Pa 2 September, 2020, * ku Khoti lo le Mutawuni ya Berezovsky muchigaŵa cha Kemerovo

Kuja mujeri kwa vyaka 6 ndi hafu

Sergey Britvin

• Chaka cho Wakuwiya: 1965 (Chigaŵa cha Kemerovo)

• Mo Wakukuliya: Kwa vyaka vinandi waja wachigwira ntchitu yakwendesa vimakina vikuluvikulu kweniso wayendesanga vimagalimotu vikuluvikulu. Ndipu wakuleka liŵi ntchitu iyi chifukwa chakutama. Watanja ukongwa masaza

• Mu 1992, wanguto Natalya. Wati wasambira malayizgu ngakukwaskana ndi chiyuka cho Chiuta wakulayizga wangwamba kusambira Bayibolu mu 1995. Pati pajumpha vyaka vinandi, Natalya nayu wangwamba kusambira Bayibolu. Wangukwaskika ukongwa ndi chivwanu chaku Sergey kweniso mo wangusinthiya mijalidu yinandi yo wenga nayu

Vadim Levchuk

• Chaka cho Wakuwiya: 1972 (Chigaŵa cha Kemerovo)

• Mo Wakukuliya: Iyu wakukuliya mubanja la ŵanthu wo alekanga kusopa. Wangugwira ntchitu mumigodi kwa vyaka 14

• Mu 1992, wangwamba kusambira Bayibolu ndipu wanguto Tatiana mu 1997. Iyu we ndi ŵana ŵaŵi. Banja lawu losi litumbika Bayibolu. Yiwu atanja so masaza kweniso kuchicheza kumalu nganyaki

Pa 22 July, 2018, akumiya gulu linyaki lakuvikiliya ŵanthu la FSB lingufufuza nyumba 8 za abali ŵidu mutawuni ya Berezovsky. Ivi vinguchitska kuti Mubali Britvin ndi Levchuk amangiki kweniso kuŵafumba mafumbu. Pakumaliya paki, Khoti la Central District ku Kemerovo linguyeruzga kuti abali ŵenaŵa aŵikiki mujeri. Yiwu anguja mujeri pafufupi chaka ndi hafu. Pa 25 December, 2019, abali yaŵa anguŵakambiya kuti akachitengi ukayidi wa panyumba.

Mubali Britvin ndi Levchuk ŵe mugulu la abali 5 wo atiŵamba mulandu Muchigaŵa cha Kemerovo chifukwa chakuti Mbakaboni aku Yehova. Titiŵaŵanaŵaniya ndipuso kuŵapemphere abali ndi azichi ŵidu wosi wo akumangika ku Russia. Lemba la Aheberi 13:3 lititichiska kuti: “Lutirizgani kukumbuka ŵanthu wo ŵe mujeri nge kuti namwi mwamangikiya nawu limoza. Mukumbukengi so wo atombozgeka, pakuti yimwi namwi mweche mu liŵavu.”