AUGUST 13, 2021
RUSSIA

Mubali Baranov ndi Li Alutirizga Kuja Akufwasa Kweniso Kuthemba Yehova

JULANI

Nyengu yo Khoti Liyeruzgiyengi Mulandu

Pambula kuswera yapa, Khoti la Vyazemskiy lo le muchigaŵa cha Khabarovsk liperekengi cheruzgu chaki pa mulandu wa Mubali Yegor Baranov ndi Yen Sen Li. a Loya waboma wechendakambi cheruzgu cho wakhumba kuti abali yaŵa apaskiki
Pa 2 February 2021

Khoti lingwamba kuvwisiya mulandu wa mubali Yegor ndi Yen Sen
Pa 20 November 2020

Yegor angumutuzga mujeri mo walindizgiyanga mulandu waki, wati wajamu kwa mazuŵa 177
Pa 26 August 2020

Khoti la muchigaŵa cha Khabarovsk lingulonda galimotu yaku Yen Sen
Pa 29 May 2020

Yegor angumuŵika mujeri
Pa 26 May 2020

Khoti la muchigaŵa cha Khabarovsk lingwamba kuŵajuliya mulandu Mubali Yegor ndi Yen Sen

Vakukwaskana ndi Ŵanthu Yaŵa

Yegor Baranov

Chaka cho Wakuwiya: 2001 (ku Olovyannaya, muchigaŵa cha Trans-Baikal)

Mo Wakukuliya: We ndi aku ŵaki ŵaŵi. Awisi akutayika mu 2013. Watanja chilengedu ndipuso vinyama. Wechendamangiki wasambiranga va foresiti

Wakulereka ndi anyina wo Mbakaboni aku Yehova. Chilindizga chakuti awisi wazakuŵona so asani aziyuskika chingumuwovya ukongwa. Wakubatizika kuja Kaboni waku Yehova mu 2017. Watanja kumba kiyibodi, kulemba ndakatulu ndipuso kubika

Vo Yegor Wangumuka Wati Wafumbika

Kumbi ntchinthu wuli cho chakuwovyani kuja paubwezi wakukho ndi Yehova pa masuzgu ngosi ngenanga?

Chifukwa cha chiyesu chenichi, ndikondwa kuziŵa kuti kwali ndikumani ndi masuzgu wuli, Yehova waona mo tivwiya ndipu waphwere weyosi pakuyija. Ndinguziŵa kuti asani ndayamba kukayikiya, ndingalongo kuti Chiuta we ndi zeru ukongwa cha. Nyengu zosi waziŵa vo wangachita ndipu kanandi wachita vinthu munthowa yo tiŵanaŵaniyaku cha. Kuja mujeri nyengu yitali kwandiwovya kuziŵa kuti chigomezgu changu mwaku Yehova chiteseka ndipu venivi vingundiwovya kumuthemba ukongwa.

Yen Sen Li

Chaka cho Wakuwiya: 1952 (ku Nikolaevsk-on-Amur, muchigaŵa cha Khabarovsk)

Mo Wakukuliya: Mubanja mwawu aliku ŵana ankhondi ndipu iyu ngwachitatu. Wagwiranga ntchitu nge injiniya wakunozga va magesi. Wakutorana ndi Olga mu 1991. Ŵe ndi mwana yumoza munthulumi. Iyu ndi muwolu waki angwamba kusambira Bayibolu ŵati aziŵa kuti mu Bayibolu mwe chilindizga cha munthazi chakukwaskana ndi ŵanthu. Wakubatizika mu 1994. Watanja kutchaya tchesi kweniso kuchitembeya

Vo Yen Sen Wangumuka Wati Wafumbika

Kumbi Yehova mwamupemphanganji panyengu yeniyi?

Chiuta ndamupemphanga kuti watipaski nthazi ini ndi muwolu wangu ndipuso kuti tije ndi chimangu cha mumtima. . . . Pa nyengu yo andifumbanga mafumbu ndinguja wakufwasa ndipu venivi vingundiwovya kugomezga fundu yakuti Yehova wandijowongepu cha.

Pa nyengu yo muwolu wangu wenga muchipatala chifukwa cha kutama mtima, ndingupempha Yehova kuti . . . walonde chovyu chakwenere. Yehova wanguvwa mapempheru ngangu. Vachitanga kuwoneke limu kuti iyu watitiwovya tosi, ini ndi muwolu wangu kuziya mwa abali ndi azichi. Nyengu zosi ŵenga nasi. Yiwu angutiwovya mwakuliŵavu ndipuso chakukhumbika ukongwa ntchakuti angutiwovya kuja paubwezi wakukho ukongwa ndi Yehova.

Muwolu wangu wangufiska kuja ndi chivwanu chakukho mwaku Yehova, chifukwa cha chovyu chakutuliya kwaku Yehova ndipuso abali ndi azichi. . . . Iyu wachiska so anyaki. Vichita kuwoneke limu kuti Yehova ndiyu watimuwovya muwolu wangu.

Titiŵawonga ukongwa abali ndi azichi wo alutirizga kuthemba Yehova ndipuso agomezga ndi mtima wosi kuti waŵapaskengi nthazi zakuti akunthiyepu.—2 Atesalonika 3:3.

a Ndi nyengu zosi cha po akambiya limu zuŵa lo khoti liyeruzgiyengi mulandu.

NKHANI