Pambula kuswera yapa, khoti la Neftekumskiy lo le Muchigaŵa cha Stavropol liperekengi cheruzgu chaki pa mulandu wa Mubali Aleksandr Akopov, Konstantin Samsonov, ndi Shamil Sultanov. a Loya wa boma wechendakambi cheruzgu cho wakhumba kuti abali yaŵa apaskiki.

Aleksandr Akopov

• Chaka cho Wakuwiya: 1992 (Ku Neftekumsk)

• Mo Wakukuliya: Iyu, awisi ndipuso mku waki agwiranga ntchitu yakuzenga. Watanja kutchaya bola la malundi, basketball ndi tenesi, kuchiwona malu ndipuso kubika

  Wakubatizika mu 2007 we ndi vyaka 14

Konstantin Samsonov

• Chaka cho Wakuwiya: 1977 (Neftekumsk)

• Mo Wakukuliya: Weche wachinyamata wayanjanga kutchaya tchesi ndipuso wayanjanga kompyuta. Pasonu panu wagwira ntchitu nge injiniya ku chipatala. Iyu ndi muwolu waki, Svetlana angwamba kusambira Bayibolu ndi Akaboni aku Yehova mu 1998. Yiwu angubatizika mu 2000. Ŵe ndi mwana yumoza munthulumi

Shamil Sultanov

• Chaka cho Wakuwiya: 1977 (Ku Mahmud-Mekteb, Muchigaŵa cha Stavropol)

• Mo Wakukuliya: Wanozga nyumba zo zanangika. Wangusambira Bayibolu ndi Akaboni aku Yehova cha mu ma 2000. Wakubatizika mu 2003. Wakutolana ndi Elena mu 2004. Iyu wangumuwovya muwolu waki kulera mwana waki wamusaniyapu

Pa Chisulu, pa 26 August 2017, apolisi anguzunguliya Akaboni aku Yehova 18 wo anguluta kunyanja kuchitembeya kufupi ndi ku Neftekumsk. Pa Akaboni ŵenaŵa penga so ŵana ndi akukota, ndipu wosi anguŵakweza basi ndi kuluta nawu ku polisi. Ŵati afika ku polisi abali yaŵa angufumbika mafumbu kwa maora ngatatu. Pavuli paki, apolisi anguchifufuza nyumba za abali ndi azichi anandi ku Neftekumsk ndipu ajaliyanga waka kuŵaŵenda. Aleksandr, Konstantin, ndi Shamil angumangika ndipu anguja mujeri pafufupi chaka champhumphu kulindizgiya mulandu wawu.

Aleksandr wangukamba kuti wawopanga kuja mujeri chifukwa wasuzgika maŵanaŵanu ndipuso watamatama. Iyu wangupempha Yehova kuti wamuwovyi kuja ndi maŵanaŵanu ngakwenere kuti wakunthiyepu po we mujeri. Aleksandr wangukamba kuti: “Kanandi ndayanjanga kumukambiya Yehova kuti ndingafiska cha kuja mujeri. Ndigomezga cha kuti ndingufiska kukunthiyapu kuja mujeri [pafufupi] chaka.” Yehova wangumuka mapempheru ngaki ndipu wangumuwovya kukumbuka mavesi nga mu Bayibolu pa nyengu yo wengavi Bayibolu. Iyu walembanga vesi lelosi lo walikumbuka ndipu mulenji wewosi wawonanga vesi limoza ndikuŵanaŵaniya mo lingamuwovye pa suzgu yaki. Venivi vingumuwovya kuti waŵanaŵanengi ukongwa nge Yehova.

Konstantin wanguja ndi chiganga ukongwa chifukwa cha makalata nganandi ngo muwolu waki wamulembiyanga. Mu kalata yinyaki, iyu wangukamba kuti muwolu waki wangumuchiska kuti wawonengi mayeseru ngo wakumana nangu nge vinthu vakukondwesa. Konstantin wangukamba kuti: “Venivi vingundikondwesa ukongwa ndipu pati pajumpha kanyengu vinthu vingujaku umamphaku.”

Shamil wangukamba kuti myezi yimanavi yakwambiriya yo wenga mujeri kulindizgiya mulandu waki yenga yakusuzga ukongwa. Shamil wangukamba kuti: “Pati pajumpha nyengu vinthu vingwamba kwenda umampha. Wenuwu wenga ukaboni wakuti ndenga ndija cha.” Pa nyengu yosi yeniyi, wangusambira mo wangathembe Yehova mwakuleka kufipiya mtima ukongwa masuzgu ngo wangazikumana nangu kunthazi.

Abali wosi atatu wenaŵa angaŵakaniza kugwiriskiya ntchitu intaneti pamwenga foni ndipuso anguŵakaniza kutuwa mucharu chawu kuluta mucharu chinyaki. Venivi vichitiska kuti viŵi vakusuzga kwaku Aleksandr kulonde munkhwala wo wakhumbikiya. Ndipu vachitiska so kuti Konstantin nayu watondekengi kugwira ntchitu yaki yakupanga mapulogilamu nga pa kompyuta. Chinanga kuti akumana ndi masuzgu, abali yaŵa mbakukhumbisisa kulutirizga kuja akugomezgeka kwaku Chiuta wawu.

Tiziŵa kuti Yehova walutirizgengi kutumbika abali ŵidu ŵenaŵa po alutirizga kumuthemba.—Salimo 20:7.