Khoti lo le mu Chigaŵa cha Krasnoyarsk mutawuni ya Sharypovo, pambula kuswera yapa liperekengi cheruzgu pa mulandu wa Mubali Anton Ostapenko. a

Anton Ostapenko

• Chaka cho Wakuwiya: 1991 (Ku Ekibastuz, Kazakhstan)

• Mo Wakukuliya: Wagwira ntchitu yakuwonere mo mathanki nga maji ngakufunda ngagwiriya ntchitu. Iyu ndi mzichi waki angusambizika Bayibolu ndi anyinawu ŵeche anyamata. Mu 2005 ndimu wakubatizikiya kuja Kaboni waku Yehova

  Wakutorana ndi Natalya mu 2015. Wosi akondwa kuchita masaza mumalu ngo mwe sinoo ndipuso ayisi. Anton wakondwa kumba gitala, kubaya somba ndipuso kutchaya tenesi

Pa 19 April 2019, apolisi mutawuni ya Sharypovo anguchifufuza nyumba 10 za Akaboni aku Yehova ndipuso kufumba mafumbu abali ndi azichi wo ŵengapu pa nyengu yo. Mubali Anton Ostapenko wangumangika pa zuŵa lenili ndipu anguchimujaliya mujeri kulindizgiya mulandu waki. Iyu wangutuzgika pa 20 December 2019. Mubali uyu atimumba mulandu wakuti watendesa ntchitu za gulu lo boma likamba kuti ndi gulu “lakofya.”

Anton wangukamba kuti pa myezi 6 yo wangujaliya mujeri, ndi mazuŵa ngamanavi waka ngo wanguja pa malu ngambula kamera, angumuzomereza kuti wakasukumuwi ndipuso ngo anguleka kumutombozgapu.

Pempheru ndilu lingumuwovya ukongwa kuja ndi nthazi. Anton wangukamba kuti: “Ndingupempha Yehova kuti wandiwovyi kukunthiyapu.” Iyu wangukamba so kuti: “Penga vinandi vakuti ndisambiri. Pa nyengu yeniyi, ndingukuwa mwauzimu ndipuso ndinguja wakukho. . . . Chakukondwesa ntchakuti, asani munthu wakumana ndi chiyesu [nge ichi], ndi nyengu yakuti ugwiriskiyi ntchitu vo ukusambira. Kweniso ndi nyengu zosi cha po mukachipinda ko akujaliya mutuŵa Bayibolu. Ndechendamangiki ndayanjanga kuŵerenga vakukwaskana ndi Yehova. Kweni nde [mujeri], Yehova wangundilongo kuti ndi Chiuta wamtundu wuli. Kukamba uneneska ndingukondwa ukongwa kuwona venivi! Kwaku ini wenga Chiuta Wanthazizosi waka cha, kweni Mbada achanju wo avwisa vo ndakumana navu ndipu atindiwovya panyengu yakwenere kweniso munthowa zo ini ndalekanga kuŵanaŵaniyapu.”

Sumu za Ufumu nazu zingumuchiska ukongwa. Iyu wanguti: “Nyengu zosi ini ndi muwolu wangu tambiyanga limoza sumu. Venivi vingutiwovya kuti tiziloŵezi ndipuso vingundiwovya ukongwa po ndenga mujeri kulindizgiya mulandu wangu. Asani nyengu yakuti tigoni yakwana, ndakondwanga ukongwa kupemphera ndipuso kumba sumu ndipu venivi vandiwovyanga ukongwa kujalikisa mtima wangu pasi ndipuso ndagonanga tulu tamampha.”

Po Anton walindizgiya cheruzgu cha khoti, iyu walutirizga kugwira ntchitu yo wagwiranga. Kweni akumukaniza kutuwa muchigaŵa cha Sharypovo cho waja. Venivi vichitiska kuti watondekengi kuluta ndi anyina kuchipatala.

Tigomezga kuti Yehova walutirizgengi kuŵapaska chimangu abali ŵidu kuti akunthiyepu po atombozgeka.—Yohane 14:27.