Pa 26, June 2020, ŵaraŵara ajeri ku Lgov anguchita vinthu mwambula kulondo marangu mwakuŵika Mubali Dennis Christensen mu kachipinda kanyaki ka jeri ko alangiyaku ŵanthu mwankhaza, ndi chilatu chakuti amulangi mwapade. Chifukwa chakuti Mubali Christensen watama, viwoneka kuti ŵara ajeri achita viyo kuti amugongowesi ukongwa ndi chilatu chakuti waleki kuja wakugomezgeka kwaku Yehova. Loya yo wamiya boma pa milandu, wangukamba so vinthu vinyaki vaboza ndi chilatu chakuti asuski cheruzgu cho khoti linguyeruzga pakwamba kuti Mubali Christensen watuzgiki mujeri. Ndipu loya munyaki yo wamiya boma pa milandu wangukoliyana nachu cheruzgu chenichi.

Mubali Christensen wagwira kali hafu ya vyaka 6 vo angumulangiya kuti waje mujeri. Kwa chaka, khoti laja lichikana pemphu laki lakuti watuzgiki. Pavuli pakuti boma lamukaniya maulendu ngatatu pemphu laki lakuti watuzgiki, pemphu laki lachinayi linguluta kukhoti. Pa 23, June 2020, khoti la mu chigaŵa cha Lgov, lingulamula kuti walipiri waka ndalama pa vyaka vo vingujaku vakuti wagwiri jeri. Loya wakumiya boma pa milandu yo wengapu po cheruzgu ichi chaperekekanga, wangukoliyana navu vo khoti linguyeruzga.

Kweni pati pajumpha waka mazuŵa ngaŵi, loya munyaki wa boma zina laki Mr.Aleksei Shatunov, wangukamba kuti vo khoti linguyeruzga vakoliyananga cha ndi marangu. Iyu wangukamba kuti cheruzgu chenichi chimi dankha ndipu mlandu uwu ukayeruzgiki so mu khoti lenili ndi wakweruzga munyaki. Mr. Shatunov wangukamba venivi chifukwa cha malipoti ngaheni ngo ŵara ajeri a ku Lgov angukamba kuti Mubali Christensen “walimbikiyanga cha kugwira ntchitu ndipuso kuti wenga ndi nkharu yiheni ku jeri.”

Pa nyengu yo avwisiyanga mulandu wa Mubali Christensen pa June 23, wo amiyanga jeri angukamba so fundu zo angukamba pakwamba kweni yo wayeruzganga wangukamba kuti vo yiwu angukamba venga vambula kuvwika. Loya yo wamiya Mubali Christensen, wangulongo khoti vimakalata va kuchipatala, vo valongonga kuti Mubali Christensen watama ndipu venivi vachitiskanga kuti watondekengi kugwira ntchitu za ku jeri. Pakukamba vo vachitikanga ku jeri, wakumiya jeri munyaki wangukamba kuti ku jeri, kwengavi ntchitu zakwenere zo Mubali Christensen wakhumbikanga kugwira chifukwa chakuti watama.

Pa nyengu yo loya wakumiya boma pa milandu wakhumbanga kupanga apilu kuti Mubali Christensen wangatuzgikanga liŵi cha mujeri, ŵaraŵara ajeri angulemba malipoti ngaŵi ngakukwaskana ndi Mubali Christensen. Mu lipoti lakwamba angukamba kuti iyu wenga ku malu ngakuryiya chakurya pa nyengu yambula kwenere. Ndipu mu lipoti lachiŵi angukamba kuti iyu wenga ku malu nga ntchitu wavwala tisheti pe kwambula kuvwala bachi. Chifukwa cha venivi, ŵaraŵara ajeri anguŵika Mubali Christensen mu kachipinda kanyaki kwa mazuŵa 10 kuti amulangi. Mwakukoliyana ndi marangu nga boma la Russia, ŵara ajeri angalanga mukayidi munthowa yeniyi asani watuswa kaŵikaŵi marangu ngakulungakulu ngajeri, kweniso pijapija asani dokotala wamupima mo liŵavu laki liliri. Mwaviyo, chifukwa chakuti Mubali Christensen wanguswa cha marangu ngajeri kweniso chifukwa chakuti dokotala wangumupima cha, pengavi chifukwa chakumulangiya viyo.

Mubali Christensen ndi mukayidi munyaki anguŵaŵika mu kachipinda ka mamita ngatatu mu utali kweniso mamita ngaŵi mu ufupi. Mukachipinda kenaka musere mupweya weneku cha kweniso mwe chuku. Venivi vichitiska kuti umoyu wa Mubali Christensen ulutirizgi kuŵa pangozi. Myezi yimanavi yo yajumpha Mubali Christensen wangutama vilasu kweniso wasuzgika ukongwa ndi msana. Loya wa Mubali Christensen wangukamba kuti “ŵara ajeri aziŵa venivi kweni yiwu angumuŵika mu malu ngo wagonanga pa bedi la kulama, vo vachitiskanga kuti wavwengi urwirwi ukulu muliŵavu.”

Mubali Christensen wangukambiya loya waki kuti pa nyengu yo amumbanga mulandu kuti waswa marangu, wenga limoza ndi akayidi anyaki, kweni iyu pe ndiyu angumupaska chilangu. Loya wa Mubali Christensen wangukamba kuti: “Vo ŵara ajeri anguchita vititiwovya kuziŵa kuti yiwu anguchita kunozga pulanu yakuti Dennis waleki kutuzgika nge mo khoti linguyeruzgiya pakwamba.”

Po ŵaraŵara a boma la Russia alutirizga kupanga nthowa zasonu kweniso zakofya zakutombozge abali ŵidu ku Russia, tigomezga mbwenu kuti Yehova wajengi malu ngakuthaŵiyaku ngakuvikilirika nga abali ŵidu ŵenaŵa. Tiyeni tosi tilutirizgi kupemphera kuti Yehova wapaski Mubali Christensen ndi muwolu waki Irina, chechosi cho akhumbikiya kuti alutirizgi kuja akugomezgeka pa nyengu yakusuzga ukongwa yeniyi.—Salimo 94:13, 21, 22.