AUGUST 3, 2021
RUSSIA

Mubali Andrey Okhrimchuk Wathemba Yehova Kuti Wamupaski Nthazi

JULANI

Nyengu yo Khoti Liyeruzgiyengi Mulandu

● Pa 4 October 2021

Khoti la muchigaŵa cha Rostov likukana apilu ya Mubali Andrey. Cheruzgu cho khoti lingupereka pakwamba chakuti mubali uyu wangapalamulanga mulandu wewosi cha kwa vyaka vinayi chechendasinthi. Iyu walutengi kujeri cha panyengu iyi
Pa 2 August 2021

Khoti la Leninskiy ku Rostov-on-Don likumusaniya ndi mulandu Mubali Andrey Okhrimchuk. Khoti likumuyeruzga kuti wangapalamulanga mulandu wewosi cha kwa vyaka vinayi. Iyu walutengi kujeri cha pa nyengu iyi
Pa 5 April 2021

Kuyeruzga nkhani yaki kungwamba
Pa 29 October 2020

Mulandu waki ungwamba. Angumumba mulandu wakuti wachita maunganu nga chisopa chakukanizika kweniso watovya gulu lo boma litilidana kuti ndakofya
Pa 22 May 2019

Apolisi wo anguvwala vakujibisa kumasu angufufuza munyumba kweniso mugalimotu yaku Andrey ndi mulenjilenji

Vakukwaskana ndi Munthu Uyu

Andrey Okhrimchuk

Chaka cho Wakuwiya: 1979 (ku Korosten, Ukraine)

Mo Wakukuliya: Wakusambira uyinjiniya. Wagwiranga ntchitu ya usilikali wechendaje Kaboni waku Yehova

Iyu ndi muwolu waki Yekaterina, yo wangutorana nayu mu 2006, angukhorwa ndi kufiskika kwa mauchimi nga mu Bayibolu. Yiwu angubatizika mu 2007. Ŵe ndi mwana munthukazi yumoza

Vo Andrey Wangumuka Wati Wafumbika

Kumbi mayeseru ngenanga ngakuwovyani wuli kuti muje paubwezi wakukho ukongwa ndi Yehova?

Ndiziŵa cha asani ndatingi ndifiskengi kukunthiyapu mayeseru ngenanga kwambula kuwovyeka ndi Yehova. Pa umoyu wangu ndechendapempherepu ukongwa viyo. Yehova nditimukambiya vinthu vo vitindifipiska mtima ndipuso kumupempha kuti wandisazgiyeku chivwanu ndi chiganga kuti ndileki kopa chechosi pamwenga munthu weyosi. Ndiziŵa kuti Yehova watindivwa ndipuso kuti ndiyu watendesa vosi.

Ntchinthu wuli chingukuchitiskani kuti muje akugomezgeka kwaku Yehova pa mayeseru ngenanga?

Ndikumbuka vo lemba la Yohane 6:67, 68 likamba. Pa lemba ili, Yesu wangufumba akutumika ŵaki asani nawu akhumba kuluta. Petulo wangumuka kuti: ‘Ambuya, tilutengi kwaku yani?’ Ndipu nani ndimuka so viyo. Ndilutengi pani? Ndi Mazu ngaku Yehova pe ngo ngakamba za umoyu wamuyaya ndipu ndiyu yija yo wangazisa urunji weneku. Ndipu lemba la Yesaya 30:15 landiwovya ukongwa. Asani ndakumana ndi vinthu vinyaki vakuguŵiska vakuti ndingafiska cha kukunthiyapu, vesi ili litindiwovya kuja wakufwasa ndipuso kuthemba Yehova.

Kumbi mungaŵakambiyanji anyinu wo nawu anozgeke kuzitombozgeka munthazi?

Mungathembanga nthazi zinu cha. Mumalu mwaki, mupemphengi Yehova kuti wakuwovyeni kuja ndi chivwanu chakukho kweniso kuja ndi chiganga. Mujengi paubwezi wakukho ndi abali ndi azichi kuti muŵakambiyengeku vinthu vo vitikufipiskani mtima.

Abali ndi azichi ku Russia ŵe ndi chivwanu chakukho ndipu ntchakuwoniyapu chidu chamampha. Tiziŵa kuti Andrey ndi ŵanthu a mu banja laki afiskengi kukunthiyapu kutombozgeka po alutirizga kuthemba ukongwa Ada ŵidu akuchanya a Yehova.—Salimo 37:5.

NKHANI