Pambula kuswera yapa, Khoti la Zavodskoy ku Kemerovo liperekengi cheruzgu chaki pa mulandu wa Mubali Aleksandr Bondarchuk ndi Sergey Yavushkin. a

Aleksandr Bondarchuk

• Chaka cho Wakuwiya: 1974 (ku Topki, Muchigaŵa cha Kemerovo)

• Mo Wakukuliya: Awisi akutayika iyu we ndi vyaka 19. Wanguluta ku sukulu yakusambiza kwendesa magalimotu ngakulungakulu. Pavuli paki, wangusambira ukalipentala. Pasonu panu wagwira ntchitu yakunozga mashini ngakufundisiya vinthu asani nganangika. Watanja ulovi, kuchita masaza mu ayisi, kwendesa njinga ndipuso kutchimbiya

• Wakutorana ndi Elena mu 1992. Muwolu waki ndiyu wangwamba kusambira Bayibolu ndi Akaboni aku Yehova. Nthengwa yawu yingukho chifukwa chakugwiriskiya ntchitu fundu za mu Bayibolu. Ŵe ndi ŵana ŵaŵi anthulumi.

Sergey Yavushkin

• Chaka cho Wakuwiya: 1960 (ku Rubtsovsk, Muchigaŵa cha Altai)

• Mo Wakukuliya: Kwa vyaka vinandi waja wachigwira ntchitu yakuwotchere visulu. Pasonu panu, wagwira ntchitu yakunozga maloku. Kutuliya pa unyamata waki, watanja kumba gitala ndipuso kuchita masaza ngakupambanapambana

• Wakutorana ndi Tatiana mu 1990. Pati pajumpha waka nyengu yimanavi, angwamba kusambira Bayibolu ndi Akaboni aku Yehova. Yiwu angukhorwa kuona kuti chinanga kuti Bayibolu ndakali ukongwa, kweni ndakovya ukongwa mazuŵa nganu. Ŵe ndi mwana munthulumi ndipuso munthukazi

Pa 22 July 2019, cha mu ma 6 koloku mlenji, apolisi angufufuza kachiŵi munyumba ya Mubali Aleksandr Bondarchuk ndi Sergey Yavushkin. Panyengu iyi, abali ŵenaŵa angumangika ndipu awolu ŵawu angufumbika mafumbu. Apolisi ŵenaŵa angulonda so vipangizu va mazuŵa nganu va abali yaŵa.

Aleksandr ndi Sergey anguŵajaliya mujeri kwa mazuŵa ngaŵi. Pavuli paki, Khoti la Kemerovo linguŵayeruzga kuti akachiti ukayidi wapanyumba kwa myezi yiŵi, ndipu kwa maulendu 6 nyengu iyi aja achisazgiyaku.

Po achita ukayidi wapanyumba, abali wosi ŵaŵi yaŵa akukanizgika kwenda mtunda wakujumpha mamita 300 kutuwa pa nyumba zawu. Venivi vilongo kuti angaluta cha ku ntchitu. Kweni, abali yaŵa ŵechendambiki mulandu, ŵenga ndi mbiri yamampha muchigaŵa cho ajanga kweniso ajanga umampha ndi mabwana ngawu. Venivi vinguchitiska kuti mabwana ngawu, ngapemphi wo afufuzanga mulandu wawu kuti aŵazomerezi abali yaŵa kuluta kuchigwiranga ntchitu. Kweni akufufuza anguzomereza cha vo mabwana yanga ngangupempha.

Aleksandr ndi banja laki ajiwone ŵija mo Yehova watiŵawovye. Chifukwa chakuti Aleksandr wagwira ntchitu cha pasonu panu, ndipuso maakaunti ngawu ngaku banki akuŵajaliya, vakusuzga kuti asaniyi ndalama zakuguliya vinthu vakukhumbika. Kweni iyu wangukamba kuti: “Chifukwa chakuti atindimba mulandu, ndasambira kuthemba ukongwa Yehova. Ndechendayambi kutombozgeka, ndawonanga viŵi cha kuti Yehova watindiwovya, kweni sonu ndiwona kuti Yehova ndiyu watindiwovya nyengu zosi, zuŵa lelosi kweniso ora lelosi. Watindijowo cha pamwenga kuleka kovya ini ndipuso banja langu.”

Mulandu wo Sergey atimumba ungumuchitiska kuti wayambi kusuzgika ukongwa maŵanaŵanu. Venivi vakuchitiska kuti wachiti sitiroku. Chinanga kuti watama kweni walutirizga kuja wakukondwa. Iyu wangukamba kuti: “Masuzgu ngo tikumana nangu pasonu panu, tingawonengi kuti ngakanyengu kamanavi, chinanga kuti ntchipusu cha kukunthiyapu chechosi cho chingatichitikiya.”

Mazu nga pa 1 Akorinto 15:58, ngatimupaska nthazi Sergey. Lemba ili likamba kuti “ntchitu yinu yosi mwa Ambuya, yituwa paŵaka cha.” Sergey wangukamba kuti: “Yehova wakumbuka chechosi ndipu wazamuluwapu cha ntchitu zidu zamampha.”

Titiŵapemphere abali ndi azichi ŵidu ku Russia wo akunthiyapu kutombozgeka kwa vyaka vinandi. Tipemphera kuti abali ndi azichi ŵenaŵa alutirizgi kusaniya nthazi ndipuso kupembuzgika ndi Mazu ngaku Chiuta, ngo ngakamba kuti: “Yehova wakondwa ndi ŵanthu wo atimuwopa, kweniso ŵanthu wo alindizga chanju chaki chambula kumala.”—Salimo 147:11.