Pa 3 November 2023, Mubali Aleksandr Shevchuk wakutuzika mujeri, wati wamaliza ukayidi waki mwakukoliyana ndi nyengu yo angumulangiya. Mu 2019, iyu wanguja mujeri kwa myezi 5 wachilindizga kuti amumbi mulandu, ndipu pa 25 August, 2022 angumumba mulandu ndi kumulangiya nyengu yakuchijaliya kujeri.

Wechendatumiziki kujeri, Aleksandr wangukamba vinthu vo vingumuwovya kuja ndi maŵanaŵanu ngakwenere pa nyengu yosi yo mulandu waki wakambikanga mukhoti. Iyu wanguti: “Nditesesa kukumbuka kuti nkhondu ye yapa njakukwaskana ndi vo marangu nga ŵanthu ngakamba cha, kweni nja kuja wakugomezgeka kwaku Yehova. Vo khoti lingagamuwa ndivu vakukhumbika ukongwa cha. Kweni ndiŵika maŵanaŵanu ngangu pa kuchitiya ukaboni ku ŵanthu anandi. Asani ndiŵanaŵaniya venivi, ntchipusu kukunthiyapu mwalikondwa.”

Aleksandr wangukamba so kuti lemba la Salimo 91 ndilu lamupembuzganga ukongwa pa nyengu yosi yo wangumangika. Pa vesi 15, Yehova wasimikiziya ateweti ŵaki kuti: “Wandidanengi ndipu ini ndimumukengi. Pa masuzgu ndiŵengi nayu. Ndimutaskengi kweniso ndimukankhuskengi.”

Aleksandr ndi munthu wakwamba cha mubanja lawu kukunthiyapu kutombozgeka chifukwa cha chivwanu chawu. Mu 1951, apapi ŵa ambuyaki ŵenga mu gulu la Akaboni aku Yehova pafufupi 10,000 wo angutumizika ku Siberia. Mwakuti apapi ŵaki wosi aku Aleksandr anguwiya ku Siberia kweniko.

Tiwonga ukongwa vakuwoniyapu vamampha nge Aleksandr, ŵanthu a mubanja laki kweniso wosi wo akulongo kuti mbakugomezgeka ku ulamuliru waku Yehova.—1 Atesalonika 1:2, 3.