JANUARY 4, 2022
RUSSIA

Kunozgeke Ndipuso Chilindizga Vitovya Mubali Pyotr Krupnov ndi Muwolu Waki Maya

JULANI

Nyengu yo Khoti Liyeruzgiyengi Mulandu

Pa 30 December 2021

Khoti la muchigaŵa cha Nikolskiy ku Penza likumusaniya ndi mulandu Mubali Pyotr Krupnov ndi muwolu waki Maya, ndipu likuŵayeruzga kuti angapalamulanga mulandu wewosi cha kwa vyaka vitatu. Pa nyengu iyi yiwu alutengi kujeri cha
Pa 25 October 2021

Khoti lingwamba kuvwisiya mulandu wawu
Pa 12 October 2021

Pyotr ndi Maya anguŵaŵika pa mndandanda wa vigeŵenga ndipuso ŵanthu wo achita vinthu vakofya chifukwa chakukambiskana ndi mabwezi ngawu vakukwaskana ndi chisopa.
Pa 15 September 2021

Mulandu wakukwaskana ndi Maya ungwamba. Pavuli paki, Pyotr angwamba kumumbiya limoza mulandu ndi Maya
Pa 11 October 2020

Apolisi angufufuza munyumba zinayi za Akaboni aku Yehova ku Nikolsk, kusazgapu munyumba ya mubali ndi mzichi Krupnov

Vakukwaskana ndi Ŵanthu Yaŵa

Pyotr Krupnov

Chaka cho Wakuwiya: 1963

Mo Wakukuliya: Wagwiranga ntchitu ya upalambala. Wangwamba kusambira Bayibolu ndi Akaboni aku Yehova mu 1996. Wati waŵerenga mabuku ngidu kweniso kuwona nkharu ya munthu yo wamusambizanga Bayibolu, wangusimikiza kuti wasaniya nadi uneneska. Wangubatizika mu 2002

Wangukumana ndi Maya ku maunganu. Akutorana mu 2008

Vo Pyotr Wangumuka Wati Wafumbika

Kumbi mukumbuka nyengu yo munguwona kuti Yehova watikuwovyani?

[Ndikumbuka nyengu yinyaki] ndingupemphera kuti Chiuta wandipaski mzimu wakupaturika ndipu pavuli paki ndingukumbuka mazu nga paYohane 10:28, ngo ngakamba kuti: “palivi weyosi yo wazakuzikwatapuwa kujanja langu.” Kuŵanaŵaniya vesi lenili kungundiwovya kuti ndije wakukho kweniso walikondwa. Ndaziŵanga kuti Ada ŵangu andiwonanga ndipuso andiwovyanga. Venivi vingundiwovya kuti ndije wakufwasa kweniso ndileki kuja ndi mantha.

Ntchinthu wuli cho chitikuwovyani kuti mukunthiyengepu?

Nditesesa kukumbuka kuti kwali masuzgu ngidu ngangaŵa ngakusuzga wuli, kweni ngangayanana cha ndi mwaŵi wakuteŵete Yehova ndipuso kuzilonde umoyu wamuyaya mu paradayisu. Kwanja Chiuta kweniso ŵanthu anyaki kutindipaska nthazi zo ndikhumbika kuti ndikunthiyepu masuzgu ngangu.

Maya Krupnova

Chaka cho Wakuwiya: 1957 (Atasu, Kazakhstan)

Mo Wakukuliya: Wagwiranga ntchitu yakubika makeki. Pasonu panu wakuto peshoni ndipu wagwira ntchitu yakuphwere maluŵa

Wangwamba kusambira vakukwaskana ndi Akaboni aku Yehova kutuliya ku mwana waki. Iyu ndi mwana waki akubatizika mu 2001

Vo Maya Wangumuka Wati Wafumbika

Kumbi mungunozgeke wuli kutombozgeka kwenuku?

Ndingwamba kunozgeke pa nyengu yo abali ndi azichi ŵidu angwamba kumangika [mutawuni ya pafupi]. Ndiŵerenga mabuku nga mu Bayibolu nga Esiteri ndi Yeremiya. . . . Nditanja kuŵerenga nkhani zo zaŵikika pa webusayiti yidu ndipuso kuloŵeza sumu. Ndikunozge limu “kachikwama” kakunyamuwa pangozi ndipuso chikwama cho ndinganyamuwa kujeri. . . . Ndipemphera kuti Chiuta wandipaski zeru ndi chiganga kuti ndilutirizgi kuja wakufwasa ndipuso ndileki kuchita mantha asani nditombozgeka.

Kumbi abali ndi azichi awovya wuli banja linu mwauzimu?

Nyengu zosi, abali ndi azichi atindichiska, ukongwa pa nyengu yo ndipenja chovyu. Pa nyengu yo ndasuzgikanga ukongwa maŵanaŵanu, abali ndi azichi andilembiyanga makalata ndikundikambiya kuti atindiyanja ukongwa. . . . Nyengu zosi ndaziŵanga kuti nde mubanja likulu kweniso lachanju. Kweni fundu yeniyi ndayiziŵa ukongwa kwambiya mu 2020.

Tichiskika ukongwa ndi chakuwoniyapu chamampha chaku Pyotr ndi Maya, wo alutirizga kuja ndi ndondowa yakukho yachilindizga ndipuso kuthemba Yehova.—Aheberi 6:19.

NKHANI