Pa 18 February 2021 * Khoti la Birobidzhan lo le muchigaŵa cha Jewish Autonomous lazamupereka cheruzgu chaki pa mulandu wa Mzichi Yuliya Kaganovich. Loya wa boma wechendakambi cheruzgu cho wakhumba kuti mzichi uyu wapaskiki.

Yuliya Kaganovich

• Chaka cho Wakuwiya: 1966 (Mikhaylovka, Chigaŵa cha Volgograd)

• Mo Wakukuliya: Wangusambira uyinjiniya. Weche mwana, wasambiranga ku sukulu yo asambiziyangaku vakuvinavina, wangumaliza masambiru ngaki nga va sumu, wenga mugulu la ŵanthu wo atumba ving’wenying’wenyi ndipuso kwaya. Mulumu waki Aleksandr ndi Kaboni waku Yehova cha kweni watimuwovya Yuliya ndipu wagomezga kuti mulandu wo atimumba ulongore limu kuti atimuchitiya vinthu mwambura urunji

  Wati wawona kuti abali ŵaki anyaki atayika, wangwamba kuŵanaŵaniya chifukwa cho taŵanthu tijaliya ndi umoyu. Kwamuka kwa mu Bayibolu kungumuwovya kuti waje ndi chimangu chamumtima ndipuso chilindizga. Wakubatizika mu 1998. Fundu za mu Bayibolu zamuwovya kuti waje ndi nthengwa yakukho, waje pa ubwezi wamampha ndi ŵanthu anyaki kweniso kuti waleri umampha mwana waki munthulumi Artur, yo ndi Kaboni waku Yehova

  Mzichi uyu wasuzgika kali muliŵavu. So mulandu wo atimumba uchitiska kuti wasaziyengeku so masuzgu nganyaki

Asani wakumbuka vo vinguchitika Mzichi  Yuliya Kaganovich wangukamba kuti: “Ndati ndavwa kugong’oska pa chisasa ndi mulenjilenji nyengu yeniyo ndinguziŵa kuti atenere kuja yiwu. Mtima wangu ungwamba kutchimbiya ukongwa ndipu ndawerezanga waka mazu ngamoza ngakuti: ‘Yehova, chondi ndiwovyeni. Yehova, chondi ndiwovyeni.’”

Pa 10 October 2019 mzichi widu mwenuyu wa vyaka 53 wangwamba kutombozgeka chifukwa vo wagomezga mutawuni ya Birobidzhan ku Russia. Apolisi a FSB (Russian Federal Security Service) angufufuza nyumba yaku Yuliya ndi mulenjilenji ndipu pazuŵa lenili angufufuza so nyumba zakujumpha 20 za abali ndi azichi ŵidu muchigaŵa chenichi.

Vo vinguchitika pa zuŵa ili venga vakuderuwa nthazi, kweni Yuliya ndi Akaboni anyaki alutirizga kuja akugomezgeka chifukwa angunozgeke limu.

Yuliya wangukamba kuti: “Kanandi ku maunganu takumbusananga kuti tikhumbika kunozgeke limu chifukwa apolisi angaza kuzifufuza munyumba zidu. Pakuti ndaziŵanga kuti vingachitika nyengu yeyosi ndingunozgeke limu mu mtima mo ndingazichitiya kweniso mo ndingazimukiya.” Iyu wangulutirizga kukamba kuti: Ndinguziŵa kuti chakukhumbika ukongwa nkhuziŵiya limu vo ndingazichita. Venivi vingundiwovya kuti ndiŵanaŵanengi mwaliŵi vo ndingachita mumalu mwakuchita mantha mpaka kusoŵa chakuchita.”

Mwambula so kurya nyengu arara aboma ku Russia anguŵajuliya mulandu ŵati afufuza waka nyumba za abali zenizi. Yuliya ndi anyaki ambika mulandu kuti achita vinthu vakofya.

Pa 3 March 2020, arara aboma anguluta ndi mulandu wenuwu ku Khoti la Birobidzhan. Mulandu uwu anguwumika dankha kwa myezi yinkhondi chifukwa cha mulili wa COVID-19. Yuliya wanguwere so ku khoti pa 22 October 2020.

Yuliya wangukamba kuti: “Munthowa yinyaki ndingakamba kuti ndakhumbanga cha kuti venivi vindichitikiyi. Kweni ku rwandi linyaki ndingukondwa ukongwa kumiya ulamuliru waku Yehova.

Iyu wanguti: “Lemba la Yesaya 41:10 ndilu ndakhumbikiyanga nadi pa nyengu iyi. Ndingupulinta vesi lenili ndikulibatika mu nyumba mwangu kuti nyengu zosi ndikumbukengi mazu ngakuchiska ngo Yehova Chiuta watindikambiya. Ndajiwone ndija mo Yehova wandichiskiya ndi kundipaska nthazi.”

Yuliya wanguyesesa kuloŵeza malemba nganandi ngo ngatimuwovya kuti waje wakufwasa, wachiganga ndipuso kuti wakondwengi chinanga kuti wakumana ndi masuzgu.

Tiyeni tosi tichitengi vinthu mwazeru mwa kunozgeke limu vo tingazikamba kweniso kuchita asani titombozgeka ndipuso kuja ndi chivwanu chakukho mwaku Yehova ndi chilatu chakuti tizije akunozgeka asani tazikumana ndi mayeseru munthazi. Tigomezga kuti “Yehova waŵanolengi cha chinthu chechosi chamampha ŵanthu wo atenda mwakugomezgeka.”—Salimo 84:11.