Pa 15 July  2020 Mubali Dennis Christensen wakuŵikika so kachiŵi mukachipinda kakulangiyamu ŵanthu (SHIZO). Ndipu wajengi mwenimo mpaka pa 27 July. Venivi vinguchitika wati waja waka mazuŵa 4 kutuwa po angumutuzga kakwamba mukachipinda kakulangiyamu ŵanthu. Asani amuŵikengi so kachitatu, akujeri apharazgengi kuti iyu “wavwiya cha marangu ngakujeri” ndipu amuŵikengi mukachipinda ko wamutombozgekiyamu ukongwa (EPKT) kwa myezi 6. Maloya nga Mubali Christensen ngapangengi apilu va cheruzgu chasonu chenichi.

Arara akujeri atimumba mulandu Mubali Christensen chifukwa wafiska cha kugwira ntchitu yo amupasa. Arara ŵenaŵa akulamula kuti Mubali Christensen wagwirengi ntchitu ku yakusona ku jeri. Kweni liŵavu laki le umampha viŵi cha chituliyi po akumuŵikiya mujeri. Madokotala nga kujeri ngakamba kuti Mubali Christensen we ndi liŵavu lanthazi lakuti wangagwira ntchitu kweni cho wakhumbika nkhuchita masaza kweniso kupumuwa mwakukwana. Mwaviyo, dokotala yo waleka kugwira ntchitu kujeri wangumuwona Mubali Christensen mo liŵavu laki liliri wechendaŵikiki mujeri. Dokotala mwenuyu wangukamba kuti Mubali Christensen wangafiska cha kugwira ntchitu chifukwa cha mo liwavu laki liliri.

Mukachipinda kakulangiyamu ŵanthu (SHIZO), munthu wazomerezeka cha kuti waguli chakurya, kumba pamwenga kulonde foni, kuonana ndi ŵanthu wo aluta kuchimuwona pamwenga kulonde katundu. Dangu lizomereza cha kuti akayidi wo we mu SHIZO awonani ndi wanthu achisopa chawu. Mwaviyo, Mubali Christensen wangadana cha abali ara kuti azimuwoni. Ve viyo chifukwa chakuti Akaboni aku Yehova pasonu panu ntchisopa chambula kuzomerezeka ku Russia.

Nge mo lingukambiya lipoti lakwamba, pa 23 June Khoti la Muchigaŵa cha Lgov linguyeruzga kuti Mubali Christensen watuzgiki liŵi mujeri ndipu mulandu wo wajaku wapereki waka ndalama. Pati pajumpha waka mazuŵa ngamanavi, wo amumbanga mulandu angupanga apilu cheruzgu chenichi. Arara aku jeri akoliyana ndi ŵanthu wo atimumba mulandu kuti anangi mbiri ya Mubali Christensen kuti waleki kutuzgika liŵi mujeri.

Mubali Christensen ndi muwolu waki Irina, alutirizga kuja akukondwa. Tichiskika ukongwa kuona kuti Yehova walutirizga kuwovya ateŵeti waki akugomezgeka kuti akunthiyengepu kweniso akondwengi chinanga kuti akumana ndi masuzgu.—Akolose 1:11