganu cho chisanirika mukati mwamawunganu nga pa sabata chitindiwovya ukongwa. Asani ndiŵerenga vakuwoniyapu va ateŵeti aku Yehova a munyengu yakali ndichiskika ukongwa chifukwa cha chiganga ndipuso chivwanu cho angulongo. Kugwiriskiya ntchitu masachizu ngo tisambira pa maunganu kutindiwovya kuti ndichitengi vinthu mwalisungu. Ndilutirizga kupempha ulongozgi wa mo ndingachitiya kuti ndichitengi vinthu mwazeru ndipuso kuleka . . . kuchita vinthu vo vingafipiska zina laku Yehova.

Georgiy Nikulin

Chaka cho Wakuwiya: 1963 (Rovenky, Ukraine)

Mo wakukuliya: Wakusambira ntchitu ya udilayiva kweniso umekaniki. Waziŵa so kuŵika vithuzi munyuzipepala, kunozga masetilayiti dishi, vinthu va munyumba ndipuso kusema viboliboli

Watanja kuŵerenga ndikusambira vinthu vifya. Wakhumbisiskanga kuziŵa ko taŵanthu tikutuliya. Wati Wayamba kusambira Bayibolu ndi Akaboni aku Yehova wangusaniya kwamuka kwa mafumbu ngakukhorwesa ngo wenga nangu.

Vo Georgiy Wangumuka Wati Wafumbika

Ntchinthu wo cho chingukuwovyani kuti mulutirizgi kuja ndi chivwanu ndipso chiganga pa nyengu yo mwenge kujeri?

Kufufuza Malemba ndi kuŵanaŵaniyapu mavesi nga mu Bayibolu kungundiwovya ukongwa. Kuluska vosi, [mu Bayibolu] mwevakuwoniyapu vinandi ukongwa va ateŵeti aku Yehova wo angulongo chivwanu ndipuso chiganga. Ndikondwa ukongwa kuyezga chivwanu chawu.

Tiziŵa kuti kwamba kali Satana wagwiriskiya ntchitu maboza kuti watitondekesi kukunthiyapu. Tiziŵa so kuti tikhumbika cha kungasunga mu mtima maboza ngosi ngo wagwiriskiya ntchitu pamwenga vinthu viheni vo watitikambiya chifukwa tiziŵa kali kuti ndivu vitichitikiyengi.

Yelena Nikulina

Chaka cho Wakuwiya: 1968 (Monastyrskoe, Republic of Mordovia)

Mo wakukuliya: Weche mwana wayanjanga kuchita masaza mu ayisi ndi kusona. Wangusambira vakusona ndipu pavuli paki wangusambira mo wangadumuliya salu zakukhumba kusona. Wangusamiya ku Saransk ndi Tolyatti chifukwa chakupenja ntchitu. Wakugwirapu ntchitu yakusona malaya. Pasonu panu wagwira ntchitu yakunozga malu

Wakutolana ndi Georgiy mu 2016. Wangwamba kusambira Bayibolu. Wakusambira kuti Chiuta wakwaskika ukongwa ndi masuzgu ngo taŵanthu tikumana nangu ndipu ngwalisungu kweniso ngwachanju. Wakubatizika kuja Kaboni waku Yehova mu 2017

Vo Yalena Wangumuka Wati Wafumbika

Kumbi munguyanduwa wuli chifukwa cha chovyu chakutuliya kwa abali ndi azichi ŵinu?

Pati pajumpha chaka kutuliya po [apolisi] angufufuziya, nyumba yidu yingubuka motu ndipu tengavi pakuja. . . . Abali ndi azichi angutiwovya ukongwa ndipu venivi vinguŵakwaska ukongwa abali ŵangu. Pasonu panu alondo fundu za mu Bayibolu pa umoyu wawu ndipu [aluta panthazi mwauzimu].

Aleksandr Shevchuk

Chaka cho Wakuwiya: 1989 (Pyatigorsk, Muchigaŵa cha Stavropol)

Mo wakukuliya: Wakusambira vakukwaskana ndi kuzenga. Pavuli paki wangusamiya ku Saransk. Wangwamba kugwira ntchitu ku kampani yinyaki ya vakukhomakhoma. Watanja basketball ndi table tennis

Ambuyaki anthulumi ndi anthukazi ŵenga kuSiberia ko atombozgekanga chifukwa chakuti ŵenga Akaboni aku Yehova. Apapi ŵaki wosi akuwiya ku Siberia

Wakubatizika mu 2006. Wagwiranga ntchitu zinyaki mumalu mwa kusere usilikali wo munthu weyosi watesa kuchichizgika kuti wasere

Vo Aleksandr Wangumuka Wati Wafumbika

Kumbi ndi vinthu wuli vamampha vo vakuwovyani kukunthiyapu kutombozgeka pa nyengu yo mwenga mujeri kwa myezi yinayi kulindizgiya mulandu winu?

Pa nyengu yo ndenga mwana, mubanja lidu takambiskananga lemba la zuŵa techendaryi chakurya cha mulenji. Venivi vandipaskanga nthazi ukongwa pa umoyu wangu ndipu ndingulutirizga kuchita venivi chinanga mphanyengu yo ndenga kujeri. Pakwamba, ndengavi Bayibolu ndipu ndayesesanga kukumbuka vesi pamwenga chakuwoniyapu cha muteŵeti waku Yehova ndi kulunguluka. Nkhani yakwamba yo ndingukumbuka nja pa Yesaya 40:26-31. Lemba ili ndimoza mwa malemba ngo nditingayanja ukongwa. Litindiwovya kuleka kuluwa kuti Yehova ndiyu Mulengi kweniso kuti iyu ndiyu wanthazi ukongwa. Iyu wagwiriskiya ntchitu nthazi zenizi kuti watipaski nthazi pa nyengu yo tikumana ndi masuzgu chinanga kuti teŵanthu waka.

Tigomezga kuti Yehova walutirizgengi kuŵalongo chanju chambula kumala ndipuso kugomezgeka abali ndi azichi ŵidu akwanjiwa wo atombozgeka ku Russia po alutirizga kuthemba Iyu.—Genezesi 32:10.

NKHANI