Pambula kuswera yapa, Khoti la Zheleznodorozhny lo le ku Krasnoyarsk liperekengi cheruzgu chaki pa mulandu wa Mubali Andrey Stupnikov. * Loya wa boma wechendakambi cheruzgu cho wakhumba kuti Mubali uyu wapaskiki.

Andrey Stupnikov

• Chaka cho Wakuwiya: 1973 (Ku Norilsk, Muchigaŵa cha Krasnoyarsk)

• Mo Wakukuliya: Wakusambira va uyinjiniya wakuwona va mafuta ndi gasi. Wakutorana ndi Olga mu 1993. Wosi atanja vakujambulajambula ndipuso kuchitembeya

  Kwambiya pa unyamata waki, wakhumbisiskanga kuziŵa Chiuta. Iyu wengapu pa nyengu yo ku Chechnya kwachitikanga nkhondu yakwamba yo yidanika kuti Chechen. Wajifumbanga kuti ntchifukwa wuli vinthu viheni vichitika ndipu wakhumbanga kuziŵa vo wangachita kuti Chiuta wamuvikiliyi. Iyu ndi Olga akusambira Bayibolu ndi Akaboni aku Yehova. Yiwu anguzizwa kuwona mo mauchimi nga mu Bayibolu ngafiskikiya kweniso kuziŵa mo Bayibolu lititiwovye kuti timalani ndi masuzgu.

Pa 3 July 2018, gulu la apolisi achisisi la FSB (Federal Security Service) lingumanga Mubali Andrey Stupnikov pa Chiŵaza cha ndegi cha Krasnoyarsk. Iyu ndiyu Kaboni wakwamba kumangika ndi kumbika mulandu mutawuni ya Krasnoyarsk. Zuŵa lakulondopu, Khoti la Zheleznodorozhny ku Krasnoyarsk lingukamba kuti Mubali Andrey akamujaliyi mujer.

Olga muwolu waku Andrey, wamutumiziyanga makalata kuti wamuchiskengi. Kweni pati pajumpha nyengu, Andrey wanguleka kulonde makalata kutuliya ku muwolu waki ndipu ivi vingumufipisa mtima ukongwa. Mwakuti Andrey wangusuzgika ukongwa maŵanaŵanu. Iyu wangukamba kuti: “Munthulumi munyaki wanguza kwaku ini ndikundifumba kuti: ‘Kumbi uwona kuti ntchinthu wuli cho chachitikiya muwolu waku? Uziŵa viyo?’” Pati pajumpha nyengu, Andrey wanguziŵa kuti arara ajeri abisiyanga dala makalata ngo ngatuwanga ku muwolu waki. Andrey wangukamba kuti: “Yiwu angundikambiya kuti ndingawere kwa muwolu wangu mwaliŵi asani ndingavwiya vo angandikambiya pamwenga asani ndingazomera kuti nde wakunanga.” Andrey wanguthemba Yehova ndipu wangulutirizga kuja wakugomezgeka. Wati waja mujeri kwa myezi 8, angumutuzgka ndipu angumukambiya kuti wamuchita ukayidi wa panyumba kwa myezi yinayi.

Pa 2 July 2019, Andrey angumutuzga pa jeri la panyumba. Iyu angumukaniza kugwiriskiya ntchitu intaneti kuti walondiyengepu ndikutumiza makalata. Arara aboma akumuŵikiya so mphaka pa ŵanthu wo wakhumbika kukambiskana nawu.

Po mulandu waki ulutiriya, Andrey waŵika mtima waki pa kuja paubwezi wakukho ndi Yehova. Iyu wakamba mwakusimikiza mtima kuti: “Ndimalika kuti nditimuziŵa Yehova ndipu iyu watuŵa nani pafupi nyengu zosi.”

Tiwonga ukongwa kuti Andrey ntchakuwoniyapu chamampha pa nkhani yakuthemba chovyu chaku Yehova.—Salimo 28:7.