Pambula kuswera yapa, Khoti la Birobidzhan lo le Muchigaŵa cha Jewish Autonomous liperekengi cheruzgu chaki pa mulandu wa Mubali Andrey Gubin. a

Andrey Gubin

• Chaka cho Wakuwiya: 1974 (mu tawuni ya Saran, ku Kazakhstan)

• Mo Wakukuliya: We ndi mku waki ndi mzichi waki. Weche wachinyamata, wagwiranga ganyu yakunozga ndi kupanga maloku asani waŵeruka kusukulu, kuti wawovyengi banja laki. Pavuli paki, wangwamba kugwira ntchitu yakwendesa magalimotu ngakulungakulu pa kampani yinyaki ya vakuzenga. Watanja masaza, kulemba ndakatulu ndipuso kumba vipangizu vakumbiya sumu

• Kutuwa po wenga wachinyamata, wasuzgikanga maŵanaŵanu chifukwa cha vinthu vambula urunji ndipuso vinthu viheni vo vichitika mucharu. Wati wayamba kusambira Bayibolu, wangusaniya chimangu chamumtima ndipuso wanguziŵa chilatu cha umoyu. Vo Bayibolu lilayizga pankhani yakuweziyapu urunji ndi chimangu pacharu, vingumuchitiska kuti wajipatuliyi kwaku Yehova Chiuta. Wakubatizika mu 1991 po wenga ndi vyaka 17. Wakutorana ndi Tatyana mu 2007. Wangusamiya ku Birobidzhan mu 2011

Pa 12 February 2020, apolisi a gulu la FSB (Federal Security Service) angwamba kumufufuza Mubali Andrey Gubin. Pa 17 September 2020, angwamba kumumba mulandu.

Mulandu wa mubali uyu, ngumoza mwa milandu 19 yakukwaskana ndi abali ndi azichi ŵidu yo atiyifufuza Muchigaŵa cha Jewish Autonomous. Milandu yeniyi yingwamba pa nyengu yo ŵaraŵara a boma angufufuza nyumba zinandi pa zuŵa lo atilidana kuti “Zuŵa la Cheruzgu.” Pa 17 May 2018, apolisi 150 angufufuza nyumba 22 za Akaboni aku Yehova. Apolisi angulonda makadi nga ku banki, ndalama, vithuzi, makompyuta ndipuso mafoni.

Ŵaraŵara a boma akujala ma akaunti nga ku banki ngaku Andrey ndi Tatyana. Venivi vachitiska kuti asuzgikengi kusaniya ndalama zo zingaŵawovya pa umoyu wawu wa zuŵa ndi zuŵa. Pasonu panu, pajumpha myezi kutuwa po banja ili lingwamba kumbika mulandu ndipu venivi vachitiska kuti mzichi Tatyana watamengitamengi. Chinanga kuti veviyo, banja ili lipembuzgika chifukwa cha kuŵerenga Bayibolu nyengu zosi. Ulongozgi wa mu Bayibolu wakukwaskana ndi vo angachita kuti akunthiyepu, waŵawovya ukongwa.

Andrey watimugomezga ukongwa Yehova kweniso gulu laki chifukwa cha chovyu cho walonde kutuliya kwa abali ndi azichi ŵaki. Mwakuyeruzgiyapu, zuŵa linyaki Andrey wangwamba kufipa mtima chifukwa cha mo vinthu viliri. Iyu wangukambiyaku mubali munyaki yo nayu wambika mulandu wakuyanana ndi waki mo wavwiyanga. Chakwamba mubali uyu wangumusimikiziya Andrey kuti vachilendu cha kufipa mtima ndi vinthu vo tikumana navu. Pavuli paki, wangumukumbuska Andrey kuti Yesu wawonanga kuti ndi mwaŵi kutombozgeka chifukwa cha zina laku Yehova. Andrey wangukamba kuti: “Ndati ndavwa fundu zenizi mtima wangu unguweriyamu. Pasonu panu, ndisimikiza mtima kuti ndilutirizgengi kuchita khumbu la Ada ŵidu.”

Tipemphera kuti Andrey ndi Tatyana alutilizgi kusaniya nthazi kutuliya mu Mazu ngaku Chiuta ndipuso kwa abali ndi azichi. Tigomezga kuti “ŵanthu wo atopa Chiuta wauneneska vinthu viŵayendiyengi umampha.”—Wakutawula 8:12.