Pambula kuswera yapa, Khoti la Circassian ku Karachayevo-Circassian Republic liperekengi cheruzgu chaki pa mulandu wa Mubali Albert Batchaev. a

Albert Batchaev

• Chaka cho Wakuwiya: 1976 (Ku Karachayevsk)

• Mo Wakukuliya: We ndi azichi ŵaki atatu ndi mvurwa waki yumoza. Anyina akutayika ndipu iyu ndiyu waphwere awisi wo mbakukota. Wakusambira va uloya pa sukulu yinyaki ya asilikali ndipu wagwiranga ntchitu nge mura wa akufufuza milandu.

  Wangwamba kusambira Bayibolu ndipu wangukhorwa kuti vo likamba. Wakubatizika mu 2004 kuŵa Kaboni waku Yehova. Wakutorana ndi Zhanna, mu 2007. Pasonu panu, wagwira ntchitu yakuŵika visasa kuti wasaniyi ndalama yakuguliya vakukhumbika pa umoyu. Kweni wangagwira ntchitu zinandi cha chifukwa cha masuzgu nganyaki ngo wenangu muliŵavu. Iyu ndi muwolu waki Zhanna, atanja kwendesa galimotu mu malu ngakupambanapambana ndipuso kuchitembeya ku mapiri nga muchigaŵa chawu.

Pa 16 December 2019, gulu la apolisi achisisi la FSB (Federal Security Service) linguchifufuza nyumba zinandi mu tawuni ya Cherkessk. Venivi vinguchitiska kuti abali anandi amangiki.

Pati pajumpha zuŵa limoza, wosi anguŵatuzga kupatuwapu Mubali Albert Batchaev. Ŵaraŵara angukamba kuti amujaliyengi dankha mujeri kwa maora pafufupi 72 ndipu pavuli paki angukamba kuti we ndi mulandu wakuti walongozga anyaki kumba sumu kweniso kupemphera kwaku Yehova. Ŵati amujuliya mulandu Albert, ŵaraŵara aboma angwamba kulondo abwezi ŵaki kweniso anyaki wo wenga nawu limoza.

Albert wangukamba kuti: “Ndinguchita mantha ukongwa ŵati andijaliya mujeri ndipuso ndati ndawona chiloku chikulu chachisulu, cho chawonekanga chakofya chenicho anguŵika pachisasa cha chipinda cho ndenga. Ndinguŵanaŵana kuti mbwenu kwamala, ndituwengi so cha ndipu ndifwiyengi mwenimunu. Ndafipiyanga mtima muwolu wangu kweniso abali.”

Albert wanguja mujeri myezi pafufupi yiŵi, pavuli paki angumutumiza kunyumba kwaki kuti ndiku wakagwiriyi ukayidi wa panyumba. Kweni pati pajumpha waka sabata yimoza, anguchimujaliya so mujeri ndipu wangujamu kwa masabata 7. Albert wangukamba kuti: “Nde mujeri, ukongwa po ndenga mukachipinda kakundija, ndipu ndinguvwisa umampha ukongwa kukhumbika kwakuja ndi ndondomeku yakuchitiya vinthu vauzimu ndipuso kuchita vinandi mu ntchitu ya Ufumu. Venivi vingundipaska nthazi zo ndakhumbikiyanga kuti ndileki kuwere vuli kweniso kuti chivwanu changu chije chakukho, ndikunthiyengepu, ndije ndi chilindizga ndipuso kuti ndimuyanjengi ukongwa Yehova kweniso abali ŵangu.”

Pa nyengu yo wenga mujeri, wenga ndi mwaŵi wakusaniya Bayibolu, kweni ndi nyengu zosi cha po mujeri muja Bayibolu. Albert wangukamba kuti: “Bayibolu ndilu lingundiwovya ukongwa. Lingundiwovya kuti ndileki kutaya mtima kweniso kuti ndileki kujaliya waka kufipa mtima kuti nde kwakundija kwambula ŵanthu wo nditiŵayanja.” Pa nyengu iyi, wanguvwisa so ukongwa mo ŵanthu akugomezgeka wo azumbulika mu Bayibolu avwiyanga pa nyengu yo atombozgekanga kweniso kumangika. Iyu wangukamba kuti: “Po ndenga mujeri, ndipu ndinguvwisa umampha vo ŵanthu ŵenaŵa angukumana navu kweniso mo avwiyanga ndipu ndinguchiskika ukongwa. Pasonu panu, ndiwona kuti nde ndi mabwezi nganandi, nga munyengu yakali ndi munyengu yidu yinu.”

Mu April 2020, khoti lingukamba kuti Albert wakagwiriyi ukayidi waki kunyumba kwa myezi yiŵi. Kwa maulendu nganayi, nyengu iyi ayisazgiyaku. Kwambiya kukumaliya kwa mwezi wa March akumusazgiyaku so nyengu yeniyi mpaka kukumaliya kwa mwezi wa June 2021.

Tiziŵa kuti Yehova walutirizgengi kumupaska nthazi kweniso kumuphwere Mubali Batchaev ndi ateŵeti anyaki wosi akugomezgeka wo atombozgeka.—1 Mbiri 29:12.