JANUARY 24, 2022
RUSSIA

Mubali Aleksandr Polozov ndi Stepan Shevelev Asaniya Vitumbiku Vinandi Chinanga kuti Atombozgeka

JULANI

Pambula kuswera yapa, khoti la Norilsk lo le muchigaŵa cha Krasnoyarsk liperekengi cheruzgu pa mulandu wa Mubali Aleksandr Polozov ndi Stepan Shevelev. Loya wa boma wechendakambi cheruzgu cho wakhumba kuti abali yaŵa apaskiki.

Nyengu yo Khoti Liyeruzgiyengi Mulandu

Pa 20 October 2019

Apolisi anguzunguliya mutawuni yosi ya Norilsk. Akaboni akujumpha 50 anguŵajaliya mujeri
Pa 26 October 2019

Aleksandr angumumanga ndikumuŵika mujeri
Pa 21 January 2020

Aleksandr angumutuzga mujeri wati wajamu kwa myezi pafufupi yitatu
Pa 19 February 2020

Aleksandr angumuŵika pamundandanda wa ŵanthu wo achita vakofya ndipu makadi ngaki nga ku banki angungajala
Pa 6 May 2021

Stepan amumbanga mulandu wakuti “anozga chiwembu” limoza ndi Aleksandr. Apolisi angumusaniya kuti Stepan “ngwakunanga’” chifukwa chakuti wapempheranga ndipuso kupharazga

Vakukwaskana ndi Ŵanthu Yaŵa

Aleksandr Polozov

Chaka cho Wakuwiya: 1970 (Torzhok, Muchigaŵa cha Tver)

Mo Wakukuliya: Weche wachinyamata wayanjanga kutchaya bola la hockey ndipuso kusambira mu maji. Wagwira ntchitu yakutaska ŵanthu pangozi. Wakutorana ndi Svetlana mu 1998. Yiwu atanja kutchova njinga kweniso kwenda maulendu

Wangwamba kusambira Bayibolu ndi Akaboni aku Yehova cha mu ma 1990. Wakubatizika mu 1995

Vo Aleksandr Wangumuka Wati Wafumbika

Kumbi Yehova wakuwovyani wuli pa nyengu yo mwenga mujeri?

Ŵati andifumba mafumbu kakwamba, angundijaliya mukachipinda kamujeri. . . . Mukayidi munyangu wangundifumba chifukwa cho angundijaliya mujeri. Ndingumukonkhoske kuti ndimbika mulandu chifukwa chakuti ndigomezga Chiuta wangu. . . . Iyu wangundikambiya kuti: “Lereska kusi kwa thebulu.” Ndingulereskaku ndipu ndingusaniya kuti pa shelufu pe Mabayibolu ngaŵi. Ndinguzizwa ndi vo ndinguwona! . . . Pa zuŵa langu lakwamba, ndingusaniya buku la Mazu ngaku Chiuta. Nditimuwonga ukongwa Yehova chifukwa chakundiwovya munthowa yapade ukongwa.

Kumbi mwayanduwa wuli ndi chovyu chakutuliya kwa abali ndi azichi?

Chovyu cho abali ndi azichi atindipaska chitindichiska ukongwa ndipu atindiwovya ukongwa. Ndi mlenji, abali angunditawuza mwalikondwa po andilutisanga ku khoti. Pavuli paki, ndi mazulu nyengu ya 6:00 koloku angundimbiya manja po ndalutanga kuchikwera galimotu ya kujeri. Vo abali anguchita venga vapade ukongwa kwaku ini, ndipu vingundipaska ukaboni wamampha ukongwa.

Stepan Shevelev

Chaka cho Wakuwiya: 1982 (Maslyanino, muchigaŵa cha Novosibirsk)

Mo Wakukuliya: Wagwira ntchitu yakulumikiza mawaya nga magesi. Wakutorana ndi Oksana mu 2013. Atanja kuŵerenga kweniso kwenda maulendu

Mu 1996, anyina aku Stepan ndi mubali waki angwamba kusambira Bayibolu. Kweni palivi yo wangulutirizga kusambira uneneska, Stepan wangwamba kusambira Bayibolu ndi Akaboni aku Yehova ndipu wangukhorwa ndi vo asambiza. Wanguchiskika wati waziŵa mo Bayibolu lisinthiya umoyu wa ŵanthu kuti uje wamampha. Wakubatizika mu 2001

Vo Stepan Wangumuka Wati Wafumbika

Kumbi kusambira Bayibolu nyengu zosi ndipuso kusopa vakuwovyani wuli yimwi ndi muwolu winu?

Titanja kusopa kwa pabanja. Vyaka vinandi vo vajumpha, tingusankha zuŵa limoza lakuti tichitengi kusopa kwa pabanja ndipu tazomerezanga cha kuti chinthu chinyaki chechosi chititimbanyizgi. Chifukwa cha venivi, ndigomezga ndi mtima wosi kuti muwolu wangu wakwanjiwa walutirizgengi kukhoreska chivwanu chaki. Kusazgiyapu yapa, nditesesa kuchita vinthu vo vingandipangisa kuti ndikondwengi pa kuŵerenga Bayibolu. Mwakuyeruzgiyapu, ndinguŵerenga Bayibolu losi kwa chaka champhumphu. Pavuli paki, ndingwamba kuliŵerenga mwakulondo mbiri. Ndipu ndinguŵika mumagulu mabuku nga mu Bayibolu kweniso ŵanthu wo akulilemba ndi vinyaki mwaku vo. Kuchita viyo kwandiwovya kuti ndikondwengi ndikuŵerenga Bayibolu ndipu fundu zo ndikuziziŵiriya kali nditizivwa munthowa yasonu.

Kumbi ŵanthu wo atikutombozgani mutiŵawona wuli sonu?

Yehova watindiwovya kuti ndiŵawonengi mwakwenere. Ini ndi mowulu wangu tiwona ŵanthu ŵenaŵa kuti agwira waka ntchitu yawu. Yiwu asuzgika ndi masuzgu ngawu ndipu akhumbika chilindizga chamampha cho tipharazga.

Tigomezga kuti Yehova walutirizgengi kovya abali ŵidu akwanjiwa wo mwakugomezgeka ‘alutirizga mbwenu’ kuchita vinthu mwaurunji chinanga kuti atombozgeka.—Ŵeruzgi 8:4.

NKHANI