Pa 10 February 2021, Khoti la mutawuni ya Abinskiy lo le muchigaŵa cha Krasnodar likuyeruzga kuti Mubali Aleksandr Ivshin we ndi mulandu. Mubali uyu akumuyeruzga kuti wakaje mujeri kwa vyaka 7 ndi hafu. Venivi ndi vyaka vinandi ukongwa pa vyaka vo abali ŵidu apaskikapu kutuwa mu 2017 po Khoti Likulu Ukongwa likukaniziya ntchitu yidu.

Aleksandr Ivshin

• Chaka cho Wakuwiya: 1957 (Ku Katav-Ivanovsk)

• Mo Wakukuliya: Wagwiranga ntchitu yakudumuwa vimiti, wayendesanga machini ngakudumuliya vinthu ndipuso wenga injiniya. Wakutolana ndi Galina mu 1974. Ŵe ndi ŵana ŵaŵi anthukazi ndi azuku 8

  Pa nyengu yo wangutama ukongwa wangwamba kuŵanaŵaniya chilatu cha umoyu. Wati wamaliza kuŵerenga mabuku ngatatu pa mabuku nganayi nga Uthenga wamampha usiku umoza, wangwamba kusambira Bayibolu ndipu wangubatizika mu 1995

Milandu yakukwaskana ndi Akaboni aku Yehova ku Abinsk yingwamba mu 2015. Boma likukamba kuti Akaboni aku Yehova muchigaŵa ichi ndi “gulu lakofya” ndipu likukanizika. Pati pajumpha vyaka pafufupi vinkhondi kutuwa pa nyengu iyi, Mubali Aleksandr Ivshin angumujuliya mulandu. Venivi vinguchitika pa 23 April 2020. Unyaki mwa “milandu” yo atimumba ngwakuti wachita vinthu vakukwaskana ndi chisopa kuziya pa vidiyokoniferensi ndipuso kumba sumu za Ufumu.

Pa nyengu yo arara a boma afufuzanga munyumba yaku Aleksandr ndi Galina, banja ili lingwamba kusuzgika maŵanaŵanu mwakuti wosi ŵaŵi angutama BP yakofya ukongwa. Pati pajumpha myezi yinandi kutuwa po angufufuziya munyumba ya banja ili, ŵaraŵara a boma angulonda galimotu yaku Aleksandr. Chinanga kuti akumana ndi masuzgu ngenanga, kweni Aleksandr walutirizga kuja wakukondwa ndipuso walutirizga kuja wakugomezgeka. Mu mazu ngaki ngakumaliya mu khoti, iyu wangukamba kuti: “Ndizizwa cha kuwona kuti ndimbika mulandu, chifukwa venivi ndivu Yesu wangukambiya limu kuti vazamuchitika. Pa Mateyu 10:18, wangukamba kuti: ‘Azakukuperekani kwa ŵaraŵara a boma ndi mafumu chifukwa chaku ini, kuti uje ukaboni kwaku yiwu kweniso ku ŵanthu amitundu yinyaki.’ . . . Mazu ngaku Yesu ngenanga ngatindichitiska kuti ndileki kusuzgika maŵanaŵanu. Mumalu mwaki ngatindiwovya kuti ndikondwengi, chifukwa ndingakambiya ŵanthu wosi ŵe mu khoti vakukwaskana ndi chilindizga cho ŵanthu wosi wo aziŵa kuti akhumbika Chiuta ŵe nachu.”

Aleksandr ndi Galina mbamoza mwa ŵanthu wo achitiya ukaboni wakukwana ku Russia ndipuso ku vigaŵa vosi va charu chapasi. Tigomezga kuti atumbikikengi ukongwa chifukwa cha kuthemba Yehova.—Yeremiya 17:7.