Achinyamata ŵidu ŵaŵi akwanjiwa ku Russia, Mubali Yegor Baranov ndi Mzichi Darya Dulova, alutirizga kulongo chiganga chinanga kuti ambika mulandu ndipu angaŵayeruzga kuti akaje mujeri kwa nyengu yitali. Pasonu panu Mubali Baranov we mujeri ndipu we ndi vyaka 19. Mzichi Dulova wenga ndi vyaka 18 pa nyengu yo apolisi afufuzanga nyumba yaki. Yiwu ndiwu ŵana ukongwa pa abali ndi azichi akujumpha 380 wo ambika mulandu ku Russia chifukwa cha chivwanu chawu.

Mubali Baranov waja mujeri kutuliya pa 27 May 2020. Mzichi Dulova walindizga kuti khoti limuyeruzgi pa milandu yiŵi yakupambana. Chinanga kuti akumana ndi masuzgu nganandi, yiwu alutirizga kuja akugomezgeka kwaku Yehova.

Pa 27 May, apolisi akumiya gulu linyaki lakuvikiliya ŵanthu la FSB wo ŵenga ndi futi angufufuza ku nyumba ya Mubali Baranov ko wajanga ndi ama ŵaki. Zuŵa lenili wakweruzga Aleksey Shatilov wanguyeruzga kuti mubali widu wakaje mujeri chifukwa chakuti “njumoza wa alongozgi” ŵa Akaboni aku Yehova muchigaŵa chenichi.

Pa nyengu yo afufuzanga, Mubali Baranov wangukamba kuti wati wapemphera kwaku Yehova mtima waki unguzika. Iyu wangukamba so kuti: “Yumoza mwa apolisi wo afufuzanga wanguziŵa kuti ndalindizanga kuti azengi ŵati awona nkharu yo ndinguŵalongo.”

Mubali Baranov wangukamba kuti “asani Yehova wazomereza kuti venivi vichitiki, ndikuti ndifiskengi kukunthiyapu.” Iyu wangukamba so kuti: “Kupemphera kwaku Chiuta mwakutuliya pasi pamtima kuti wandiwovyi ndipuso wandipaski mzimu wakupaturika kungundiwovya kuti ndileki kuchita mantha. Ndipuso nde ndi chigomezgu kuti ndilivi mulandu. Njuŵi yangu njituŵa ndipu nditombozgeka chifukwa cha chivwanu changu.”

Mubali Baranov watijivwa kuti ngwakuvikilirika mujeri. Akayidi anyaki atimutumbika ndipuso atimuchitiya vinthu nge kuti ndi mvurwa wawu. Mubali Baranov wangukamba kuti: “Yiwu aziŵa kuti ndikhumbika cha kusanirika munu.”

Pa 1 August 2018, apolisi angufufuza nyumba ya Mzichi Dulova yo wajamu ndi anyina. Mzichi Dulova wangukamba kuti wafipanga mtima chifukwa apolisi angufufuza nyumba yawu ndipuso angumumanga. Chinanga kuti venga viyo, iyu wenga ndi chivwanu chakukho. Iyu wangukamba kuti “Ndikhumbisiska kuja wakugomezgeka kwaku Yehova. Nditeŵetiyengi Yehova mpaka paumaliru, mwemosi mo vingaŵiya.”

Mulandu wa Mzichi Dulova ungwamba mu September 2019 ku khoti la mutawuni ya Karpinsky muchigaŵa cha Sverdlovsk. Mulandu wati wafika kukumaliya, Mzichi Dulova wangukambiya khoti kuti vakuzizwisa cha kuti ŵanthu akambiyengi anyawu vinthu vakukondwesa pa umoyu. Iyu wangukamba kuti: “Mwakuyeruzgiyapu, ndiziŵa kuti pambula kuswera yapa Yehova wachitiskengi kuti charu chapasi chije paradayisu ndipu kwazamukuŵa masozi nga likondwa. Kumbi ndingatondeka kuŵakambiyaku anyangu uthenga wakukondwesa wenuwu?”

Chinanga kuti wangukonkhoska kweniso kujivikiliya mwachiganga, iyu angumusaniya ndi mulandu pa 27 January 2020. Mzichi Dulova angumuyeruzga kuti wangapalamulanga mulandu wewosi cha kwa chaka chimoza. Loya yo wamiya mzichi uyu wakupanga apilu cheruzgu chenichi.

Pa 6 August 2020, khoti la muchigaŵa cha Sverdlovsk lingusintha vo Mzichi Dulova angumuyeruzga pakwamba. Mulandu wenuwu unguwere so ku khoti la mutawuni ya Karpinsky kuti ukayeruzgiki ndi wakweruzga munyaki. Zuŵa la cheruzgu chenichi lechendaziŵiki. Po walindizga cheruzgu chenichi, iyu watesesa kulongo kuti walivi mulandu pa mulandu wachiŵi wo atimumba limoza anyina ndipuso Akaboni anyaki atatu.

Mubali Baranov ndi Mzichi Dulova asambira vinandi pa masuzgu ngo akumana nangu.

Mzichi Dulova wakonkhoska vo vingumuwovya. Iyu wanguti: “Kuti muje ndi chivwanu chakukho mwaku Yehova mutenere kuŵerenga Bayibolu, kunozgeke maunganu ndipuso kumba sumu zidu za Ufumu. Mujitangwanisengi ndi kulunguluka fundu za mu Bayibolu zo zingakuwovyani kuti muleki kuja ndi maŵanaŵanu kweniso mantha ngambula kuziŵika.”

Mubali Baranov wangukamba kuti: “Kuti mukunthiyepu kutombozgeka kwenuku, mukhumbika kuja pa ubwezi wakukho ndi Yehova. Nyengu yinu yingamalanga pawaka cha. Sonu ndi nyengu yakuti ubwezi winu ndi Yehova Chiuta uje wakukho ukongwa.”

Mu Bayibolu mwe vakuwoniyapu vinandi vakukwaskana ndi Yehova vo vingawovya achinyamata akugomezgeka kuti aje ndi chiganga. Tiziŵa kuti iyu walutirizgengi kovya achinyamata ŵidu akwanjiwa wo atombozgeka ku Russia kweniso muvyaru vinyaki.—1 Samuyeli 1:20; 16:18; 2 Mafumu 5:1-3; Daniyeli 1:14-17; 3:17-27.